Read Ghomala New Testament EBRAIKA 7 Bible Online

EBRAIKA 7 - Ghomala New Testament bible

EBRAIKA 7

¹Yəŋ Mɛlkisedek, fo Salem, ŋkhamsi Si tə thə́ kɛbəŋ, lə ghɔ̌ pu Abraham yu'tə nə cwə yə́ e lə pɑ̌ fɑ m̀ nə lo' shù nə mfo a, e nyə́ŋ byanyə nə é.

²Abraham lə́ hɑ ta' jyə nə tsə́ tsyə́ dəŋdəŋ jyə gham bi e. Tsǒ Mɛlkisedek nthútə gɑ́ Fo dəŋdəŋ. E piŋ bɑ fo Salem, a pɑ́ da'tə gɑ fo hwitə̀.

³Yʉ́ yə a tə bɑ ě ghə ta, e le ghə ma, e lə ghə ŋkhənyə̀, bɑ mtyɛ' dzʉ myə ka ghə tsʉ' yə a ntho' nə a, vɔk e lə nəŋ gə dhə e, da' gɑ́ e bɑ pa' Mú Si a, bɑ ŋkhamsi mama.

⁴Po yɔ dəŋ pa' mo bɔ bɑ ě ghu', mo bɔ yə Abraham hɑ ywə ta' jyə nə dəŋdəŋ jyə gham nə tsə tsyə́ tsyə̀ pɑpuŋ bi a, e bɑ tá gɑ̌jʉ' nə ŋkhənyə.

⁵A nəŋ nə pɑ̌ po'o, pǒ Levi pyə wap bɑ pɑ nuŋpwɔ' a pɑ̀ bɑ mco' yap gɑ wap gɔ pɑ kwi ta' jyə nə dəŋdəŋ jyə gham bi pɔmnəŋ, yəŋ la'tə̀ gɑ bi mfɑ́ pap pyə́ wap bɑ gwya Abraham a.

⁶Da' gɑ yʉ yə e tə bɑ nə gwya yap a pɑ́ lě ŋkwi ta' jyə nə dəŋdəŋ jyə ghǎm bi Abraham biŋ nyəŋ byanyə nə mo yə mka'nyə bɑ myə́ a.

⁷Pɑ sɔmmo lə nəŋ nthédʉ' gɑ́ gətso nə nyəŋ byanyə nə́ mo ŋkhò.

⁸A piŋ bɑ tsɔ'ɔ pɑ kwi' ta' jyə nə dəŋdəŋ jyə ghǎm pɑ pɔ pfʉ́pfʉ̌, da' gɑ ye mo bɔ pɑ̀ mo yə e bɑ́ pɑwə a.

⁹Nə ghɔm awɛ piŋ bɑ́ gɑ́ a bɑ ǎ cyə m̀ nə Abraham, ba Levi yə e ŋkwi ta' jyə nə dəŋdəŋ jyə gham a pɑ bɑ pu lě ŋkwi bi e yə́.

¹⁰Nə pa' e lə jɑ nthʉm vʉ' ta gɑ̌jʉ' e tə wap pú Mɛlkisedek yu'tə.

¹¹Pu lə pe' shyə m nə nə́ pɑ khamsi pɑ Levi gə nwə pəmtə́, nə pa' yə bɔ nthi nə pɑ khamsi nə lə bɑ kuŋ mco' pɑ Israɛl, bɑ pu lě biŋ gɔ shəŋ mu' ŋkhamsi nə ŋkhənyə Mɛlkisedek m gɑ́ kɑ tə cwɔ' e m̀ nə gwya Aaron?

¹²Nə pa' nə kwyəpnyə nthi nə nuŋpwɔ' ŋkwyəpnyə mco'.

¹³Mo yə pu nəŋ bɑwə gɔm e nthʉm ŋwa'nyə yəŋ a pɑ mo nə tuŋdyə yə pu la m shwɔ' nuŋpwɔ' nə a.

¹⁴A nəŋ bɑ bɑ́ pu zhyə gɑ Cyəpɔ yɔk pɑ nthəm nə ŋkhənyə Yuda, ŋkhənyə yə a bɑ Mosɛ ka ghɔm sɔm nwə nə́ nthʉ́m ŋwa'nyə mco' nə mkamsi a.

¹⁵Pu nəŋ shəŋtə bɑwə jɔ gɑ́ yə bɔ ŋkhamsi wə hwə́ Mɛlkisedek.

¹⁶E lə nəŋ bɑ ŋkhamsi po'o m nə mco' ŋkhədyə pɑ́, e pɑ ŋkhamsi m pa' vɔk e bɑ mama a.

¹⁷Pu gɔm nə e gɑ: O bɑ ŋkhamsi mama m̀ nə yə nthi Mɛlkisedek.

¹⁸A bɑ tsɔ'ɔ po'o bɑ pu wa' dzə mco' nə pa' a ka kwitə nə sɔmywə

¹⁹nə kɑlə mco' ka ghə sɔm nwə pəmtə̀, biŋ jap mu' mɔktə yə pɑpúŋ yə a dɑ wɔk pɑ gɔ bəŋ Si a.

²⁰A biŋ bɑ́ bɑ Si lě ŋkhɔ mkɔ nə. Pyə shɑ pɔ bɑ wap lě bɑ mkamsi tə mkɔ nə.

²¹Da' gɑ Yeso bɑ e nə pɑ ŋkamsi mkɔ ŋkhɔkɔ pɑ nə pa' Si lə ghɔm bi e gɑ: Cyəpɔ lě ŋkhɔ mkɔ nə́, la' e pɑ gɔ la'tə piŋ pɑnyə nə pɑ ŋkhɔmkɔ gɔm gɑ: O bɑ ŋkhamsi mama.

²²A shyə m po'o tə Yeso pɑ bɑ ě zhi cwyə nə kɔ pɑpuŋ.

²³A piŋ nə pɑ̌ po'o bɑ pyə shɑ pɔ lə pɑ̌ mkamsi tə́ jɔm, nə pa' vʉ̌ lə ŋkhɔ gɑ́ wap kə cwə mama.

²⁴Da' gɑ yʉ, pa' e bɑ mama a, e bɑ ŋkhamsi yə nə nuŋpwɔ' bɑ da' yə́ a.

²⁵A po'o tə a bɑ ě ku' nə vɔk pɔ pyə wap shyə m nə é gɔ bəŋ Si a mama, nə pa' e bɑ pɑ́wə mama nə pɑ shwyɛ'nyə Si nə pu.

²⁶Yə̌ŋ biŋ bɑ kwa' pa' ŋkhamsi gwyə yə a lə bɑ shəŋ bi pɑ a bɑ a: Bɑ dɔlɔ̌, bɑ tə́ bya, bɑ ě təm nə mhɔ, bɑ pu kwɔ' e tə dəm kɛbəŋ.

²⁷E tə́ nuŋpwɔ' guŋ mtyɛ' awɛ pa' pyə shɑ̀ mkamsi gwyə a pɑ. E lə pɑ nuŋpwo dəŋdzə kwa' nə mhɔ myə, biŋ bɔtə nə myə pɔmnəŋ pɑ. A bɑ e lě da' gə ya bɔ ŋkwi cʉ̌m, dɑ kwa' thə́ nɑ e nə gə.

²⁸Mco' jap pɔ wap pɑ́ mkamsi gwyəgwyə, da' gɑ la' wap pɑ tə bya. Tə ghɔm kɔmkɔ tsyə a nthəm m jʉ̀m mco' a jap ta' Mú yə e gə guŋ ywə awɛ pəmtə mama a.