Read Ghomala New Testament EBRAIKA 9 Bible Online

EBRAIKA 9 - Ghomala New Testament bible

EBRAIKA 9

¹Də̀ŋdzə̀ kɔ lə bɑ ě ghə ŋkhɛ nə sé Si ba dyəsi dəmca'.

²Nə pa' a lə bɑ pu lě ŋkwɑ nthap, dəŋdzə nthap, pu pɑ̀ ŋkhe gɑ́ Dɔlɔ̌, tsʉ' yə kwɔ' lambu pu tɑpe ba msɛ̌ nə nuŋpwɔ' lə bɑ nə a.

³Mu' nthap lə biŋ bɑ jʉ̌m batə dzə nə sam yɑpʉə pu ke gɑ Dɔlɔ̌ m dɔlɔ̌.

⁴Tsʉ' nə ntho phə̀ damnyəlamnyə lɑ bɑ tsʉ̌' bɑ pu lə tʉɔ gɔl nə gə, biŋ gə ŋkwɔp kɔ, bɑ pu lə gɔl nə sam awɛ; mu' kɔp gɔl lə bɑ nthʉm o, mana pɑ́ nthʉm o, ba pəŋ Aaron bɑ a lě gə mtutuŋ, biŋ gə mbak mghwɔ' myə a lə bɑ pu və ghɔm kɔ nə a.

⁵Pɑ kerubɛn ghu'tə lə bɑ dəm ŋkwɔp bɔ, bɑwə dɑ cyəŋnyə yap nə pfɔptə tsʉ' nuŋpwɔ' nə mhɔnwə. Da' gɑ yəŋ tə tsʉ' nə gɔmnwə nə guŋ e awɛ pɑ́.

⁶Pú jap guŋ e awɛ po'o, mkamsi pɑ̀ nə fa' fa' tsap, ŋkho nə də́ŋdzə̀ nthap guŋ mcwə awɛ.

⁷Da' gɑ nə batə nthap yɑpʉə, da' ŋkhamsi gwyə nə pɑ ŋkho nthʉm o nə ta' cʉ̌m nə ta' gu'dzʉ̌, biŋ nə kǒ nə po'o bɑ ě nuŋpwɔ' mcyə́ nə mhɔ myə́ ba nə myə́ pɔmnəŋ.

⁸Zhwenyə dɔlɔ̌ shəŋ po'o nə la'tə gɑ məjyə́ tsʉ' cwyəp jɑtə wuŋ gyɛ', nə cwə yə dəŋdzə́ nthap yɑ̌ pɑwə́ a.

⁹A bɑ̀ mtiŋ nə yəŋ gɑ cwə dzʉ̌: Pu hɑ ywə́ biŋ nuŋpwɔ' tsʉ'u, da' gɑ́ bɑ a ka ku'nyə nə ghə gɑ tʉ̌m mo yə e fá' tsɔ fà' a pɑ tə bya.

¹⁰A bɑ pɑ nə nwə ywətsʉ, pu a mlu', bɑ nə nthinthi nə sɔ̀k mo a, a bɑ pɑ́ mfa' monəŋthə́, mfa' myə pu jap po'o tə ghɔ kəm nə́ cwə nə biŋ jap ŋkhɛ̀ a.

¹¹Da' gɑ́ Kristo lě sɔ' bɑ ŋkhamsi gwyə́ nə tsə́ pɑpuŋ myə a bɑ a tsə sɔ' a. E bɑ ě ko nthap bɑ a piŋ gu' biŋ bɑ dɔlɔ̌, nthap yə tə pɔmnəŋ nə ŋkhwɑ a pɑ, yəŋ la'tə gɑ nthap yə a tə bɑ yəŋ dzʉ a pɑ.

¹²Cwə yə Kristo ŋkho nthap dɔlɔ m dɔlɔ̌ ŋkwi cʉ̌m nə miŋ a, e lɑ hɑ mcyə mpɔp kɑ mcyə po mna' lə. E hɑ pɑ kwa' mcyə myə́, biŋ hɑ po' o nə nthé wɔk pɑ dyə mkwɔ mhɔ ŋkwi cʉ̌m.

¹³Mcyə mpɔp dzə ba mpɔp mna' ba mvə jwi na' nthoto myə pu sɛ nə pɔ pyə wap bɑ wap ka lɔ a shu' wap pɑ nə mviŋ jum dzʉ̌.

¹⁴Bi a nəŋ bɑ po'o bɑ mcʉ̌m sʉ'ʉ nə mcyə Kristo nə nə cu' wɔp pɑ̀? A lě shyə m̀ nə zhwenyə mama, e hɑ nɑ é bi Si pa' tsə pwɔ' dɔlɔ̌ a. Mcyə myə gɔ sɔk tʉm tsɔk pɑ nə mfa' cwəpuŋ, po'o gɑ pɑ pɑ fa' bi Si nthʉɔtʉɔ.

¹⁵A po'o tə e bɑ́ giŋkam kɔ sə́, mtɔk vʉ́ sə; vʉ́ e bɑ nə nə cyə m̀ nə dɑ hɔnwə myə a lə pɑ̌ nə dəŋdzə kɔ a nə shwyɛ' pɔ, po'o gɑ pɔ pyə pu ké wap a tsʉ mcʉ' mama myə pu lə ka'nyə a.

¹⁶Nə pa' nə tɔkvʉ̌ pɑ si, bɑ a shəŋ gɑ pu yɔ vʉ́ nthɔkvʉ̌.

¹⁷Nə tɔkvʉ̌ nəŋ nə pəmtə bɑ nthɔkvʉ̌ pfʉ́; cwə yə nthɔkvʉ̌ jɑ tə wuŋ pfʉ́ a, mtɔkvʉ́ lə wuŋ bɑ ywə.

¹⁸A po'o tə pu la tə cyətə lɑ pɑ mcyə tə́ nə nthʉ də̀ŋdzə̀ kɔ pɑ.

¹⁹Mosɛ lə ləŋdzə hɑ guŋ mco' awɛ bi pɔmnəŋ pa' Si lə bɑ e nə jap a. E lə pǐŋ dɑ mcyə po mna' ba myə mpop dzə́, ba shyə, nɔk nə ŋwa'nyə mco' pu a pɔmnəŋ shyə́ m nə cɛ̌ izopə pu mnəŋ jʉjʉ pəpɛ.

²⁰Bɑ gɔm gɑ: Mɔ gɑ bɑ́ mcyə́ kɔ tsyə́ Si jap nə po a.

²¹E lə pǐŋ dɑ mcyə bɔ shi' nthap ba guŋ tsə nə nuŋpwɔ'.

²²Nə pa' mco' gɔm gɑ́ pu dɑ pɑ́ mcyə tə́ nə shu' guŋ ywə awɛ, nə pa mcyə pɑ̀ tə pfyə bɑ nə lɑ mhɔ shwyɛ' mo tə bɑ wə pɑ̀.

²³Nə pa' pu ghə po'o nə shu' cyə̀ŋnyə̀ ywə yə ǎ kɛbəŋ a, bɑ nə cu' kwa' ywə yə ǎ kɛbəŋ gɔ cəŋ kwa' pwɔ' tsyə ǎ cəŋtə buŋ a.

²⁴Kristo tə ŋkho m̀ cwyəp tsyə a bɑ pɑ́ fa' bú monəŋ, bɑ fo' tsyə nyənyɔ a pɑ́. Kristo ŋkho m̀ kɛbə̀ŋ po'o gɑ e ŋwak dzə Si cwəlɔ bi pɑ̀.

²⁵La' e pɑ gɔ hɑ nɑ é mcʉ̀mmcʉ̌m pa' ŋkhamsi gwyə́ ŋkho cwyəp gùŋ mgu' awɛ pu a mcyə́ dyɛ' a pɑ́.

²⁶A lə pe' bɑ po'o bɑ e lə́ gɔ yɔgo' mcʉmmcʉ̌m tə fɑ nə cwə nə́ nyaptə dzʉ̌. Da' gɑ a bɑ e lě gə po'o ŋkwi cʉ̌m, nə cwə jʉ̀m, po'o gɑ yə nə lɑ kwa' thə nɑ e nuŋpwɔ' vɑnyə mhɔnwə.

²⁷A piŋ bɑ po'o, ywə yə a bɑwə byap pɔmnəŋ a pɑ nə pfʉ ŋkwi cʉ̌m, a piŋ nə təm jʉ̀m o bɑ nə fyɛ' a.

²⁸A po'o tə Kristo bɑ é lě hɑ nɑ e ŋkwi cʉ̌m nə nə nthe mhɔnwə pɔ jɔmyɔ̌m, e piŋ bɑ gɔ la' piŋ tə́m batə mcʉ̌m bʉ́ə, tə a lə piŋ bɑ́ nə nwə mhɔ pɑ, ŋwak bi pɔ pyə́ wap byap é nə ywə vɔk a.