Read Ghomala New Testament EBRAIKA 6 Bible Online

EBRAIKA 6 - Ghomala New Testament bible

EBRAIKA 6

¹Pa' ɑ̌ po' a pɑ fɛnə dé m nə zhi'nwə mghətsó, nthak zhi'nwə po mkəcɔk po nə Kristo nə́ŋ. Pɑ tə gɔ tə́ piŋ zhi cyə ghɔm pɑ, yəŋ la'tə gɑ nə tak mfa' cwəpuŋ nəŋ biŋ Si,

²nə zhi'tə nwə nə kwǐshyə ba nə nə́ yapbǔ nə mo, nə siŋ nə nə́ yam nə vʉ̌ ba nə jʉɔjʉm fyɛ'.

³A ywə yə pɑ̌ gɔ ghə bi a pɑ́ gɑ Si piŋ a.

⁴Pɔ pyə wap lě ŋkwi ŋkha' biŋ jwi'tə ywə pɑpuŋ yə a fɑ m kɛbəŋ a, pɔ pyə wap lě ŋkwi Zhwenyə Dɔlɔ̌

⁵jwi'tə ghɔm pɑpúŋ Si ba gùŋ yə a wə sɔ' a,

⁶da' gɑ biŋ bvʉ́tə si a, pɑ wap lə piŋ bʉɔtʉm tsap jyə́ pɑ́. Wap dɑ mfa' map biŋ jap Mú Si bɛnyəpɛnyə gə pu pɑ shap e.

⁷Cwə yə ta' tsʉ' ca' nwə shyə bəŋ yə a du nə e biŋ sa' mghe myə a ŋkwitə pɔ pyə wap dzʉ' tsʉ' ca' bɔ, e ŋkwi ba yə byanyə bi Si.

⁸Da' gɑ a pɑ́ sa' pɑ mka'tə́ pu a jǔŋ, bɑ pu gɔ yɔ gɑ e ka kwitə, nyəŋ do nə e nə miŋ to e mɔk.

⁹Tɑ́ ba tə pa' pyə wə gɔm po' a, wɔ pɔ ŋkhuŋnyə pɑpúŋ, pyə wə jyə gɑ pǒ bɑ m̀ nə ghəŋ pɑpuŋ bɑ m̀ nə ghə̌ŋ ywə vɔk.

¹⁰Si bɑ pɑ̀ dəŋdəŋ; pɑ e lə tʉɔnyə fa' tsɔ ba ŋkhuŋnyə yə po lə la'tə nə tso tsyə nə pa' po lə nə biŋ nə fa' nə pɔ dɔlɔ̌ tə̀ tyɛ̌' ba m cwəlɔ a.

¹¹Da' gɑ yɔk ywə yə pyə̌ shəŋ a wə bɑ gɑ́ bǎ ya mo lə nə po ghə pɑ nthi gʉ̌' bɔ nə nə nthɔm yə mɔktə, gɑ e kaktʉɔ tə sɔ' miŋ.

¹²Po kɑ lɑ gʉ' yɔ biŋ m̀ jʉ̀m, po lɑ fo' nə pɔ pyə wap shyə m nə piŋnthʉm pu a kaktʉɔ ŋkwi mcʉ' ywə yə Si ŋkha'nyə a.

¹³Cwə yə Si lə hɑ mka'nyə bi Abraham a, sɔmmo yə e cyə e tə bi a pɑ́ e lɑ e ŋkhɔ mkɔ a lə pɑwə; a pɑ po' e kɔmkɔ pɑ kwa nə thə nɑ́ é,

¹⁴biŋ gɔm gɑ: Əŋ gɑ gɔ nyəŋ byanyə nə o hɑ dù gwya bu.

¹⁵Pa' Abraham lə kaktʉɔ a, e lě jɔ mka'nyə bɔ a pəmtə.

¹⁶Pɔmnəŋ dɑ pɔ pyə wap cyə́ wap a nə ŋkhɔmkɔ, bɑ dɑ ywə nthʉcwyə nə mka'nyə bwɔk fəŋnyə̀.

¹⁷A po'o tə Si pɑ shəŋ nə la'tə bi pɔ pyə́ e hɑ mka'nyə bi pu a gɑ a tə gɔ kwyəpnyə́ pɑ, ŋkhɔ mkɔ nə.

¹⁸A mnwə məbʉə myə pɑ a lə kwyəpnyə, mnwə myə pɑ cwanwə lə pɑ nə bi Si a, mnwə bɔ hɑ kaktʉɔ nthʉɔtʉɔ bi pɑ̀ pyə a bɑ pɑ lě gwa' guŋ pǒtsə awɛ nthɔm mɔktə yə pu lə ka' bi pɑ a.

¹⁹Mɔktə bɑ bi pɑ bɑ pa' gwɔ' nə shəŋ kənu' dəm shyə nə vɔk yɔ pɑ. Mɔktə bɔ bɑ pɑ a le kwyəpnyə, bɑ ǎ lɛtə́ bɑ nthwɔk dəŋdzə lɔm dzə nə sam dyə Si kɛbəŋ gɔ tə kho nə tsʉ' dɔlɔ̌ nthʉm dyə.

²⁰A bɑ tsʉ' yə Yeso lə ləŋdzə nə pɑ ŋkhonə bi pɑ a, nə pa' e lə cʉ̌ ŋkhamsi gwyə mama nə yə nthi Mɛlkisedek.