Read Ghomala New Testament YAKOP 1 Bible Online

YAKOP 1 - Ghomala New Testament bible

YAKOP 1

¹Myə Yakop, gɛfa' Si pu Cyəpɔ Yeso Kristo bi mtuŋdyə́ shwɔppʉə mgham myə a bɑ a lě sa dzʉdzʉ̌ a: Gɑ̌ ca'tə.

²Mfɑ̌mfɑ́, po lə kwa' tʉm pɑpuŋ tə́ nə ŋkwi guŋ go' awɛ yə pǒ wə shyə́ m̀ nə a.

³Po zhyə́ gɑ́ mləŋtə myə ǎ wə sɔ' nə piŋnthʉm yɔ a gɔ hɑ nə kyəptʉ̌m bi po.

⁴Da' gɑ nə kyəptʉ̌m bɔ ghə po pɑ́ pɔ dɔlɔ̌, pɔ bɑ wap pə̀mtə, pɔ tə bya.

⁵A pɑ gɑ́ fʉ̌ yak bi mo nə po, e lo bi Si yə e hɑ bi mo pɑ́ pɔpɔ, hɑ tə cɔk a. Si gɔ hɑ bi e.

⁶Da' gɑ e lɑ piŋnthʉm dó, dó tə zhʉ'nyə̀; nə pa' mo yə e jʉ'nyə́ a hwə pa' shyə lɑpʉə yə fəfa ŋkwa mɛnyə a.

⁷Mo bɔ kɑ kwɛ gɑ́ pɑ Cyəpɔ hɑ sɔmywə

⁸bi mo yə tʉ́m tsyə bɑ ǎ ghaptə̀, la' a pɑ shwə ŋkwi tsʉ' nə ghìŋ tsyə́ a.

⁹A fɑ́ yə e bɑ bə́ŋ a ŋwɛnyə́ pa' pu pʉ' é a.

¹⁰Yə mo yə́ e gɛ ywə á ŋwɛnyə pa' pu fi' e hɑ si, nə pa' e gɔ sɔ' cyə pa' tutuŋ mghe a.

¹¹Nə pa' nǎm sa', nthyə́, gə mghě yə́m, mtutuŋ myə vʉ yə nə ləŋnyə mǐ. A dəŋdəŋ po'o tə́ gɛ ywə gɔ sɔ' ponyə nə mfa' myə́ awɛ.

¹²Bùŋtsě bɑ mo yə ě sɔ̀k nə mləŋtə a, nə pa' mləŋtə gɔ cwə́ tə́ mi, e kwi co' fo vɔk yə Si bɑ ě ka'nyə bi pɔ pyə́ wap ŋkhuŋ e a.

¹³Mləŋtə ko nə mo e kɑ́ ghɔm gɑ: Mləŋtə mə̌ fɑ bi Si. Nə pa' pɑ́ Si lə sɛ́ nə́ ghə nwə cwəpuŋ, e lə nəŋ bɑ dəŋtə́ mo.

¹⁴Mləŋtə nə sɔ' bǎ nə wɑ̌lə́ fɑ pɑ nə ghi'nyə yə a fəŋtə e, fʉtə́ e a.

¹⁵Mləŋtə bɑ tsʉ̀m dzə́ mhɔnwə̀, mhɔnwə̀ kwyə, ji vʉ́.

¹⁶Mfɑ pɑ̌ pyə gɑ̌ ŋkhuŋ wɔ te' a, ka po fʉtə nɑ tsɔ:

¹⁷Guŋ ywə pɑpuŋ yə a sɔ' bi mo a, guŋ mcwɔ'fa' pɑpuŋ fɑ m̀ thə́ kɛbə̀ŋ, bi Si, Tá ŋkha' yə e tə́ fɛnyə pɑ́, e lə pɑ gnaknyə, nə kwyəpnyə lə nəŋ bɑ nə e a.

¹⁸E lə̌ shyə m nə yə nə́ kuŋ, nə ghɔm nyənyɔ, dzə́ wɔk pɑ̀, po'o gɑ pɑ pɑ́ mlə́ŋdzə̀ nə ywə yə e lə nyaptə a.

¹⁹Wɔ mfɑ́ pɑ̌ pyə́ gɑ̌ ŋkhuŋ wɔ te' a, pǒ bɑ pɑ zhyə́. Da' gɑ́ ka mo lo'nyə ju'nwə̀, e kɑ lo'nyə gɔmnwə, e kɑ lo'nyə jɛlúŋ.

²⁰Nə pa' yɛ̌lúŋ monəŋthə́ tɑ́ gə nwə dəŋdəŋ yə a bɑ̀ yə́ Si a pɑ̀.

²¹Po'o lə́ po te mviŋ ba cwəpuŋ nə po; po lɑ hwitə tə ŋkwi ghɔm tsyə a bɑ pu tsə̀ nə po á, a pɑ́ bɑ ǎ ku' nə vɔk vɔ̀k yɔ a.

²²Po pɑ̀ pɔ pyə wap fa' pa' ghɔ̌m gɔm a, po kɑ́ pɑ̀ da' pɔ pyə wap ju' da' nə yu', bɑ fʉtə nɑ tsap a.

²³Nə pa' mo yu' ghɔ̀m, bɑ tə ghə pa' a gɔm a bɑ e hwənyə mo yə e de sə é pa' e nə bɑ a nə kyɛ' a.

²⁴E jɔ sə́ e, da' gɑ́ shwə tə gɔ̌, guŋ dʉɔnyə pa' e bɑwə shʉ́ a.

²⁵Da' gɑ mo yə ě yu' kwa' mco' pɑpuŋ, mco' myə a tə dɑ mo gə ŋkwɔ a pɑ́, ju' gìŋ nə, e lə ghə m̀ pa' mo yə e nə yu' e lə pɑwə ju' a, ju' gə pa' a gɔm a, mo bɔ gɔ sɔ' yɔ nwə pɑpuŋ nə fa' tsyə́.

²⁶Mo sɛ gɑ́ e bɑ́ biŋ Si da' gɑ la' e pɑ nthɔm tʉm e nə ghɔm, bɑ e futə pɑ́ thə nɑ é, yə nə piŋ lɑ pɑ sɔmywə.

²⁷Nə piŋ dɔlɔ̌, tə sɔm pap mviŋ dzə̌ Si Tá; yə bɔ nthi bɑ nə pɑ dé pó mcyə́ pu a m mpfɔ̌k nthʉm ghəghʉɔ; bɑ bɔmtə́ nɑ e nə dzʉ̌ gɑ́ a kɑ viŋ é.