Read Ghomala New Testament YAKOP 3 Bible Online

YAKOP 3 - Ghomala New Testament bible

YAKOP 3

¹Mfɑ pɑ, ka guŋ yɔ awɛ pɑ́ pɑ́ pɑ la'tə. Pǒ zhyə́ nthi cɔk yə pu gɔ sɔ' nə fyɛ' wɔk pɑ á nə nthi pa' guŋ yɔk pɑ awɛ nə nthya a.

²Mo pɑ tə cwɔ' kwə̀ e nə cwə yə e gɔmnwə á, bɑ e bɑ kwa' mo dɔlɔ̌, bɑ ě ku'nyə nə tɔm guŋ nɑ e awɛ.

³A bi a pɑ nyəŋ tʉ̌ɔ mshwə̌ mnɔmlěŋ nə gə gɑ wap yu'nyə wɔk pɑ̀, bɑ pɑ dɑ guŋ nɑ tsap awɛ gɔ nə məjyə́ yə pɑ̌ kuŋ a.

⁴Po yɔ ba mkənu', e ghu' pɑ gɑ kɑ lə́, ba fəfa yə a nthə e dəm shyə a pɑ shɔk pɑ gɑ kɑlə́, bɑ mo yə e shya kənu' bɔ a dɑ pɑ mu pak tʉ́ɔ nə shyɑ e nə məjyə yə e dɑ m̀ nə a.

⁵Ba dəŋdəŋ po'o tʉ̌m mo bɑ pɑ mu kam nə zhəŋ nɑ mo, tə bɑ ŋkha'tə nə mɑ mnwə te'. Mɔk yə a ŋkhə mɑ vǒ a tə bɑ sak pɑ.

⁶Ba tʉ̌m mo bɑ mɔk, dzʉ nwə cwəpuŋ; tʉ̌m bɑ cəcɑ́ mkam nɑ mɔk pɑ, bɑ bviŋ guŋ nɑ yɔk pɑ awɛ, ntho guŋ ywə awɛ, tə gehɛnə̀ piŋ ntho e yə a.

⁷Sɔm nthi nɔm shɔkcɔ̌k, kə sə́ŋ, kə nɔk kɑ bapgu yə mo ghə nə e kəkɔ a tə̌ wə pɑ̌.

⁸Tə sɔ' m nə tʉ̌m mo bɑ mǒ ghə nə e kəkɔ: Ghəghʉɔ tə dhə́, mcɔp zhwə mo!

⁹Pɑ dɑ pɑ tʉm yɔk pɑ go'tə Cyəpɔ Tá; biŋ bɑ dɑ pɑ yʉ́ nyə́ŋ do nə pɔmnəŋ, mu hwə Si;

¹⁰byanyə ba do nthəm pɑ́ nə ta' shwə yɑmu'. Mfɑ́ pɑ a tə bɑ gɔ pɑ́ po'o pɑ.

¹¹Pɑ ta' tsəshyə fə shyə́ pɑpuŋ ba shyə dzəzə a?

¹²Mfɑ pɑ pɑ́ thə figə yam olivə á? Kɑ thə nthɔm nə gə mlu' yam figə? Pɑ tsə shyə gwɛ lə fə shyə pɑpuŋ.

¹³Wɑ̌ cəcɑ̌ po bɑ ě ghə fʉ́ biŋ gə zhyənwə? Mo bɔ lɑ ghiŋ tsyə́ tsyə pɑpuŋ da'tə gɑ́ fʉ̌ gə pɑ mfa' pɑpúŋ.

¹⁴Da' gɑ́ tʉm tsɔ pɑ bɑ ǎ lo nə khiŋ mo dzəzə ba zhwenyə twɔ'nyə po kɑ ghə pa' dzə̌ wə bɑ yɔ a; po kɑ́ nə̌ŋ dɑ mcwanwə mɔ́ baknyə nwə nyənyɔ.

¹⁵Yə bǎ nthi fʉ̌ tə fɑ m̀ kɛbə̀ŋ pɑ̀; a bɑ fʉ́ də̀m ca', fʉ́ nɔm, fʉ́ Sata.

¹⁶Nə pa' paknyə pu a mnwə cwəpùŋ nthəm jʉ̀m nə khiŋ pu a zhwenyə twɔ'nyə.

¹⁷Da' gɑ fʉ̌ yə a fɑ m̀ kɛbəŋ á bɑ tə mviŋ, hwitə̀, bɑ tʉm pɑpuŋ bɑ ŋkwishwə̀, bɑ cɔ̌mmtso ló nə ba nthɔm pɑpúŋ, a tə gə ŋkhyɛ'nyə pɑ, a lə nəŋ bɑ gə mfʉm.

¹⁸Pu dzə nthɔm nwə dəŋdəŋ nthʉ́m hwitə nə pɔ pyə wap fa' mfa' hwitə a.