Read Ghomala New Testament APOKALIPSƏ 18 Bible Online

APOKALIPSƏ 18 - Ghomala New Testament bible

APOKALIPSƏ 18

¹Ŋ də piŋ jɔ mu' ta' aŋgəle fi' fɑ kɛbəŋ. A lə bɑ e ghə kwa' tʉɔ gwyə, ghu'tə e piŋ bɑwə ŋkhyɛ' dəmcǎ'.

²E lə cwé tə thə́ gɑ: Babilon vʉ̀, Babilon vʉ̀ Babilon gwyə. E bɑ e cʉ' tsʉ' cwə̌ msata tsʉ' cwə̌ mzhwenyə cwəpuŋ, tsʉ' cwə́ msəŋ mviŋ, msəŋ cwəpùŋ.

³Nə pa' a bɑ ě hɑ mlu' yɛlúŋ shɔkcɔ̌k ghap bi mgùŋ. A bɑ pu a fo dəmcǎ' ghə ghap. Pɑ tɛmtɔ dəmcǎ' lɑ gʉ' potsə tsyə ji.

⁴Ŋ də pǐŋ ju' mu' gì a pɑ́ kɛbəŋ gɔm gɑ: Po tə́m nthʉm tisuŋ yəŋ m pɔ pɑ̀, bwɔk gɑ po kɑ ko nə mhɔnwə map, a go' yə ǎ wə gɔ sɔ' nə pú a sɔ' ŋkho ba m nə́ po yɔ.

⁵Nə pa' mhɔnwə myə cwɔptə tə́ ŋkhəm kɛbəŋ, tə Si kamtə mnwə tə tiŋnyə myə.

⁶Po lɑ pɑ ŋkhap e nùŋ ŋkhap bi e, po pa' ywə yə e lə ghə a bi e mcʉm bʉə. Nthʉm nthú' yə e lə nyəŋ mlu' myə́ nə a, po nyəŋ nə mcʉm bʉə.

⁷Dəŋ yə pu lə ghu'tə e pu a pa' pu lə nə ŋkhuŋ é a, a dəŋ po'o tə́ pu gɔ hɑ ghəghʉɔ bi e pu a shyə́tsə́. Nə pa' e bɑwə gɔm nthʉ́m tʉ́m e gɑ: Gɑ̌ wə shwə tsɑ̌ pa' mɑfo a, ŋ də piŋ bɑ tsɑ̌ npfɔk, bi a pɑ̀ ŋ də la' dɔ.

⁸A po'o tə́ guŋ gǒ' awɛ yə́ pu jap bi a gɔ sɔ́' sɔ' nə e pɑ nə́ ta' tyɛ'dzʉ́. Gǒ' bɔ bɑ vʉ, nə lɔ̀, jikǔ', a ba mɔk piŋ ŋkhə́ é. Nə pa Cyəpɔ Si yə e fyɛ' e a bɑ Si nthʉɔtʉɔ.

⁹A pɑ po'o mfo pyə pu a pu lə gə ghap a nə yɔ pa' mɔk ŋkhə́ e a dɔ̌, bɑ dzɔp nɑ tsap.

¹⁰Wap gɔ sɔ' pɑ pwɔk nə yɔgǒ' pa' yʉ a tiŋnyə gʉ́ə sʉəsʉə pɑ ghɔm gɑ: Ghəghʉɔ! Ghəghʉɔ! Wə tisuŋ gwyə, Babilon tisuŋ nthʉɔtʉɔ a yɑ́ bɑ da' ta' nam ku' nə nə fyɛ' o.

¹¹A pɑ tɛmtɔ dəmcǎ' pɑ dɔ́ tə́ dəŋvʉ́ nə pa' sɔmmo tə́ yɑwə́ jo dù tsə mtɔ tsap pɑ́,

¹²du tsə mtɔ tʉɔ gɔl ba tʉ̌ɔ ŋkhap, mwɔ' tʉɔdəŋ ba mtsə́dzə́, dzə́ nə̌m pu a dzə dap cwəcwə, ba dap dəŋnyələŋnyə. Ŋkwyə́ damnyəlamnyə ba tsə́ msuŋ só, ŋkwyə́ tʉɔdəŋ, mtʉ̌ɔ kwɛ ba mwɔ' mkwyəŋ.

¹³Tsə və̀ pu a jap pɑpuŋ, mwɑ́ damnyəlamnyə pu a mirta ba phə̀ nthoto; mlu', mwɑ̌, msɛ nthinthi, mná' pu a mjʉ̀jʉ̀, ba mlěŋ pu a mkalɛk. Mkwɔ pu a mpù'.

¹⁴Nthɔ̌m mthə myə tʉm tsǔ shəŋ a kʉ̌ o gɔ gʉə sʉəsʉə, o pi guŋ mzhwimzhwi pu a tsə dəŋnyələŋnyə. Pu tə gɔ la'tə kwi' yɔ ma pɑ́.

¹⁵Pɑ tɛmtɔ pyə e lə lɑ mtɔ myə gə wap zhi a gɔ sɔ' pɑ pwɔk go' e, tiŋnyə tə gʉə sʉəsʉə pɑ ghɔm m̀ nthʉ̌m lɔ pu a vʉ̌ gɑ:

¹⁶Ghəghʉɔ! Ghəghʉɔ! Tisuŋ gwyə wə yə a lə bɑ ǒ kwa dzə dap nthʉɔ dzə nə̌m, pəpɛ dzə́ dəŋnyələŋnyə, a pɑwə dəŋnyə pa' tʉɔ gɔl a, mwɔ' tʉɔdəŋ pu a mtsə́dzə́.

¹⁷Da' ta' nam nə ku' nə nə simnyə guŋ dəŋ fʉ̀' yə̌ŋ! A pǐŋ bɑ po'o, guŋ pɑ fəŋ kənu' awɛ, guŋ pɔ pyə wap bɑ dəm shyə́ giŋnyə tsʉ'u a, guŋ mghɛ fa' nthʉm kənu' pu a guŋ pɔ awɛ pyə wap bvɔk yap pɑ nə shyə lɑpʉə a lɑ nə yɔ dhəmɔk yə a lə bɑwə ŋkhə́ e a, nthiŋnyə gʉə sʉəsʉə,

¹⁸ba shwé gɔm gɑ: Yá tisuŋ lə bɑ pa' tisuŋ gwyə a?

¹⁹Wap lə cǐ' vɔp thə pú, shwe, nthe shyətsə́ dɔ vʉ́ bɑ gɔm gɑ: Ghəghʉɔ! Ghəghʉɔ! Tisuŋ gwyə yə tsə fʉ' tsyə lə ghə guŋ pɔ pyə wap gə mkənu' dəm shyə lɑpʉə zhi a, da' ta' nam nə ku' nə nə simnyə e awɛ.

²⁰Ŋwɛnyə́ pa' ǎ sa'tə a mkɛbəŋ! Ba wɔ yɔ pɔ dɔlɔ̌, mghɛ nthəm ba mghɔ́m ghɔm Si ŋwɛnyə́ nə pa' Si nə fyɛ' e, bhəkam yɔ pɑpúŋ!

²¹A lə pɑ̌ po'o mu' ta' aŋgəle nthʉɔtʉɔ kwa mu' gwɔ' pa' gwɔ' msɛ a ma' shyə nə ma' gɔm gɑ: Pu gɔ sɔ' ma' Babilon shyə́ pɑ́ po'o, a tisuŋ gwyə. Pu tə́ gɔ sɔ' piŋ yɔ e pɑ.

²²Pu tə gɔ sɔ' piŋ yu' mzhwɔpshyə pɑ pu' lə́ŋ pu a mghɛ zhwɔp, pɑ́ túŋ dúŋ pu a pɑ tuŋ nthɛ ywə o pɑ̀. Sɔm gɛ və̀ nə sɔm nthi və tə́ gɔ sɔ' pɑ ywə́ o pɑ. Pu lə piŋ ju' gi lə̀ŋ msɛ ywə́ o.

²³Ŋkha' lambu tə́ gɔ sɔ' piŋ kyɛ' ywə o pɑ. Pu tə gɔ sɔ' piŋ yu' gi tá jwigʉɔ pu jwigʉɔ ywə o pɑ, nə pa' pɑ tɛ mtɔ pǔ lə́ bɑ pɔ gwyə́gwyə́ dəmcǎ', bɑ tsə kɛ tsǔ lě fʉ guŋ mgùŋ awɛ,

²⁴pú piŋ jɔ mcyə́ mghɔ́m ghɔm Si, mcyə́ pɔ dɔlɔ̌ ba myə pɔ pyə pu lə zhwətə́ wap dəmcǎ' ywə́ o a.