Read Ghomala New Testament 2 PƐTRƆ 3 Bible Online

2 PƐTRƆ 3 - Ghomala New Testament bible

2 PƐTRƆ 3

¹Msó pɑ, yə̌ŋ gɑ dzə́ pɑ́ batə̀ ŋwa'nyə yɑpʉə yə́ gɑ bvə bi po a. Nthʉm mŋwa'nyə bɔ məbʉə, gɑ gə po kamtə́ myə shɑ mnwə tə jyə nə kwɛ nwə dəŋdəŋ.

²Po kamtə́ mghɔ̀m myə́ mghɛ ghɔ̀m ghɔm Si pɔ dɔlɔ̌ lə ghɔm a, ba mco' mghɛ nthəm pɔ́, mco' Cyəpɔ biŋ bɑ́ gɛvɔk.

³Po lə́ŋdzə̀ shəŋtə jyə: A gɔ sɔ' pɑ̀ nə mtyɛ'dzʉ jʉ́m, pɑ kəŋnyə́ nə piŋ pɑ capshwə pyə wap ju' pɑ mgi cwəpuŋ map sɔ̌'

⁴bɑ gɔm gɑ: Mka'nyə myə pu lə ka'nyə nə yə nə sɔ' é a hɑ? Nə pa' tə fɑ́ pa' mtǎ lə pfʉ̌tə́ a, guŋ ywə awɛ bɑ pɑ́ pa' a lə la' bɑ́ tə fɑ́ pa' pu lə nyatə dzʉ́ a.

⁵Wap nə sɛ̌ po'o bɑwə dʉɔnyə gɑ̀ mkɛbəŋ ba cǎ' lə bɑwə fɑ́ tə tyɛ̌', bɑ a lə nthəm m̀ nə shyə́ biŋ bɑ nthamtə bɑwə pɑ nə shyə shyə́ m nə Ghɔm Si.

⁶A lě shyə pɑ m̀ nə yap bɔ nə pɑ, dzʉ́ cwə o bɔ pɔptə, bɑ shyə̌ sə é si.

⁷Sɔ' m̀ nə mkɛbəŋ ba sica' cwəlɔ̌, pɑ kwa' ghɔm bɔ nə dwɔ' bɑ nə byap mɔk, dwɔ' bɑ nə byap tyɛ'dzʉ́ fyɛ' ba tyɛ'dzʉ́ yə pɔ cwəpuŋ gɔ pitə́ a,

⁸Mu' ta' ywə wə́ msó pɑ yə po tɑ́ gɔ tʉɔnyə a pɑ́: A bɑ bi Cyəpɔ ta' tyɛ'dzʉ́ pɑ́ pa' gu' shǎ' a, gu' shǎ' piŋ bɑ́ pa' ta' tyɛ̌'dzʉ́ a.

⁹Cyəpɔ tə́ shwə́ nə ghə gɑ mka'nyə̀ myə́ pəmtə́ pɑ́, ba tə́ pa' shɑ́ pɔ bɑwə jɔ gɑ́ ě cwə a; da' gɑ́ e bɑwə byap wɔ́, la' e pɑwə́ shə́ŋ gɑ́ shɑ́ pɔ pfʉ́tə pɑ́, e bɑwə shəŋ m̀ gɑ́ guŋ pɔ awɛ pʉɔtʉm tsap.

¹⁰Tyɛ'dzʉ́ Cyəpɔ gɔ sɔ' sɔ' pa' shǔŋ a, tyɛ'dzʉ́ yə mkɛbəŋ gɔ sɔ' mi, nə mì pɑ zhwyanyə a, tyɛ'dzʉ́ yə guŋ tsə awɛ gɔ sɔ' khə́ simnyə, tyɛ'dzʉ́ yə ca' pu a guŋ mfa' myə́ awɛ gɔ pɑ nə nə́ fyɛ' a.

¹¹Tə pa' guŋ tsə awɛ gɔ sɔ' simnyə a, po pɑ́ kwa' pɔ! Po ghə vɔk dɔlɔ̌! Po ghə mku' Si!

¹²Wɔ pyə pǒ bɑwə nə pyap bɑ́ do'nyə gɑ́ tyɛ̌'dzʉ̌ Si sɔ' a, tyɛ'dzʉ yə mkɛbəŋ gɔ sɔ' khə́ simnyə́, ba guŋ tsə́ awɛ khə́ dʉ́ a!

¹³Pɑ̌ bɑwə byap pa' e lə ka'nyə, byap mkɛbəŋ sə́ ba ca' sə́, tsʉ' yə nwə dəŋdəŋ gɔ pɑ cwə nə a.

¹⁴Po'o lə mso pɑ, po nə pyáp bɑ ŋkhaktʉɔ gɑ e nə sɔ' po pɑ́ nthʉm hwitə̀, bɑ dəŋdəŋ, tə pu bɑwə ŋkhyak wɔ.

¹⁵Po zhyə gɑ dəŋ pa' Cyəpɔ nə byap a sak a, a bɑ yɔ ywə vɔk! A po'o tə fɑ yɔk pɑ Polo biŋ bɑ so yɔk pɑ lə bvə nwə nə́ shyə m nə fʉ̌ yə Si lə hɑ̌ bi e a.

¹⁶A bɑ ywə yə e bvə nthʉ̀m guŋ mŋwa'nyə̀ myə wɛ a. Shɑ bap bɑ nthʉm o bɑ ǎ tʉɔ te'. A bɑ mbap mtsʉ myə́ mkhʉkhʉɔ pu a pɔ pyə wap bɑ wap ka lanyə sɔmywə a sɔp mghəŋ myə, dəŋdəŋ pa' wap sɔp mghəŋ guŋ myə shɑ Mŋwa'nyə po'o nə yap nə sɔ' bi a.

¹⁷Msó pɑ́, ǎ yɑ bɑ pu tɔk wɔ: Po pɔmtə́, po kɑ tak gɑ́ pɔ cwəpuŋ pyə wap bɑ́ pɔ bipǐ a lɑ wɔ gɔ, po kɑ nə̌ŋ biŋ gɑ pú té wɔ nə yɔ nə lə mku' bíŋ.

¹⁸Po kwyə́ nə gho' ba nə zhyə Cyəpɔ yɔk pɑ biŋ bɑ́ Gɛvɔk wɔk pɑ Yeso Kristo. Ghu'tə pɑ̀ bi e tə fɑ cwəlɔ gɔ ŋkhəm nə tyɛ'dzʉ́ mama. Amɛn.