Read Ghomala New Testament 1 PƐTRƆ 1 Bible Online

1 PƐTRƆ 1 - Ghomala New Testament bible

1 PƐTRƆ 1

¹Myə Pɛtrɔ, gɛ nthəm Yeso Kristo bi mcǐ pɔ pyə wap shwə mtsʉ'mtsʉ' bɑ Ponto, po pyə wap Galata, ba m Kapadokia, ba m Azia, ba m Bitinya,

²bɑ shwə pa' mghʉɔ, bɑ wap sa mtsʉ'mtsʉ' bɑ pu lě shi wɔ shyə m pa' Si Tá lə la' jap a, shyə m̀ nə pa' Zhwenyə dɔnyə wɔ, gə gɑ́ po pɑ́ ju'nyə Yeso Kristo, tə mcyə myə zhwɔ' wɔ. A gho' ba hwitə sɔ' nə́ po kwa' vəŋ e!

³Byanyə nə Si, Tá Cyəpɔ yɔk pɑ Yeso Kristo: A cyə m̀ nə cɔ̌mmtso e ghə pu piŋ dzə wɔk pɑ m nə mɔktə yə a gə mo vɔk a shyə m̀ nə́ nə yam nə vʉ̌ Yeso Kristo.

⁴Pu biŋ dzə wɔk pɑ nə tsə mcʉ' tsyə bi a pɑ̀ a lə pi, kə nə viŋ, kə nə ponyə lə; mcʉ' bɔ bɑ pu lwɔ' bi po thə́ kɛbəŋ.

⁵Pú dwɔ' bi wɔ pyə tʉɔ Si byap shyə m nə piŋnthʉm, nə ywə vɔk yə pu gɔ sɔ' la'tə cwə jʉ̀m a.

⁶Po'o lə́, po lo nə ŋwɛnyə̀, tə bi a po pɑ gɔ na' yɔ pɑ gǒ' nə nthinthi mləŋtə.

⁷A gɔ pɑ po'o, də̀ŋ yə a bɑ nə piŋnthʉ́m yɔ bɑ ǎ cyə tʉɔ gɔl yə pu dɑ ba mɔk nthə, a cwə bɔptə pɔptə a, də̀ŋ nə piŋnthʉm yɔ bɔ sɔ' bɑ hɑ ghamtə, hɑ ghu'tə, hɑ mku' nə cwə yə Yeso Kristo gɔ sɔ́' ŋwak a.

⁸Yú Yeso Kristo yə po ŋkhuŋ e bɑ po la m jɔ e, bɑ biŋ e tə wuŋ jɔ e a. Po lo ŋwɛnyə tə fo' ba tə dhə.

⁹Po kwi mcwɔ'fa' piŋnthʉm a pɑ ywə vɔk mtʉ́m mɔ.

¹⁰Mghɔm ghɔm Si pyə wap lə ghɔmnwə nə gho' yə́ a lə bɑ yɔ a lə cə̌ŋ nwə nə ywə vɔk bɔ.

¹¹Wap lə shəŋ nə zhyə nthi ba cwə yə nwə yə Zhwenyə Kristo yə a lə bɑ nə pu a lə gɔm nə a, nə pa' a lə dəŋdzə, gɔmnwə nə go' yə a lə bɑwə byap Kristo ba m nə mɑ ghu'tə yə a lə gɔ tə́m jʉ̀m o a.

¹²Si lə ghə̌ wap zhyə́ gɑ a la tə́ bɑ m̀ nə pú pɑ́, gɑ a lə bɑ m bi po tə wap lə hɑ Cuŋ bɔ yə ǎ cwəlɔ pɑ siŋ Cuŋ pɑpuŋ pɑwə siŋ wɔ a, shyə m̀ nə Zhwenyə Dɔlɔ̌ yə a fɑ kɛbəŋ, pɑ aŋgəle pɑ́wə shəŋ nə yɔ a.

¹³A po'o tə po nyatə zhwenyə yɔ nə fa', po kɑ ŋʉ' lwɔk, po yap guŋ yɔ mɔktə awɛ nə gho' yə pu gɔ sɔ' ghə nə po nə cwə yə Yeso Kristo gɔ sɔ' ŋwak a.

¹⁴Dəŋdəŋ pa' pɑkhʉ̌ pyə wap ju'nyə a, kɑ po vɔk vɔ̀k ghi'nyə yə a lə bɑ nə po cwə dzə cwə yə po lə jɑ́ nthʉ́m fʉmnyə̀ a.

¹⁵Da' gɑ́ dəŋdəŋ pa' mo yə e ŋkhe wɔ a bɑ dɔlɔ̌ a, ba wɔ yɔ po cʉ' pɔ dɔlɔ̌ nə guŋ yɔ nə ghìŋ awɛ,

¹⁶nə pa' a bɑ pu və gɑ: Po pɑ́ dɔlɔ̌, nə pa' gɑ̌ bɑ dɔlɔ̌.

¹⁷Bi a po pɑ ŋkhe mo yə e tə gə ŋkhyɛ'nyə a, biŋ bɑ fyɛ' bǎ ya mo lə pɑ̀ nə mfa' myə a gɑ́ Tá yɔ, po nə ghiŋ nə mɔ gɑ mtyɛ'dzʉ́ dəmcǎ' bɑ bɔmtə.

¹⁸Po zhyə gɑ́ pu la tə dɑ pɑ tsə bɔptə pɔptə, kɑ tʉɔ̌ ŋkhap kɑ tʉɔ̌ gɔl lə tə nə shu' wɔ nə vɔk mzhʉ́m yə a lɑ bɑ bi po, fɑ bi mta pɔ a pɑ.

¹⁹Pu lə dɑ pɑ mcyə tʉɔdəŋ, pa' myə mu jʉ̀jʉ̀ tə bya, tə pap mviŋ, mcyə Kristo,

²⁰yə pu lə la' jap é tə da' gə dzʉ, a piŋ nə pɑ cwə jʉm pu la'tə e, a lu m nə po a.

²¹Pǒ shyə m nə é bíŋ Si yə e lə yam e nə vʉ̌ biŋ hɑ ghu'tə bi a, po'o tə piŋnthʉm yɔ́ ba yɔ nə mɔktə pɑ́ bɑ pɑ́ nə Si.

²²Pǒ bɑ pǒ lɔnyə mtʉ̀m mɔ, nə pa' pǒ yu'nyə bi nyənyɔ, gə ŋkhuŋnyə mfɑmfɑ́ tə nyəŋ mfʉ̀m nə́. Po kuŋnyə wɔ wɔ nə tʉm dɔlɔ̌ tə pwa,

²³wɔ pyə a bɑ pu piŋ dzə wɔ m nə tsə sə́ shyə m nə gwya ywə, la' a pɑ yə bipi bɑ yə tə pì, shyə m nə ghɔm Si tsyə a bɑ ǎ cwə nthʉɔ̀, a lə pɑ mi a.

²⁴Nə pá' guŋ bap nɑ́ awɛ bɑ pa' mghé a, guŋ yə ghu'tə awɛ pɑ pa' tutuŋ mghé a. Ghě jə́m tutuŋ e vʉ̀,

²⁵da' gɑ́ ghɔm Cyəpɔ shwə́ mama. Ghɔm bɔ nəŋ bɑ Cùŋ pɑpúŋ yə pu lə sǐŋ wɔ a.