Read Ghomala New Testament YAKOP 5 Bible Online

YAKOP 5 - Ghomala New Testament bible

YAKOP 5

¹Wɔ mzhí pɔ, po lɔ̌ tə́ thə́ nə ghəghʉɔ yə ǎ wə byap wɔ a!

²Tsə fʉ' tsɔ bɑ ǎ pì, mdzə mɔ bɑ mcwəcwə tsʉ́nyə́.

³Gɔl yɔ ba tʉɔ ŋkhap yə ǎ bi po a bɑ ǎ ghəm mkapfə́, mkapfə map pɑ gɔ sɔ' pɑ nyəŋ shɛ thə́ po, khə mnɑ́ mɔ́ pa' mɔk a. Pǒ bɑ pǒ lwɔ' ywə nə byap cwə jʉm!

⁴Ŋkhap mghɛ fa' pyə wap dɑ tsə pé po nyəŋ ŋkhiŋ a, pǒ tɔm. Wap cwè, lɔ tsap ghɔ tə ŋkho mtə́ŋ Cyəpɔ Sabaot.

⁵Po lě gə vɔk pɑpúŋ, vɔk fʉ́' dəmca'. Po lě jwyə́ tsɔ́ nə cwə nə pfyə́tə mcyə.

⁶Po lě nyəŋ shɛ thə́ mo dəŋdəŋ, jwə e: E lə fəŋnyə bǎ muywə dzə̌ po.

⁷Mfɑ̌mfɑ́, po kɑ lo'nyə tə̌ Cyəpɔ sɔ̌'. Po lɑ fo' nə́ dzʉ́'nè: E byap nthɔm pɑpuŋ myə a nthəm nə cǎ' a tə lo'nyə́ nə́ nə cwə yə e ka wuŋ ŋkhap dzə nthɔ̌m pu a jʉm nthɔm a.

⁸Ba wɔ yɔ, ka po lo'nyə̀, pɔ tɔm tʉ́m tsɔ nə pa' cwə yə Cyəpɔ gɔ sɔ' a wə gɔptə́.

⁹Mfɑ̌mfɑ ka po pɑ shwé nə wɔ́ wɔ cəcɑ̌ po, po'o bwɔk gɑ pú kɑ sɔ' fyɛ' wɔ. Po yɔ́: Gɛ fyɛ̌' tiŋnyə jyə̀dyə̌.

¹⁰Mfɑ̌mfɑ́, pɔ pyə pɑ mo fo' wap nə gǒ', ba nə tɔm tʉ̌m a, a bɑ mghɔm ghɔm Si pyə wap lə ghɔmnwə nə tsǒ Cyəpɔ a.

¹¹Po yɔ́: Pyə̌ go'tə pɔ pyə́ wap nthɔm tʉ́m tsap nə cwə ghəghʉɔ a. Po lě ju' mcuŋ Yob nə nə́ tɔm tʉ̌m biŋ jɔ ywə yə Cyəpɔ lə bɑwə shəŋ a nə pa' tʉ̌m Cyəpɔ bɑ ǎ ghu', e piŋ gə cɔ́mmtso.

¹²Da' gɑ mfɑ pɑ, nə ləŋdzə, ka po pɑ ŋkhɔ́ mkɔ, ka po kɔ kɛ́bəŋ, kɑ sicǎ' lə, kɑ bǎ nə ya nthi lə. Yɔ ə̌ŋ pɑ ə̌ŋ, yɔ gɛ̌ pɑ gɛ̌ po'o gɑ po kɑ kǒ nə fyɛ'.

¹³Mu' mo nə po pɑ jɔgo', e cwyɛ'nyə̀ Si. E pɑwə ŋwɛnyə́, e zhwɔp mzhwɔpshyə́.

¹⁴Mu' mo nə po pɑwə gǒ, e ghə pu ké mghətso Cu'tə pɔ Kristo, wap lɑ mwɑ̌ jwɔ' e nə tsǒ Cyəpɔ, biŋ shwyɛ'nyə́ Si nə e.

¹⁵Mcwyɛ'nyə̀ piŋnthʉm gɔ yɛ gɛ gho bɔ, a Cyəpɔ pʉ' e, bi a pɑ bɑ e hɔnwə, bɑ Si gɔ nə cwyɛ' e.

¹⁶Po pɑ biŋ mhɔ mɔ cəcɑ̌ po, biŋ bɑ shwyɛ'nyə Si cəcɑ̌ po nə wɔ́wɔ́, po'o gɑ po yɛ̌. Gʉ̌' bɑ nə mcwyɛ'nyə mo dəŋdəŋ, a pɑ́ fa'.

¹⁷Elia lə bɑ mo pa' wɔk pɑ̀ a; e lə lɑ̌ kwa' gʉ' piŋnthʉm shwyɛ'nyə Si gɑ bəŋ kɑ lú, bəŋ lə lú dəmcǎ' nə gu'dzʉ́ tə́ gə mŋwə́ nthɔ̌k.

¹⁸E nəŋ biŋ shwyɛ'nyə Si, kɛbəŋ hɑ bə̀ŋ, cǎ' yam nthɔ̌m.

¹⁹Mfɑ́ pɑ, a pɑ gɑ mu' mo nə po hɔ məjyə, nə nwə nyənyɔ, pu piŋ dɑ e bɑnyə́ nə məjyə,

²⁰po zhyə gɑ mo yə e dɑ mo yə e hɔ məjyə a nə bɑnyə nə məjyə dəŋdəŋ gɔ vɔk mo bɔ piŋ ghə mhɔnwə jɔmyɔ̌m mi.