Read Ghomala New Testament YAKOP 2 Bible Online

YAKOP 2 - Ghomala New Testament bible

YAKOP 2

¹Mfɑ pɑ, ka po ŋi'nyə ŋkhyɛ'nyə̀ nə piŋnthʉm yɔ nə Cyəpɔ gu'ghǔ' yɔk pɑ Yeso Kristo.

²Nə pa' mo ko dyə́ cu'tə po bɑ ě sù mkwɛ́ tʉɔ gɔl, ŋkwa dzə dəŋnyələŋnyə, mu' mo piŋ ŋkho yə bɑ bəŋ, bɑ e kwa mcakmcàk dzə;

³po yɔ pɑ mo yə e ŋkwa dzə pɑpuŋ a gɔm bi e gɑ: Wə, cwə nə tsʉ' pɑpuŋ yə̌ŋ, biŋ gɔm bi bə̌ŋ gɑ: Wə tiŋnyə thə́, kə m gɑ: Cwə si tsi' i to kwɔ' a,

⁴bɑ po ka ghə ŋkhyɛ'nyə nə po a? Bɑ po ka cʉ' pɑ ya'shɛ́ pyə a bɑ wap ghə zhwényə pɑ zhwə́ pɔ a pɑ a?

⁵Wɔ mfɑ pɑ̌ pyə gɑ̌ ŋkhùŋ wɔ te' a, po yu'! Tə́ Si nə shwɔ' pɔ pyə wap bɑ̀ m pə́ŋ nə mnyə́ dzʉ́ a, dɑ wap gə mghɛ fʉ' nə piŋnthʉ́m, wap sɔ' dzʉ́ mcʉ' Nəfo yə a bɑ e lě ŋkha'nyə bi pɔ pyə wap ŋkhúŋ e a pɑ a?

⁶Pǒ bɑ pǒ té dəŋ nə bə̌ŋ. Tə́ mghɛ fʉ' nə dɑ wɔ jɔgo' a? Tə wap nə dɑ wɔ gɔ dyə fyɛ' a?

⁷Tə wap nə jəmtə tso pɑpuŋ tsyə pu ŋkhe nə po a pɑ a?

⁸Əŋ, po pɑ giŋ nə fo mco' myə á bɑ pu və gɑ: O gɔ pɑ kuŋ mo yə e bəŋ o a pa' o ŋkhúŋ thə nɑ o a, bɑ pǒ gə kwa' pɑpúŋ.

⁹Da' gɑ́ po pɑ mghɛ ŋkhyɛ'nyə bɑ pǒ hɔ, bɑ pɑ hɔ mco'.

¹⁰Nə pa' o ghiŋ nə mco' awɛ tə bɔptə bɑ da' mu cwɔ̀' nə́, bɑ a bɑ ǒ hɔ guŋ mco' awɛ.

¹¹Nə pa' mo yə e lə ghɔm gɑ kɑ ghə ghap a, lə pǐŋ gɔm ba m gɑ kɑ zhwə mo. Bi a o pɑ tə ghə ghap tə jwə mo bɑ á bɑ ǒ hɔ mco'.

¹²Po ghɔm biŋ gə pɑ pa' pɔ pyə mco' myə a tə dɑ mo gə ŋkwɔ a pɑ́ nə gɔ sɔ' sa' wap a.

¹³Nə pa' fyɛ' tə́ shɔmmtso mo yə e tə́ shɔmmtso a pɑ. Da' gɑ cɔ̌mmtso tə ŋkhuŋ fyɛ' pɑ.

¹⁴Mfɑ pɑ, pɑ mo ghɔm gɑ́ ě ghə piŋnthʉm tə ghə mfa' a? Pɑ piŋnthʉm vɔk mo cwə bɔ a?

¹⁵A po'o bi a ta' fɑ yə mbɛ kɑ yə mjwǐ lə pɑ bɑ wap ka ghə ywə yə wap gɔ kwa á kɑ yə wap gɔ tsʉ́ nə guŋ mcwə awɛ a lə,

¹⁶mu' mo nə po piŋ gɔm bi pu gɑ: Po ghɔ nə hwitə̀, tsʉ' ləmnyə bi po, a cyə shwə po; gɔm po' tə hɑ sɔmywə nə bvɔk bi pu bɑ ǎ kwitə m kɑ?

¹⁷A dəŋdəŋ po'o tə pǐŋntʉm yə a tə bɑ ǎ ghə mfa' myə a pɑ̀ bɑ piŋnthʉm bɑ ǎ pfʉ́ tə mǐ.

¹⁸Da' gɑ mo gɔ sɔ' ghɔm gɑ: Ǒ ghə piŋnthʉm, ba myə̀, biŋ gə mfa'; la'tə a piŋnthʉm o tə mfa', kwa' myə cyə m̀ nə mfa' da'tə o piŋnthʉm a.

¹⁹O biŋ gɑ Si bɑ pɑ́ yɑmu', bɑ gə pɑpuŋ. Ba mzhwenyə cwəpuŋ biŋ yap po'o, tə bɑ sə́ŋ.

²⁰Gɛ ghəghʉɔ, tə́ pɑ́ o zhyə gɑ piŋnthʉm tə bɑ sɔmywə a tə mfa' lə?

²¹Tə mfa' nə lə gə tə tá yɔk pɑ Abraham pɑ́ dəŋdəŋ a? Nə pa' e lə́ yap mú e Isak dəm tuŋmɔk tsə pwɔ.

²²O wə jɔ gɑ́ piŋnthʉm pu a mfa' nə lə bəmtə́ fǎ', mfa' pɑ shu'nyə piŋnthʉm.

²³A pɑ po'o ywə yə pu lə və a bəmtə́ gɑ: Abraham lə ghə piŋnthʉm nə Si, e sɛ bi e pa' nwə dəŋdəŋ a, e piŋ biŋ tso so Si.

²⁴Pǒ yɔ gɑ mo bɑ dəŋdəŋ shyə pɑ m̀ nə mfa' myə́, e lə cyə́ pɑ da' nə piŋnthʉm e.

²⁵Ba yə nə nə pɑ Rahab, mjwǐ kathə́ lə ŋkwi' bɑ pɑ po'o. E lə shyə pɑ nə mfa' tə bɑ́ dəŋdəŋ. Nə pa' e lə nyə́ŋ mghɛ nthəm dyə́ biŋ gə wap cyə́ m̀ nə́ mu' məjyə gɔ̌.

²⁶Nə pa' dəŋdəŋ pa' nɑ́ tə zhwenyə bɑ́ bɑ́ a pfʉ́ a, a dəŋdəŋ pa' piŋnthʉm tə mfa' bɑ ǎ pfʉ́ a.