Read Ghomala New Testament EBRAIKA 13 Bible Online

EBRAIKA 13 - Ghomala New Testament bible

EBRAIKA 13

¹Kuŋnyə mfɑmfɑ pɑ bɑ́ cəcɑ̌ po.

²Ka po tʉɔnyə nə lɑ mghʉɔ, nə pa' a lě shyə m̀ nə nə lɑ mghʉɔ, shɑ pɔ nyəŋ pɑ aŋgəle dyə.

³Po pɑ ŋkhamtə pɔ pyə wap m̀ dyə cɛ a, pa' cwə yə po a pú nə bɑ mghɛ cɛ a; bɑ ŋkhamtə pɔ pyə pu wə dɑ wap jɔgo' a, nə pa' ba wɔ yɔ bɑ pǒ ghə nɑ pa' wap a.

⁴Lɔmdyə pɑ ywə mku' bi guŋ pɔ awɛ ba kǒdyə lɔmdyə pɑ tə mviŋ nə pa' Si gɔ sɔ' fyɛ' pɑ ghə ghap pu a pɑ kathə́.

⁵A nə kùŋ ŋkhǎp nə́ kɑ pɑ shya ghiŋ tsɔ; po pɑ ŋwɛnyə nə ywə yə pǒ ghə a, nə pa' kwa' Cyəpɔ gɔm gɑ: Gɛ̌ ŋ tə gɔ tak o nəŋ pɑ: ŋ də wa' o.

⁶Tə bi a pɑ cəŋtə gɔm nə guŋ ywə awɛ gɑ: Cyəpɔ bɑ gɛ kwitə a, ŋ tə́ gɔ pwɔk sɔmywə pɑ Pɑ́ mo ghə kɑ nə myə?

⁷Po pɑ ŋkhamtə pɑ cya wɔ pyə wap lə siŋ ghɔm Si bi po a; po yɔ pa' vɔk yap lə nə miŋ a, biŋ bɑ fo' piŋnthʉm yap.

⁸Yeso Kristo tə ŋkwyəpnyə pɑ. E bɑ pɑ yʉ yə e lə bɑ a, yə e bɑ cwəlɔ a, biŋ bɑ gɔ pɑ pɑ yʉ́ guŋ mcwə awɛ.

⁹Ka po tak gɑ nthinthi tsə ji'tə zhǐ'tə tsyə a fɑ m̀ dzʉ̌ a fʉtə wɔ. Nə pa' a bɑ ǎ puŋ gɑ gho' Si nə nyəŋ gʉ' nə mtʉ̌m mo shyə ywətsʉ, ywətsʉ yə a la m gə sɔm nwə pɑpuŋ bi pɔ pyə wap gə jyə nə a.

¹⁰Pɑ̌ bɑ pɑ̌ ghə tsʉ' nuŋpwɔ' yə bi a pɔ pyə wap fa' nthap a lə te ywətsʉ yap nə.

¹¹Nə pa' bap mnɔm pyə ŋkhamsi gwyə dɑ mcyə map gɔ cwyəp nə nə sɔk mhɔ a, pu ntho ya m̀ jʉm pě.

¹²A po'o tə Yeso lě nə lɑ mcyə myə lɔnyə pɔmnəŋ, jɔgo' pɑ m jʉm pě.

¹³Pɑ təm gɔ̌, pa pú yu'tə m̀ jʉm pě, pɑ piŋ gɑ pu yəmtə wɔk pa pú.

¹⁴Nə pa' a tə bɑ pɑ̌ ghə gúŋ mama dəmcǎ' po'o pɑ; pɑ bɑwə shəŋ guŋ yə a gɔ lá'tə pɑ a.

¹⁵Pɑ cyə m nə Yeso nuŋpwɔ' mzhwɔp ghamtə̀ bi Si guŋ mcwə awɛ, yəŋ la'tə gɑ ywə hɑhɑ mshwə myə a ŋkhe tso tsyə a.

¹⁶Ka po tʉɔnyə nə pɑ gə nwə pɑpuŋ biŋ ŋkwitə wɔ wɔ, nə pa' a bɑ nthi pwɔ' tsyə a buŋ Si a.

¹⁷Po pɑ ju'nyə bi pɑ cya wɔ, biŋ bɑ gə ywə yə wap yap a; nə pa' wap byap mtʉm mɔ, bɑ gɔ sɔ' ghɔmnwə nə bi Si. A po'o tə a pɑ́ shəŋ gɑ po ghə wap lɑ ŋwɛnyə̀ fǎ', nə pa' wap lɑ yɛlúŋ fá' bɑ a tə gɔ kwitə wɔ pɑ́.

¹⁸Po cwyɛ'nyə Si nə pyə nə pa' pyə̌ zhyə gɑ́ pyə ghə kwa' tʉm dɔlɔ̌, biŋ bɑwə ŋkhaktʉɔ nə ghiŋ pɑpuŋ nə guŋ ywə awɛ.

¹⁹Gɑ̌ wə shəŋtə́ do bi po gɑ́ po ghə po'o tə pu pa' a bi po.

²⁰A Si hwitə̀ yə e lə cyə m̀ nə mcyə́ kɔ mama jam byap dzə́ gwyə nə vʉ̌, Cyəpɔ yɔk pɑ Yeso a,

²¹Si bɔ ghə́ po ku'nyə nə ghə ywə yə ǎ puŋ nə nə́ fa' pa' e shəŋ a. E ghə ywə yə ǎ púŋ bi e a nə pɑ shyə m̀ nə Yeso Kristo yə ghu'tə bɑ bi nə mgu' nə gu' a. Amɛn.

²²Mfɑ̌mfɑ́, po piŋ mghɔm mɔ̌! A bɑ gɑ̌ cya pɑ pǒ mkam ghɔm bi po.

²³Po zhyə gɑ́ pu kě nthak fɑ yɔk pɑ Timotio nəŋ. E lo'nyə̀ sɔ̌' bɑ pyə e gɔ sɔ' yɔ wɔ.

²⁴Po ca'tə guŋ pɑ cya wɔ awɛ ba pɔ dɔlɔ̌. Pɔ pyə wap Italia a ca'tə wɔ.

²⁵Gho' pɑ bi guŋ yɔ awɛ. Amɛn!