Read Ghomala New Testament 1 YOHANE 3 Bible Online

1 YOHANE 3 - Ghomala New Testament bible

1 YOHANE 3

¹Po yɔ mu' nthi kuŋnyə yə ta nə ŋkhuŋ wɔk pɑ tə pu ke wɔk pɑ gɑ pǒ Si. Pɑ nəŋ bɑ wap nyənyɔ. A pɑ gɑ dzʉ ka zhyə wɔk pɑ bɑ a du pa' dzʉ ka zhyə e a.

²Wɔ pyə gɑ kuŋ wɔ te' a, pɑ bɑ pó Si tə fɑ cwəlɔ, tə kwa' ywə yə pɑ gɔ sɔ' pɑ yá a ka wuŋ bɑ dɔlɔ̌. Pɑ zhyə gɑ cwə yə e gɔ sɔ' təm a, pɑ pɑ́ pa' yʉ a, nə pa' pɑ gɔ sɔ' lɑ mnyə mɔk pɑ nə yɔ e kwa' pa' e bɑ a.

³Mo yə e piŋ e kwa' po'o a gɔ pɑ dɔlɔ̌ nə pá' yʉ Yeso bɑ dɔlɔ̌.

⁴Mo yə e hɔnwə a bɔptə mcò' Si nə pa' nə hɔnwə bɑ nə pɔptə mcò' Si.

⁵Tɑ po zhyə gɑ Yeso le sɔ' nə te mhɔ. Mhɔ tə bɑ nə e pɑ́.

⁶Mo yə e shwə nə e a tə ŋkwi' hɔnwə pɑ. Mo yə e hɔnwə a tə jɔ e pɑ, e lə nəŋ jyə e.

⁷Wɔ pó mkəcɔk pó, ka sɔmmo ghə po hɔ məjyə. Mo yə e gə nwə nyənyɔ a bɑ mo nyənyɔ pa' Yeso bɑ mo nyənyɔ a.

⁸Mo yə e hɔ pɑ nwə a bɑ mo Sata nə pa' tə fɑ tə tyɛ̌' Sata bɑ yə pɑ gɛ mhɔ. Mu Si lə sɔ' nə sa'tə mfa' Sata.

⁹Mo yə pu tsə e m nə Si a tə biŋ hɔnwə pɑ, nə pa' gwya Si bɑ̀ nə e; bi a pɑ e lə nəŋ biŋ hɔnwə pɑ, nə pa' a bɑ pu tsə e m nə Si a.

¹⁰Pa' pu nə jyə pó Si kɑ pó Sata lə á bɑ gɑ: mo yə e tə gə nwə nyənyɔ a pɑ tə bɑ mo Si pɑ, ba mo yə e tə ŋkhuŋ fɑ e a pɑ.

¹¹Ŋkhʉɔ yə po lə la' ju' tə tyɛ' a bɑ gɑ pɑ kuŋnyə cəcɑ pɑ.

¹²Ka pɑ hwə Kaen, yʉ yə e lə pɑ mo Sata gwa fɑ e a. E lə gwa e gɑ kɑ? Nə kɑlə mfa' myə lə bɑ mfa' cwəpuŋ tə myə́ fɑ e pɑ mfa' nyənyɔ.

¹³Mfɑ pɑ, ka nwə cyə wɔ gɑ́ dzʉ̌ pɔ wɔ.

¹⁴Pɑ zhyə gɑ a bɑ pɑ lě da' shyə nə vʉ̌ kho nə vɔk, nə kɑ lə pɑ ŋkhuŋ mfɑ pɔk pɑ; Mo yə e tə ŋkhuŋ mo a pɑ bɑ m nthʉm vʉ.

¹⁵Mo yə e bɔ fɑ e a bɑ jwə mo. Po zhyə gɑ vɔk mama tə bɑ nə sɔm jwə mo pɑ.

¹⁶Ywə yə pɑ nə jyə ŋkhuŋnyə cwəlɔ a bɑ gɑ kwa' yʉ Yeso lě hɑ vɔk e nə thə yɔk pɑ; ba wɔk pɑ, pɑ gɔ hɑ vɔk yɔk pɑ nə thə pyəshɑ mfɑ pɔk pɑ.

¹⁷A po'o bi a mo ghə́ tsə dzʉ, tə jɔ fɑ e, ywə pɑwə jak e, e lə cɔm mtso myə́, bɑ bi a pɑ́ ŋkhuŋnyə Si pɑ nə e m gɑ kɑ?

¹⁸Wɔ pó mkəcɔk pó pɑ, ka pɑ pɑ́ dɑ pɑ́ da' ghɔm kɑ shwə lə nə ŋkhuŋ mo; Pɑ pɑ́ ŋkhuŋ mo nə nə ghə ywə nthʉm nyənyɔ.

¹⁹A gɔ cyə m po'o pɑ zhyə gɑ pɑ bɑ pɔ nyənyɔ, tʉm tsɔk pɑ hwitə dzə e.

²⁰Nə pa' tʉm tsɔk pɑ pɑ́ sa' wɔk pɑ, bɑ Si bɑ e cyə tʉm tsɔk pɑ, bɑ e zhyə guŋ mnwə awɛ.

²¹Wɔ pyə gɑ ŋkhuŋ wɔ te' a, tʉm tsɔk pɑ pɑ́ tə pɑ̌ sa' wɔk pɑ bɑ pɑ́ gɔ ghɔmnwə bi Si tə pwɔk

²²bǎ kɑ lə yə pɑ lo bi e a, e hɑ bi pɑ nə pa' pɑ khyəp mcò' myə, bɑ gə ywə yə a buŋ e a.

²³Mcò' myə bɔ bɑ nə Piŋ Mu e Yeso Kristo biŋ gə kuŋnyə cəcɑ pɑ pa' e lə hɑ mcò' bi pɑ a.

²⁴Mo yə e nthɔm mco' Si a bɑ bi Si, Si piŋ bɑ bi e. A shyə m nə zhwenyə yə e lə hɑ bi pɑ a, pɑ zhyə gɑ pa pu nə bəmtə bɑ.