Read Ghomala New Testament 2 YOHANE 1 Bible Online

2 YOHANE 1 - Ghomala New Testament bible

2 YOHANE 1

¹Myə, Gətso bvə bi Má ba m̀ bi po pyə. Wap pyə gɑ khuŋ wap nthʉm ŋkha' yə a bɑ yə nyənyɔ a. Tə da' myə a, ba guŋ pɔ awɛ pyə a bɑ wap zhyə nwə nyənyɔ a,

²shyə m nə nyənyɔ yə a bɑ nə pɑ, gɔ la' pɑ pɑ́ nə pɑ.

³Gho', cɔmmtso, hwitə yə a fɑ bi Si Ta, bi Yeso Kristo Mu Ta, nthʉm nyənyɔ ba m̀ nthʉm khuŋnyə a pɑ bi pɑ̀.

⁴Gɑ̌ cəŋtə́ ŋwɛnyə tə', nə yɔ gɑ shɑ po pǔ wə giŋ nə məjyə nyənyɔ, giŋ nə ywə mco' myə Ta lə hɑ̌ bi pɑ a gɔm a.

⁵Cwəlɔ Ma, gɑ̌ wə həŋtə bu, ŋ tə́ bvə pɑ́ shɑ mco' sə bu pɑ, a bɑ pɑ myə pɑ lə kwi tə tyɛ' a, gɑ̌ wə həŋtə bu gɑ pɑ pɑ́ khuŋnyə cəcɑ̌ pɑ.

⁶Ywə yə khuŋnyə bɑ ya a bɑ gɑ: pɑ ghiŋ nə məjyə mco' myə́. Mco' myə po lə la' ju' tə tyɛ' a bɑ mɔ̌, po'o gɑ po ghiŋ nə jyə bɔ.

⁷Nə pa' a bɑ pɑ fʉtə pɔ jɔmyɔm sɛ dzʉ, wap tə siŋ piŋnthʉm gɑ Yeso Kristo bɑ ě sɔ' nthʉm bapnɑ pɑ̀. Fʉtə mo bɑ gɛ bo Kristo.

⁸Po khyəp nɑ tsɔ, bɔmtə gɑ mfa' mɔ myə pɑpuŋ kɑ pi, po tɔm nɑ tsɔ sɔ' ŋkwi mcwɔ'fa'.

⁹Mo yə e tə́ giŋ nə ywə yə Kristo ji'tə a pɑ, Si tə bɑ bi e pɑ. Mo yə e ghiŋ nə ywə yə Kristo ji'tə a, Ta bɑ bi e ba Mú kwi' bɑ bi e.

¹⁰Mo sɔ' bi po, tə e lə lɑ ywə yə Kristo ji'tə a nə sɔ', ka po piŋ e ywə po, po kɑ ca'tə e ba nə ca'tə.

¹¹Mo yə ě ca'tə mo bɔ a pa' bɑwə nthamtə nə mfa' cwəpuŋ myə.

¹²Mnwə myə gɑ gɔ və bu a yɑwə jɔm tə'; ŋ tə gɔ və pɑ ŋwa'nyə bu pɑ, ŋ gɑ gɔ sɔ' wə po, yɔ o lɑ pɑ shwə a nə ghɔm bu a pɑ ŋwɛnyə ŋwɛnyə.

¹³Po fɑ o mjwǐ yə a bɑ pu ci e a ca'tə o.