Read Ghomala New Testament APOKALIPSƏ 12 Bible Online

APOKALIPSƏ 12 - Ghomala New Testament bible

APOKALIPSƏ 12

¹Pu lə yɔ mu' mɑ mtìŋ təm kɛbəŋ: Bɑ mjwǐ, bɑ ě kwa nàm pa' dzə a, mɑŋwə́ pɑ to mkwə e, co' fo pɑ thə e, msɛ shwɔppʉə mgham pɑ nə.

²E lə́ bɑ tsʉm, bɑwə shwě, bɑ monəŋ ghəm e, bɑwə dəm e.

³A lə pɑ̌ po'o pu piŋ jɔ shɑ mtiŋ təm kɛbəŋ: A lə́ bɑ́ pəpɛ mɑ nɔk mkwə pfʉə. A lə́ bɑ ě ghə mthə́ sɔmbʉə, biŋ gə nthu' ghǎm. Mco'fo sɔmbʉə lə bɑ nə mthə myə sɔmbʉə.

⁴Ŋkho é lə bɑwə ŋkhʉm ta' kam nə msɛ kɛbəŋ dəŋdəŋ mkam nthá ma'tə dəmcǎ' a. Nɔk mkwə pfʉə lə tiŋnyə dzə mjwǐ yə e lə́ bɑwə dzəŋnyə a, ga e nə tsə e mi mú.

⁵Mjwǐ bɔ lə tsə ta' mú, mú mbɛ; Mú bɔ nə gɔ sɔ' pɑ lɑ guŋ mguŋ awɛ nə ghɔ khim wap, pɑ lə shɔm mtʉ̌ɔ nə cya wap. Pu lə lɑ̌ mú e bɔ nə kwɔ' m bə̌ŋ Si pu leŋfo e.

⁶A lə pɑ̌ po'o mjwǐ bɔ ŋkhʉ gɔ m ghakgo tsʉ́ yə Si lə́ ghə pu nyaptə bi a, po'o gɑ pu kim e tsʉ'u nə mtyɛ'dzʉ po nthɔk mŋkhəpʉə dəm shǎ'.

⁷A lə́ pɑ̌ po'o shù tə́m kɛbə̀ŋ: Mikaɛl pu pɑ aŋgəle pyə́ pɑ do' nɔk mkwə pfʉə. Nɔk mkwə pfʉə pu a pɑ aŋgəle pyə́ piŋ bɑ̀ do' e,

⁸da' gɑ́ la' wap cyə́ é; wap lə piŋ gə yap tsʉ' thə kɛbəŋ

⁹pu lə kwɔk nɔk mkwə pfʉə bɔ ma' sì, mɑ kukù nɔk, nɔk yə pu ŋkhe é gɑ Diablə ba gɑ́ Sata a, mo yə e nwɔ' mnyə bi guŋ dzʉ̀ awɛ. Pu lə kwɔk e ma'si pu a guŋ pɑ aŋgəle pyə́ awɛ.

¹⁰A lə pɑ́ po'o ju' ta' gi kɛbə̀ŋ pɑwə gɔm gɑ: Yəŋ gɑ́ bɑ cwə̀ ywə vɔk cwə̀ tʉ́ɔ ba nə sa' Si yɔk pɑ, ba tʉɔ Kristo e, nə pa' e kwɔk nthɛmnɛ mfɑ pɔk pɑ. Ma' e si Mo yə́ e lə nthɛmnɛ map dzə̌ Si mɔkcʉ́ ba mtsʉ̌'.

¹¹Tə́ wap lě dó' shyə e shyə m nə́ mcyə mú jʉ̀jʉ̀ ba m nə ghɔm myə wap ŋkwinthɛ̌ nə́ gɑ: Wap lě tə kuŋ vɔk tsap tə la' wap pwɔk vʉ́.

¹²A po'o tə: Kɛbəŋ ŋwɛnyə ba wɔ pyə mla' mɔ bɑ nthʉm o a! Ghəghʉɔ bi po: cǎ' ba shyə̀ lɑpʉə. Nə pa' Sata bɑ e fi' sɔ' m bəŋ po pu a cɔk yɛ̌lúŋ nə pa' bɑ e zhyə gɑ yə cwə wuɔk.

¹³Pu kwɔk nɔk mkwə pfʉə tə́ ma' e si, e cʉm jʉ̌m mɑmjwi yə́ e lə tsə̌ mú mbɛ a, bɑ jəŋ é.

¹⁴Da' gɑ pu hɑ mbáp gwighə́m mɑbʉə bi mjwǐ bɔ, gɑ e nə ntha gɔ ghakgo, tsʉ' yə a bɑ pú yap bi e, gɑ e cwə tsʉ'u, pu khim e, tə gʉə sʉəsʉə nə nɔk, nə cwə, ba m nə mcwə, ba nə ta' kam nə cwə dəŋdəŋ mkam bʉə.

¹⁵A lə pɑ̌ po' nɔk wyɛ́'nyə pa' ta' shyə́ gwyə a jʉ̌m mɑmjwi po'o gɑ e fa nthʉm o.

¹⁶Da' gɑ cǎ' ghyɛ' shwə̌ e mi shyə yə nɔk mkwə pfʉə lə wyɛ́'nyə a.

¹⁷Nthʉm cɔk yɛluŋ e, nɔk mkwə pfʉə lə té shù nə bvʉ' ŋkhənyə mjwǐ bɔ: Pɔ pyə́ wap giŋ nə mcò' Si ba nə pa' Yeso gɔm a.

¹⁸A lə pɑ̌ po'o e cwə dəm mkwa'lɛ myə a nthəm shyə lɑpʉə a.