Read Ghomala New Testament APOKALIPSƏ 14 Bible Online

APOKALIPSƏ 14 - Ghomala New Testament bible

APOKALIPSƏ 14

¹Ŋ də pǐŋ jɔ: Mú jʉ̀jʉ̀ pɑ́ bɑ ě tiŋnyə dəm kuŋ Sion pu a pɔ sha' shwɔppfʉə po pfʉə m ŋkhə, bɑ pu və tso tsyə́ ba tsyə́ tap e nə mtsé map.

²Ŋ də pǐŋ ju' gi mo fɑ kɛbəŋ, pa' gì shyə lɑpʉə á, pa' nə vyə́ hɛbəŋ gwyə́ a; gi bɔ yə ŋ də bɑwə ju' a lə bɑwə hwə́ mzhwɔp pɑ pu' lə́ŋ. Wap pɑwə bu' lə́ŋ.

³Wap lə bɑwə jwɔp zhwɔpshyə sé dzə̌ leŋfo, dzə̌ mnɔm papfʉ̀ə pu a mghətso. Sɔmmo la tə́ ku' nə zhi'tə zhwɔpshyə bɔ tə ně da' pɔ sha' shwɔppfʉə mpo pfʉə m ŋkhə, pɔ pyə a bɑ pú lé shu' wap dəmcǎ' a.

⁴A bɑ wap ka lɑ pɑjwǐ bviŋ nɑ tsap nə pa' a bɑ wap lam jyə mjwǐ. Wap jap pɑ jʉ̌m mǔ jʉ̀jʉ̀ nə guŋ mtsʉ' awɛ myə e gɔ nə a. A bɑ pu lě shu' wap cəcɑ̌ pɔmnəŋ pa' dəŋdzə̀ nthɔ̌m bi Si a ba m bi mú jʉ̀jʉ̀.

⁵Wap bɑ pɔ tə bya, bɑ sɔm cwanwə lǎm nthəm shwə̌ pú.

⁶Ŋ də piŋ jɔ mu' aŋgəle e pɑwə nthá tə́ thə́. Ta' mcuŋ pɑpuŋ mama lə bɑ bi e e pɑwə siŋ bi pɔ pyə́ wap bɑ dəmcá' a, bi guŋ mgùŋ awɛ, bi guŋ mgwya awɛ, bi guŋ mghɔm awɛ, ba bi guŋ pɔ awɛ.

⁷E lə bɑwə gɔm nə gi nthʉɔtʉɔ gɑ: Po pwɔk Si, gu'tə e nə pa' cwə fyɛ' e bɑ a sɔ' a. Po ghamtə gɛ nyaptə kɛbəŋ pu cǎ', ba shyə lɑpʉə pu a msa'sǐ shyə.

⁸Mu' aŋgəle, batə yɑpʉə pɑ jʉ̀m é bɑwə gɔm gɑ: Ě vʉsi, e vʉsi Babilon gwyə́, yʉ́ yə e kɑ dɑ cɔk nwə ghap e nwɔ́k guŋ mgùŋ awɛ pa' mlu' a.

⁹Mu' aŋgəle batə yɑtá lɑ bɑ jʉm e gɔm nə gi nthʉɔtʉɔ gɑ: Mo ghamtə nɔm pu a fo' e, jap mtiŋ myə nə tsé tsyə kɑ nə pu e lə.

¹⁰Bɑ ba yú yə́ gɔ sɔ' nwə nə cɔk yɛluŋ si pa' mlu' a, mlu' bɑ pu nyəŋ tə ŋi'nyə nthʉm nthu' yɛ̌luŋ, e piŋ jɔ mɛnyə̀ nthʉ́m mɔk sufra dzə̌ pɑ aŋgəle dɔlɔ̌ ba dzə̌ mú jʉ̀jʉ̀.

¹¹Dhəmɔk mɛnyə yap ŋkwɔ' mgu' nəgu', wap lə pɑ́ gə hwitə̀ mɔkcʉ̌ ba mtsʉ̌', pɔ bɔ pyə wap gamtə́ nɔm pu fo' nɔm bɔ a, ba mo yə é ghə mtiŋ nɔm bɔ nə e a.

¹²Yə̌ŋ bɑ́ cwə yə́ pɔ pyə wap nthɔm mco' Si ba piŋnthʉm nə Yeso a gɔ kaktʉɔ a.

¹³Ŋ də pǐŋ ju' mu' gì kɛbəŋ ghɔm gɑ: Və gɑ: Tə fɑ cwəlɔ mpuŋtsé bɑ pɔ pyə wáp mpfʉ́ m nə Cyəpɔ a! Zhwenyə ghɔm gɑ: əŋ, wap hwitə́ nə mfa' map, nə pa' ywə yə wap lə fa' a jap jʉ̀m pu.

¹⁴Ŋ də pǐŋ jɔ: Jɔ mlwa fə́fə́, mo hwə pa' mú mo a pɑ bɑ ě cwə dəm o. A lə bɑ e su co'fo mtʉɔ gɔl thə e biŋ gwim nyə shɔkcɔ̌k nə shwa msɛ pu e.

¹⁵Mu' aŋgəle lə piŋ nthəm Dyə Si biŋ gɔm tɑ thə́ bi mo yə e lə bɑ dəm mlwa a gɑ: Nɔk nyə nə shwa msɛ́, shwa msɛ; cwə nə lɑ tsə sɔ'; tsə bɑ ǎ kwyə dəmcǎ'.

¹⁶A lə pɑ̌ po'o mo yə e lə bɑ́ dəm mlwa a ma' nyə nə shwa msɛ́ dəmcǎ', pu lɑ tsə dəmcǎ'.

¹⁷Mu' aŋgəle lə piŋ nthəm Dyə Si kɛbəŋ, e lə bɑ ba yʉ́ yə́ wim nyə shɔkcɔ̌k nə shwa gəfɑ pú e.

¹⁸Mu' aŋgəle lə piŋ nthəm yə tsʉ' nə tó tsə pwɔ'. A lə bɑ e ghə tʉ̀ɔ nə mɔk. E lə piŋ shwe tə thə́ bi mo yə a lə bɑ ě wim nyə shɔkcɔ̌k nə shwa msɛ́ pu e a gɑ: Ma' nyə shɔkcɔ̌k o nə shwa msɛ́ nə ja'tə mcɛ mbɛ mthə́ mlu' dəmcǎ', nə pa' bɛ tsyə tsə́ kwyə.

¹⁹A lə pɑ̌ po'o, aŋgəle ma' nyə e dəmcǎ' nə shwa mcɛ bɛ mthə mlu' dəmcǎ', biŋ ma' nthʉm mɑ kɔp yɛ̌luŋ Si.

²⁰Pú lə tě kɔp bɔ nthʉm gùŋ, mcyə piŋ nthəm nthʉm kɔp bɔ bʉɔ tə ŋkhəm nə nthə tʉ́ɔ shwə nɔmlěŋ, biŋ sɛ nə mstadə sha' mŋkhənthɔk.