Read Ghomala New Testament 1 YOHANE 4 Bible Online

1 YOHANE 4 - Ghomala New Testament bible

1 YOHANE 4

¹Wɔ pyə gɑ ŋkhuŋ wɔ te' a, ka po piŋ bǎ ya zhwenyə lə, po cəŋtə dyəŋtə mzhwenyə tə biŋ yə a zhwenyə Si a; nə pa' mghɛ ghɔm ghɔm Si cwanwə sa dzʉ.

²Ywə yə po gɔ nə zhyə zhwenyə Si a bɑ gɑ bǎ ya zhwenyə lə yə a biŋ gɑ Yeso Kristo bɑ ě sɔ' nthʉm bapnɑ á bɑ zhwenyə Si.

³Bǎ ya zhwenyə lə yə a gaptə Yeso nə bapnɑ a bɑ zhwenyə gɛ bo Kristo yə po lə yu' gɑ e gɔ sɔ' a; tə fɑ cwəlɔ e bɑ e sɔ' tə bɑ nthʉm dzʉ;

⁴Wɔ pó mkəcɔk pó pɑ̌ pyə po bɑ m nə Si a, po bɑ pǒ lo' shyə nthi mghɛ nthəm Si cwanwə bɔ nə pa' mo yə e bɑ cəcɑ̌ po a bɑ e cyə mo yə e bɑ m nə dzʉ a.

⁵Wap, wap bɑ m nə dzʉ̌; a shyə m po'o tə wap pɑ gɔm ghɔm dzʉ, dzʉ pɑ ju' wap.

⁶Tə sɔ' m nə pɑ̌, pɑ bɑ́ m bi Si. Mo yə e bɑ e zhyə Si a ju' gi yɔk pɑ; mo yə e tə bɑ nə Si a pɑ́ tə ju' gi yɔk pɑ pɑ. A shyə m nə́ tə pɑ pɑ́ jyə zhwenyə nyənyɔ biŋ jyə zhwenyə cwanwə.

⁷Wɔ pyə gɑ ŋkhuŋ wɔ te' a, pɑ pɑ́ ŋkhuŋnyə cəcɑ̌ pɑ nə pa' kuŋnyə fə bi Si. Mo yə e ŋkhuŋ mo a bɑ bɑ pu tsə e m nə Si, e zhyə Si.

⁸Mo yə e tə ŋkhuŋ mo a pɑ bɑ e ka zhyə Si. Nə pa' Si bɑ kuŋnyə.

⁹Yɔ́ nthi pa' nkhuŋnyə Si lə nə bɑ cəcɑ̌ pɑ: Si le nthəm ŋkwi Mu e nthʉm dzʉ gɑ pɑ cyə m nə e bvɔ̌k.

¹⁰Yɔ ywə yə ŋkhuŋnyə̌ bɑ yá: tə wɔk pɑ nə lə ŋkhùŋ Si pɑ, yʉ nə lə ŋkhuŋ wɔk pɑ tə nthəm ŋkwi Mu e nə gə ywə nə nuŋpwɔ' nə sɔk mhɔnwə mɔk pɑ.

¹¹Wɔ pyə gɑ ŋkhuŋ wɔ te' a, a pɑ gɑ Si kuŋ wɔk pɑ po'o bɑ a puŋ gɑ ba wɔk pɑ ghə kuŋnyə cəcɑ pɑ.

¹²Sɔmmo lam fə jɔ Si. A bi a pɑ pɑ́ ŋkhuŋnyə cəcɑ̌ pɑ bɑ Si shwə nə pɑ, kuŋnyə pɑ́ nə pɑ bɑ a pəmtə.

¹³Ywə yə pɑ shyə m nə jyə gɑ pa pu nə bəmtə bɑ a bɑ gɑ a bɑ e le hɑ Zhwenyə e bi pɑ.

¹⁴Wɔk pɑ pyə pɑ lə yɔ a, pɑ bɑ́ mghɛ kwinthɛ nə ywə yə pɑ lə yɔ a, gɑ Ta le nthəm Mu e, e pɑ́ gɛvɔk dzʉ.

¹⁵Mo yə e piŋ sɔsɔ̌ gɑ Yeso bɑ Mu Si a, Si shwə́ nə e, e pɑ́ shwə́ nə Si.

¹⁶Pɑ bɑ pɑ zhyə kuŋnyə yə Si da'tə bi pɑ a biŋ biŋ. Si bɑ kuŋnyə: Mo yə e shwə́ nthʉm kuŋnyə a, Si shwə nə e, e pɑ́ shwə nə Si.

¹⁷A pɑ gɑ ŋkhuŋnyə cəŋtə bɑ nə pɑ, bɑ pɑ tə bwɔk tyɛ' fyɛ' pɑ nə pa' vɔk yɔk pɑ nthʉm yəŋ dzʉ̌ bɑ pa' vɔk Yeso a.

¹⁸Pwɔk tə bɑ nə kuŋnyə pɑ, nə pa' kuŋnyə nyənyɔ tə jyə pwɔk pɑ̀. Mo bwɔk go' yə bi a pu nə jɔ e a; mo yə e bwɔk a tə bɑ e ghə kuŋnyə nyənyɔ pɑ.

¹⁹Pɑ̌ ŋkhùŋnyə cəcɑ̌ pɑ nə pa' a bɑ e le dəŋdzə ŋkhuŋ wɔk pɑ.

²⁰Mo ghɔm gɑ e khuŋ Si tə bɑ bɔ fɑ e bɑ e bɑ shwanwə. Nə pa' mo pɑ tə kuŋ fɑ e yə e jɔ e a, bɑ e gɔ kuŋ Si yə e tə jɔ e a m gɑ kɑ?

²¹Mcò' myə e hɑ bi pɑ a bɑ gɑ: Mo yə e ŋkhuŋ Si a, e kuŋ ba fɑ e.