Read Ghomala New Testament 1 YOHANE 5 Bible Online

1 YOHANE 5 - Ghomala New Testament bible

1 YOHANE 5

¹Mo yə e piŋ gɑ Yeso bɑ Kristo a, mo bɔ bɑ pu tsə e m nə Si; mo yə e nəŋ ŋkhuŋ Si yə e dzə̀ mo a, ŋkhuŋ mo yə pu tsə e m̀ nə Si a.

²Ywə yə pɑ shyə m̀ nə jyə gɑ pɑ̌ ŋkhuŋ po Si a, a bɑ nə kuŋ Si, ŋkhyəp mcò' myə́.

³Nə pa' nə kuŋ Si bɑ gɑ pɑ khyəp mcò' myə́. Mcò' myə́ bɔ tə dzɑ pɑ́.

⁴Nə pa' bǎ ya mo lə yə pu tsə́ e m nə Si a bɑ e lo' tə shyə́ dzʉ́; Yə nə cyə́ dzʉ yə e nə shyə́ dzʉ a a pɑ piŋnthʉm. Piŋnthʉm yɔk pɑ.

⁵Mo yə a bɑ e lo' tə shyə́ dzʉ a bɑ mo yə e biŋ gɑ Yeso bɑ Mu Si a.

⁶Yʉ Yeso Kristo nə lə sɔ' m̀ nə shyə ba m nə mcyə, la' e sɔ' da' m nə shyə pɑ; e le sɔ' m nə shyə ba m nə mcyə; Zhwenyə nə bɑ ŋkwinthɛ̌ nə pá' Zhwenyə bɑ nyənyɔ.

⁷Mkwinthɛ bɑ pɑta:

⁸Zhwenyə, shyə ba mcyə; wap bɔ pɑta pɑ kwishwə nə ta' nə kwinthɛ̌.

⁹Pɑ́ piŋ yə nə kwinthɛ pɔmnəŋ, bɑ yə nə kwinthɛ Si bɑ a ghu' tə shyə̌. Yə nə kwinthɛ Si pɑ gɑ e ŋkwinthɛ̌ Mu e.

¹⁰Mo yə e piŋ Mu Si a bɑ nə kwinthɛ bɔ bɑ nə e; mo yə e ka piŋ Si a, bɑ e lɑ e gə shwanwə nə kɑ lɑ e ka piŋ yə nə kwinthɛ yə e ŋkwi nə Mu e.

¹¹Ywə yə kwinthɛ bɔ bɑ nə a bɑ gɑ Si bɑ e hɑ vɔk mama bi pɑ, vɔk mama bɔ pɑ́ nə Mu e.

¹²Mo yə Mu nə e a, vɔ̌k bɑ nə e; mɔ yə Mu tə nə e a pɑ vɔk tə bɑ nə e pɑ.

¹³Gɑ bvə guŋ ywə yəŋ awɛ bi po po'o gɑ po zhyə gɑ a bɑ po ghə vɔk mama, wɔ pyə a bɑ pǒ ghə piŋnthʉm nə tso Mu Si a.

¹⁴Pɑ́ zhyə nyənyɔ gɑ pɑ la do ywə bi e kwa' pa' e shəŋ a, bɑ e go yu' wɔk pɑ.

¹⁵Pa' pɑ zhyə gɑ e ju' wɔk pɑ a, ba kɑ lə yə pɑ do bi e a, a bɑ pɑ e da' gə ywə bɔ.

¹⁶Mo yɔ fɑ e bɑ e hɔnwə, mhɔnwə myə́ a tə dɑ mo gɔ nə vʉ̌ a pɑ́, e cwyɛ'nyə Si nə thə e. Si gɔ hɑ vɔk bi e, bi a pɑ gɑ mhɔnwə bɔ ka lɑ m̀ nə vʉ̌; shɑ mhɔ dɑ mo gɔ m̀ nə vʉ̌; ŋ tə gɑ po cwyɛ'nyə Si nə nthi mhɔnwə bɔ pɑ.

¹⁷Guŋ nə pɔptə mcò' awɛ bɑ nə hɔnwə, tə guŋ mhɔ awɛ tə dɑ mo gɔ m̀ nə vʉ̌ pɑ́.

¹⁸Pɑ zhyə gɑ mo yə pu tsə e m̀ nə Si a tə biŋ hɔnwə pɑ; Mu Si byap e, tə cwəpuŋ lɑ piŋ gə shɛ nə e.

¹⁹Pɑ̌ zhyə gɑ pɑ bɑ m̀ nə Si, dzʉ nəŋ bɑ m nə gʉ' cwəpuŋ.

²⁰Pɑ̌ piŋ jyə gɑ Mu Si le sɔ' hɑ zhyənwə bi pɑ nə́ nə jyə́ kwa' Si nyənyɔ. Pɑ bɑ m̀ nə Si nyənyɔ bɑ m̀ nə Mu e Yeso Kristo. Yʉ Yeso Kristo bɑ nyənyɔ, e bɑ Si biŋ bɑ vɔk.

²¹Wɔ pó mkəcɔk pó, po pɔmtə nə ghamtə mkətwɔk.