Read Ghomala New Testament APOKALIPSƏ 11 Bible Online

APOKALIPSƏ 11 - Ghomala New Testament bible

APOKALIPSƏ 11

¹A lə pɑ̌ po'o pu hɑ ka' bəm, a pɑwə hwə́ pa' kam ywə yə pɑ fo' cǎ' nə fo' cá' a, biŋ gɔm bəm gɑ: Lusi fo' Dyə Si, ba tsʉ' nə tó tsə pwɔ' ba pɔ pyə wap gamtə e nthʉm o a.

²Da' gɑ́ sɔ' m nə pə̌ŋ giŋnyə dzʉ́ o taknəŋ tə fo' nə pa' a bɑ pu lé hɑ bi mguŋ pyə wap gɔ sɔ' lɑ mkwə nə̀ŋtə guŋ dɔlɔ̌ nə́ mŋwə́ shwɔppʉə mghappfʉə a.

³Gɑ gɔ sɔ' piŋ ghɔm bi mkwinthɛ pɑ̌ pɑpʉə gɑ wap ghɔm ghɔm Si, nə mtyɛ'dzʉ́ po nthɔk mkhəpʉə dəm shǎ', nə ghɔm bɑ wap kwadzə́ mko'tə́ pʉ̀ə.

⁴A bɑ mthə́ Olivə məbʉə ba mkwɔ' lambù məbʉə myə a nthiŋnyə dzə́ Cyəpɔ dəmcǎ' a.

⁵Mo pɑ gɔ paknyə wap, bɑ mɔk gɔ təm shwə̌ pú piŋ khə́ mghɛ bò pap awɛ. Əŋ mo pɑ gɔ paknyə wap bɑ e gɔ pfʉ nthi po'o.

⁶Wap ghə tʉ̀ɔ nə jo' kɛbəŋ tə tɔ̌m bəŋ lə́ cʉ́m si nə mtyɛ'dzʉ myə wap gɔ ghɔm ghɔm Si a. Wap ghə tʉ̀ɔ nə́ nə kwyəpnyə́ shyə a cʉ' mcyə ba nə piŋ dɑ nthinthi go' shwɔ dzʉ, dəŋ pa' wap kuŋ a.

⁷Da' gɑ́ cwə yə wap gɔ sɔ' miŋ nə kwinthɛ a, nɔ̀m yə e nthəm tsʉ̀m bʉɔ a, lo' wap shù. Gwa wap, gə́ wap pfʉtə.

⁸Mpfə́ map gɔ sɔ' nuŋtə dəm sím mtisuŋ gwyə tsʉ' yə pu ŋkhe bupǔ gɑ́ Sodɔm pu Egipto, tsʉ' yə pu lə́ kam Cyəpɔ yap thə́ nə a.

⁹Pu gɔ sɔ' təm cəcɑ̌ pɔmnəŋ, nə mgwya, nə mghɔm, nə ghɔm, nə mgùŋ, sɔ' yɔ mpfə́ map nə tyɛ' tá m kam, pu lə nəŋ nthəŋ wap.

¹⁰Pɑ dəmcǎ' gɔ sɔ' pɑ́ ŋwɛnyə nə pu, nwə pɑ buŋ wap, wap pɑ hɑnyə tsə́ cəcɑ̌ pú. Nə pa' mghɔm ghɔm Si bɔ pɑpʉ̌ə bɑ wap lə mɛnyə̀ wap te'.

¹¹Da' gɑ mtyɛ'dzʉ́ mənthá m kam bɔ gɔ sɔ' cyə́ a ta' zhwenyə vɔk fɑ bi Si ŋkho nə pú, wap lutə si. Kwa' mɑ nə cwɔ̀' ko nə pɔ pyə wap lə bɑwə jɔ wap a.

¹²Wap lə́ yu' mu' gì nthʉɔtʉɔ fɑ kɛbəŋ gɔm bi pu gɑ: Po kwɔ' tsɔ'ɔ gɑ. Wap lə kwɔ' kɛbəŋ, nə mlwa, dzə̌ mghɛ bò páp.

¹³Cǎ' lə wuŋ shʉ'nyə pɑ cwə o bɔ, ta' kam nə guŋ dəŋdəŋ mkam ghǎm vʉsi, pɔ sha' sɔmbʉə pfʉtə nthʉm ghəghʉɔ bɔ. Bvʉ' pɔ lə pwɔk biŋ gu'tə Si kɛbə̀ŋ.

¹⁴Batə gǒ' yɑpʉə cyə; yɔ, batə gǒ' yɑtá wə́ sɔ̌'.

¹⁵Aŋgəle batə sɔmbʉə lə tuŋ nthɛ e: Pu yu' mgi gwyəgwyə kɛbəŋ a pɑ́ gɔm gɑ: Nəfo dzʉ́ wə́ cwəlɔ bɑ bi Cyəpɔ yɔk ba m bi Kristo e; e gɔ sa' nə mgu' nəgu'.

¹⁶Mghətso shwɔppfʉə mghambʉə pyə wap bɑ́ dəm leŋfo dzə Si a lə vʉ̌tə pfɔppfɔp gamtə Si

¹⁷bɑ gɔm gɑ: Gho' bi Cyəpɔ Si nthʉɔtʉɔ yə e bɑwə, bɑ e lə pɑwə fɑ tə̀ tyɛ' a, nə pa' a bɑ ǒ la'tə tʉɔ o yə gwyə́, biŋ nthʉ́ yu nə sa'.

¹⁸Mguŋguŋ lə yɛ̌lúŋ, da' gɑ lúŋ o nə sɔ'. Yəŋ bɑ̀ cwə nə fyɛ' mpfə́ pɔ, cwə nə hɑ mcwɔ'fa' bi mghɛ fa', mghɔm ghɔm Si, pɔ dɔlɔ̌, ba pɔ pyə wap bwɔk tso tsǔ a, pɔ ŋkho'ŋkho' ba pɔ gwyə́gwyə́, cwə nə sa'tə pɔ pyə wap sa'tə́ dəmcǎ' a.

¹⁹A lə pɑ po'o Dyə̌ Si kɛbəŋ ghyɛ', pú yɔ ŋkwɔp kɔ sɔ' Dyə Si. A pɑ́ po'o mpəpa'bəŋ təm ba mgi, ba mhɛbəŋ; cǎ' nə cʉ'nyə̀ mɑ bəŋ mwé təm.