Read Ghomala New Testament EBRAIKA 3 Bible Online

EBRAIKA 3 - Ghomala New Testament bible

EBRAIKA 3

¹A po'o, mfɑ dɔlɔ̌, pyə Si ŋkhe wɔ a, po pɑ dé m nə Yeso, gɛ nthəm Si biŋ bɑ ŋkhamsi gwyə nə piŋnthʉm yɔk pɑ̀ yə pɑ biŋ a.

²Nə pa' Si bɑ e lě shwɔ' e nə fa' bɔ.

³E lě ju'nyə bi e, bɑ dəŋdəŋ pa' Mosɛ yə a bɑ pu və nə e gɑ: E lě bɑ dəŋdəŋ nthʉm guŋ dyə Si awɛ.

⁴Bǎ ya pa' lə bɑ ě ghə mo yə e lə pəm e a, mo yə e nə́ŋ bəm guŋ ywə awɛ pɑ́ Si.

⁵Mosɛ bɑ e lě bɑ dəŋdəŋ nə guŋ dyə Si awɛ, bɑ gɛfa' ŋkwinthɛ̌ nə ywə yə Si lə bɑ gɔ ghɔm a.

⁶Da' gɑ Kristo bɑ dəŋdəŋ pa' Mu bɑ pu yap e nə thə dyə Si. Pɑ piŋ bɑ dyə e bi a pɑ gɑ pɑ tɔm piŋnthʉm yɔ pɑ ba mɔktə yə pɑ ŋwɛnyə nə a.

⁷A po'o tə dəŋdəŋ pa' Zhwenyə Dɔlɔ̌ gɔm a: Po yu' gi e tyɛ' o,

⁸ka po sɔk mtʉ́m mɔ́ pa' cwə yə po lə tʉɔthə́ bi e, tyɛ'dzʉ́ yə po lə ləŋtə é ghakgo a,

⁹yə mtá pɔ lə ləŋtə á, bɑ shəŋ nə yɔ ywə yə gɑ̌ bɑ ya a, wap lə yɔ mfa' mə̌,

¹⁰nə gu'dzʉ́ mghappfʉə. A bɑ po'o tə jɛ́luŋ nə pɔ nə́ yəŋ gɑ wɔ̌dzʉ́. Biŋ gɔm gɑ: Tʉm tsap hɔjyə̀ guŋ mcwə awɛ, pɔ bǎ bɑ wap ka yɔ məjyə a.

¹¹Nə pa' ŋ də yɛ̌lúŋ ŋkhɔ mkɔ gɑ: Pu gɔ la' yɔ pa' wap gɔ ko nə hwitə a lə.

¹²Po pɔmtə́ mfɑmfɑ́ gɑ sɔmmo nə́ po kɑ́ ghə tʉ́m cwəpùŋ tsyə nə cyətə ghə piŋnthʉm gɔ té tsa nə Si nthʉ̀ɔnthʉ̀ɔ a.

¹³Po pɑ hɑ kaktʉɔ cəcɑ̌ po wɔ wɔ, guŋ mtyɛ'dzʉ awɛ nə nthə́ pa' dzʉ tyɛ' ɔ yə ŋwa'nyə gɔm a gɔ nə cwə a. Po'o gɑ sɔmmo nə po kɑ kəŋnyə nə yu', gə mhɔnwə futə e.

¹⁴Pɑ bɑ pɑ̌ zhi mso ghiŋ Kristo, bi a pɑ gɑ pɑ tɔm pɑpuŋ tə miŋ pa' pɑ lə nə ntho' a.

¹⁵Nə pa' a bɑ pu ghɔm gɑ: Po yu' gi e tyɛ' ɔ, ka po sɔk mtʉm mɔ pa' cwə yə po lə nthʉɔthə́ bi e a.

¹⁶Kwa' pɑ wɑ̌ lə ju' nthʉɔthə́? A la tə́ bɑ guŋ pɔ pyə wap lə cyə m jʉ́m Mosɛ nthəm Egipto a pɑ́ a?

¹⁷E lə yɛ̌lúŋ nə wɑ̌ nə gu'dzʉ́ mghappfʉə? A la tə bɑ nə pɔ pyə wap lə hɔnwə̀, mpfə map vʉtə ghakgo a pɑ́ a?

¹⁸E lə nəŋ ŋkhɔ́ mkɔ bi wɑ̌ gɑ e tə́ gɔ ko nə hwitə̀ e a, tə a bɑ pɑ bi pɑ tʉɔthə́ bɔ?

¹⁹Pɑ̌ piŋ jɔ gɑ wap lě tə ko nə́ bɑ a shyə m̀ nə yap nə cyətə ghə piŋnthʉm.