Read Ghomala New Testament EBRAIKA 4 Bible Online

EBRAIKA 4 - Ghomala New Testament bible

EBRAIKA 4

¹Pɑ pwɔk, nə pa' cwə yə́ mka'nyə̌ nə ko nə hwitə e jɑ pɑ si a, pɑ pwɔk gɑ ka mu' mo nə pɑ kɑ wuŋ nyəŋ yə pɑ gɑ e gɔ wuŋ jʉ̀m.

²Nə pa' ba wɔk pɑ bɑ́ pɑ́ kwi Cùŋ pɑpuŋ pɑ́ pa' pɔ bɔ a. Da' gɑ ghɔm tsyə wap lə yu' a lě tə kwitə́ wap, nə pa' pɑ yu' ghɔm bɔ lě tə́ ghə́ piŋnthʉm.

³Wɔk pɑ pyə a bɑ pɑ̌ ghə piŋnthʉm a, pɑ ŋkho nə hwitə́ yə e gɔm nə gɑ́: Nə pɑ ŋ də yɛlúŋ ŋkhɔ́mkɔ̀ gɑ: Pú gɔ la' yɔ pa' wap gɔ ko nə hwitə̀ a lə! Bɑ fa' tsyə lě nəŋ da' bəmtə́ tə́ fɑ nə cwə nə nyaptə dzʉ̌,

⁴nə pa' pu gɔm nə tyɛ' sɔmbʉə gɑ: Si lə hwìtə nə guŋ fà' tsyə awɛ nə batə tyɛ' sɔmbʉə.

⁵Biŋ ŋkwi' bɑ gɔm nthʉm ŋwa'nyə yɔk pɑ gɑ: Bi a wap la' ŋkho nə hwitə a lə.

⁶Pɔ pyə wap lə ləŋdzə ju' ghɔm Si a lě tə ko nə hwitə bɔ, shyə m nə tʉɔthə́ yap. Da' gɑ bi a pɑ shɑ pɔ piŋ ŋkho nə.

⁷A ywə yə a gə tə Si piŋ jap mu' tyɛ'dzʉ khe gɑ tyɛ' ɔ, gɔm nthʉm ŋwa'nyə David yə pɑ ji gɔm a gɑ: A pɑ tyɛ' ɔ po yu' gi é, ka po sɔk mtʉm mɔ́.

⁸Nə pa' a pɑ gɑ Yoswa lə ghə̌ gɑ pɑ́ hwitə, bɑ e latə́ gɔm a pɑ́ mu' tyɛ'dzʉ́ dyɛ' pɑ̀.

⁹Hwitə́ tyɛ' Sabat bɑ pu yap yá bi pɔ̀ Si.

¹⁰Nə pa' mo yə ě ko nə hwitə̀ é a, bɑ ba yʉ́ yə́ to' nə hwitə̀ nə mfa' myə́ dəŋdəŋ pa' Si lə hwitə̀ nə myə a.

¹¹Pɑ lo'nyə́ nə ko nə hwitə bɔ tə̌ fo' tʉɔthə́ kɑ ghə̌ sɔmmo vʉ́ nə mhɔ.

¹²Ghɔm Si bɑ ǎ cwə nthʉɔ, gʉ̌' pɑ nə́, bɑ a pìŋ shɔk tə shyə guŋ mnyə mcɔk bʉə awɛ. A ŋkhonyə tə gap lam mo pu zhwenyə e, gap zhəŋ kwé pu mhə̌m. A fyɛ' ywə yə mo ju' nthʉm tʉm e biŋ ŋkwɛnyə a.

¹³A tə́ shyə tə yɔ sɔmywə yə Si lə pə̌m a pɑ́; guŋ ywə awɛ bɑ nə mnyə myə́ bɑ pɑ sòsò, mnyə myə́ pɑ nthɔm guŋ ywə awɛ. Pɑ gɔ sɔ yap guŋ mɔk pɑ mnwə awɛ pɑ́ dzə̌ é.

¹⁴Pa' a bɑ pɑ̌ ghə ŋkhamsi gwyə, bɑ e lə ntwɔk nə mkɛbəŋ, Yeso, Mu Si a, pɑ tɔ́m piŋnthʉm yɔk pɑ pɑpuŋ.

¹⁵Pɑ tə bɑ pɑ̌ ghə ŋkhamsi gwyə yə e tə́ bɑ e ka ku' nə zhyə pwa yɔk pɑ a pɑ. Pu lə lə̌ŋtə́ e nə guŋ mghə́ŋ awɛ pa' wɔk pɑ a, da' gɑ́ la' e hɔnwə̀.

¹⁶Pɑ cəŋtə gɔ pɑ mdzə tə pwɔk bəŋ leŋ fo gho', po'o tə gə cɔmmtso biŋ sɔ' jɔ gho' gɑ cwə ku' pɑ ghə kwitə̀.