Read Ghomala New Testament APOKALIPSƏ 16 Bible Online

APOKALIPSƏ 16 - Ghomala New Testament bible

APOKALIPSƏ 16

¹Ŋ də́ yu' mu' mɑ gi mo nthʉm Dyə Si pɑwə gɔm bi pɑ aŋgəle sɔmbʉə gɑ: Po ghɔ pfyə mnthu' yɛ̌luŋ Si sɔmbʉə dəmcǎ'.

²Dəŋdzə e lə ghɔ biŋ pfyə́ yə́ nthu' dəmcǎ': Ta' shwə ywə́ cwəpuŋ tɔm nə pɔ pyə wap lə bɑ wap ghə mtiŋ nɔm bɔ nə pu biŋ bɑwə gamtə fo' e a.

³Batə yɑpʉə lə́ pfyə yə nthu' dəm shyə lɑpʉə shyə lɑpʉə cʉ' pa' mcyə́ pfə mo a, guŋ tsə awɛ tsyə a lə bɑ nthʉm o bɑ jwenyə a pfʉtə.

⁴Batə yɑtá lə́ pfyə yə nthu' dəm mta'mta' shyə pu a msa'sǐ shyə. A pʉɔ shʉ' mcyə.

⁵Biŋ ju' aŋgəle mshyə ghɔm gɑ: O bɑ dəŋdəŋ, wə yə o bɑ, wə yə o lə bɑ, wə Dɔlɔ̌ nə pa' o gə po'o pɑ́ nwə dəŋdəŋ o.

⁶Nə pa' wap lə pfyə mcyə pɔ dɔlɔ̌ ba mghɔm ghɔm Si o piŋ hɑ pɑ mcyə gɑ wap nwə́. A ywə yə a ku' nə pú a.

⁷Ŋ də pǐŋ ju' tsʉ' tó tsə pwɔ' pɑwə gɔm gɑ: Əŋ m Cyəpɔ yu nə fyɛ' bɑ dəŋdəŋ bɑ nyənyɔ lo nə́.

⁸Batə aŋgəle yapfʉə lə pfyə́ yə nthu' nə nam, a hɑ bi nam gɑ e lɑ mɔk e ntho pɔmnəŋ.

⁹Tsʉ hwehwě piŋ ntho pɔmnəŋ: Wap captə tso Si yə a bɑ ě ghə tʉ̀ɔ nə mghəghʉɔ a la' wap pʉɔtʉm tsap gu'tə́ e pɑ́.

¹⁰Batə aŋgəle yɑtɔ lə pfyə̌ nthu' e nə léŋfo nɔ̀m, nəfo tsyə́ ko nthʉm jʉ́m. Pɔmnəŋ ləm mtʉm map nthʉm go'.

¹¹A cyə m nə go' yap pu a mshwətsə map wap cap Si kɛbəŋ, da' gɑ la' wap kwyəpnyə nə mfa' map.

¹²Batə aŋgəle nthɔk lə pfyə yə nthu' nə ta' shyə Efrata. Shyə yə́m nə́ nyaptə məjyə bi mfo pyə wap fɑ m ghə̌ŋ nthəmnam a.

¹³Ŋ də yɔ mzhwenyə cwəpuŋ mɑntha pa' mtɔ̀m a tə́m shwə̌ nɔk mkwə pfʉə, ba m shwə̌ nɔ̀m ba m shwə̌ mghɔm ghɔm Si cwanwə.

¹⁴A bɑ mzhwenyə Sata. Wap nthe msya, biŋ gɔ jɔ mfomfo awɛ nthʉm dzʉ shu'tə nə shù tyɛ'dzʉ́ gwyə Si Nthʉɔtʉɔ.

¹⁵Yɔ gɑ̌ wə sɔ' pa' shǔŋ a. Buŋtsě bɑ mo yə e di tə ti, bɑ dwɔ' mdzə myə po'o gɑ e kɑ sɔ' gɔ tə kwa dzə, pu yɔ kuso é a.

¹⁶E shu'tə wap nə tsʉ' yə́ pu ŋkhe nə Ebraika gɑ: Harmagədon.

¹⁷Batə aŋgəle sɔmbʉə lə pfyə̌ yə nthu' thə́. Mu' gi nthʉɔtʉɔ fɑ Dyə Si gɔm gɑ: A ku'!

¹⁸A pɑ po'o mpəpa'bə̀ŋ təm, ba mgì pɔmnəŋ pu a mhɛbə̀ŋ ba mu' nthi cǎ' nə cu'nyə yə a la m bɑ tə fɑ pa' mo pɑ̌ dəmcǎ' a.

¹⁹Tisuŋ gwyə po' mkam ntha ba mtisuŋ nə́ mguŋ vʉtəsi. A pɑ́ po'o Si kamtə Babilon gwyə, hɑ nthǔ' yə yɛ̌lúŋ e bɑ nthʉm o sə a bi e.

²⁰Guŋ mgùŋ dəm shyə awɛ lə kʉ, mkǔŋgó simnyə.

²¹Bakbak mwé lə fɑ̌ kɛbəŋ shʉmtə́ dəm pɔmnəŋ pa' mwɔ' a, pɔmnəŋ pɑ shap Si shyə́ m nə go' mwe bɔ, nə pa' gǒ' bɔ lə bɑwə jɛ́ te' o.