Read Ghomala New Testament EBRAIKA 2 Bible Online

EBRAIKA 2 - Ghomala New Testament bible

EBRAIKA 2

¹Pɑ zhyə́ gɑ́ pɑ gɔ cəŋtə tɔm cuŋ yə pɑ̌ ju' a, bwɔk gɑ pɑ kɑ ghiŋ m jyə dyɛ'.

²Ghɔm tsyə pɑ aŋgəle lə ghɔm cwə dzə a lě da'tə dəŋ pa' a lə bɑ a. Bǎwɑlə yə e lě tə ghiŋ nə a, yə e lě nthʉɔthə nə a lě ŋkwi mcwɔ'fa' myə a kuŋyə a.

³Pa gɔ vɔk nə nyəŋ shɛ thə pɑ m gɑ kɑ bi a pɑ yə pɑ kəŋnyə yən nthi ywə vɔk? Pa kwa' yʉ Cyəpɔ bɑ e lě dəŋdzə siŋ yá, ba pɔ pyə wap lə yu' Cyəpɔ a piŋ gɑ ǎ po'o nə dəŋ e.

⁴Ba Si piŋ nyəŋ dəŋ nə yap nə kwinthɛ̌ shyə m nə mtiŋ ba m nə msya nthinthi, ba nə nə́ hɑ Zhwenyə Dɔlɔ̌ nə pa' e nə jɔ a.

⁵Nə pa' a tə bɑ m̀ bi pɑ aŋgəle tə Si bɑ ě hɑ dzʉ́ yə pɑ gɔm a pɑwə sɔ' a pɑ. A bɑ pu ghɔm nə dzʉ̌ bɔ nə mu' tsʉ' gɑ:

⁶Monə̌ŋ bɑ kɑ̀ tə́ o pɑ ŋkhantə é? Kɑ̀ mú mo lə tə o pɑ́ bɔmtə e?

⁷A bɑ ǒ na' fi' e hɑ si nə pɑ aŋgəle; O nyəŋ ghu'tə pu a mku' nə e.

⁸Si lě jap guŋ ywə awɛ to mkwə e. Si lě nə ghə gɑ́ guŋ ywə awɛ pɑ́ ju'nyə e, é lə tak sɔmywə gɑ a kɑ cyətə yu'nyə e pɑ. Da' gɑ pyə tə́ guŋ bɑwə jɔ gɑ́ guŋ ywə awɛ bɑwə ju'nyə e pɑ́.

⁹Pyə wə jɔ ta' ywə: A pɑ gɑ́ mo yə pu lə fi' e hɑ si nə pɑ aŋgəle a, Yeso, e bɑ ě cyə̀ m nə go' vʉ̌ yə e jɔ a ŋkwi co'fò ghu' ba mku'. A po'o tə a shyə m̀ nə gho' Si, go' vʉ́ Yeso pɑ bɑ e jɔ po'o nə guŋ pɔ awɛ.

¹⁰A lə púŋ bi mo yə guŋ ywə awɛ bɑ̀ pɑ yə́, biŋ bɑ shyə́ pɑ m̀ nə é tə bɑwə, yʉ yə e lə biŋ bɑwə shə́ŋ nə lɑ pɔ jɔmyɔ̌m gɔ nə ghu'tə̀ a, gɑ e ghə a pəmtə shyə m̀ nə́ ghəghʉɔ mo yə e gə ywə vɔk yap a.

¹¹Nə pa' Mo yə e dɔnyə pɔmnəŋ ba pɔ pyə e dɔnyə wap a nthəm pɑ nə ta' tsʉ'. A po'o tə sǒ lə pɑ ŋkhú é nə ké wap gɑ mfɑ́ pyə́

¹²biŋ gɔm gɑ: Gɑ̌ gɔ sɔ' pɑ siŋ tso tsǔ bi mfɑ pɑ̌, gɑ̌ gɔ pɑ zhwɔp mku' mǔ cəcɑ́ cu'tə.

¹³Biŋ gɔm gɑ: Myə, gɑ gɔ pɑ́ yaptʉm nə e. Bɑ m gɑ: Gɑ̌ yəŋ, myə ba pǒ pyə Si hɑ wap bəm a.

¹⁴A po'o tə pa' wap bɑ pɔ bapnɑ pu mcyə a, Yeso ba yʉ yə́ bɑ e lě shʉ' pa' wap a nə bapnɑ. A pɑ po'o shyə m̀ nə vʉ é e tsa'tə Sata yə gʉ' vʉ lə bɑ bi a.

¹⁵Biŋ ŋkhyɛ' pɔ pyə nə pwɔk vʉ̌ lə bɑ ǎ lɑ wap gə mkwɔ nə guŋ yap vɔk awɛ a.

¹⁶Nə pa' e tə́ kwitə́ pɑ́ pɑ aŋgəle pɑ̀, e ŋkwitə́ gwya Abraham.

¹⁷A po'o tə e lə bɑ gɔ pɑ nə guŋ ywə awɛ pɑ pɑ pa' mfɑ pyə́ a, po'o tə zhi ŋkhamsi gwyə́ shɔ́mmtso, giŋjyə̀ bi Si nə nə́ vɑnyə mhɔnwə pɔmnəŋ.

¹⁸Nə kɑlə́ pa' kwa' yʉ́ lə yɔ̌go' a, e ku' nə kwitə pɔ pyə́ gǒ' ko nə pu a.