Read Ghomala New Testament APOKALIPSƏ 10 Bible Online

APOKALIPSƏ 10 - Ghomala New Testament bible

APOKALIPSƏ 10

¹Ŋ dɑ́ piŋ jɔ mu' aŋgəle nthʉɔtʉɔ fi' fɑ kɛbəŋ ba e kwa mlwa pa' dzə́ a. Mɑ ghu'tə lə bɑ a tsam sə́ é: Sə́ é lə bɑwə hwə pa' nam a, mkwə myə piŋ bɑwə hwə mbakmbak mɔ́k.

²A lə bɑ e wim mupfʉ̌ ŋwa'nyə pu é. E lə tʉ kwə e yə tʉɔ dəm shyə lɑpʉə, nthʉ yə kwyap dəmcǎ',

³biŋ shwé tə́ thə́ pa' cwə yə nɔmtəma' shu' a. E lə cwə̌ tə́ shwé po'o, mhɛbəŋ sɔmbʉə ghə pu yu' gi yap.

⁴Cwə yə́ mhɛbəŋ sɔmbʉə lə vyətə á, ŋ bɑ gɔ və, ju' mu' gi tiŋnyə kɛbəŋ gɔm bəm gɑ: Kɑ́ ghə mo zhyə́ ŋkhʉɔ mhɛbəŋ sɔmbʉə, o kɑ́ nə̌ŋ bvə̌.

⁵Aŋgəle yə ŋ də yɔ e bɑ ě tiŋnyə dəm shyə́ lɑpʉə a piŋ ŋkha' pú e yə tʉɔ kɛbə̀ŋ

⁶biŋ ŋkhɔ mkɔ nə mo yə e bvɔk nə gu' nə gu' a, mo yə e lə nyaptə́ kɛbə̀ŋ pu a guŋ tsə́ tsyə a nthʉm o a, mo yə e lə nyaptə́ sicǎ' pu a tsə tsyə a nə́ a, nyaptə́ shyə́ lɑpʉə pu a tsə́ tsyə a nthʉm o a gɑ: Cwə tə́ gɔ piŋ sak pɑ.

⁷Da' gɑ tyɛ'dzʉ yə pú gɔ yu' batə aŋgəle sɔmbʉə a, cwə yə ě to' nə tùŋ yə nthɛ a, a pɑ cwə o bɔ nwə cyə́ zhyənwə yə a bɑ yə́ Si a a pəmtə pa' e lə la' gɔm, shyə́ m nə́ mghɛ fa' pyə mghɔm ghɔm Si a.

⁸Gi yə ŋ də yu'u a fɑ kɛbəŋ a piŋ gɔmnwə bəm msə gɑ: Ghɔ ŋkwi ŋwa'nyə yə a pu aŋgəle bɑ pu ghyɛ' a, aŋgəle yə a bɑ ě tiŋnyə dəm shyə lɑpʉə ba m dəmcǎ' a.

⁹Ŋ dɑ́ gɔ bəŋ aŋgəle, səso e gɑ e hɑ mupfʉ̌ ŋwa'nyə bəm. E ghɔm bəm gɑ: Kɑ̀, pfɑ́! A gɔ ko vam o zə́, da' gɑ́ gɔ tʉm pa' ŋwá' a shwə o.

¹⁰Ŋ dɑ́ kwi mupfʉ̌ ŋwa'nyə pú aŋgəle biŋ pfɑ́. A lə pɑ̌ shwə̌ myə ndʉmtə pa' ŋwá' a, da' gɑ́ shwə́ tə́ pfɑ́, tsə́ vam tsɑ̌ zə́zə́.

¹¹Pú piŋ gɔm bəm gɑ: O gɔ piŋ ghɔm ghɔm Si nə́ pɔmnəŋ, nə mgùŋ, nə́ mghɔ̀m ba nə mfo jɔmyɔ̌m.