Read Ghomala New Testament APOKALIPSƏ 2 Bible Online

APOKALIPSƏ 2 - Ghomala New Testament bible

APOKALIPSƏ 2

¹Və bi aŋgəle cu'tə pɔ Kristo yə a Efeso a gɑ: Mo yə́ e gwim msɛ́ sɔmbʉə nə pú tʉɔ é, mo yə e wə giŋ cəcɑ́ mkwɔ' lambú gɔl a ghɔm gɑ:

²Gɑ̌ zhyə́ mfa' mǔ, ywə yə o gə a, ba yù nə kaktʉɔ̀, nə pa' bi a pɑ́ o lə piŋ pɔ cwəpuŋ. A bɑ ǒ ləŋtə pɔ pyə wap gɔm gɑ wap bɑ mghɛ nthəm tə́ la' wap pɑ mghɛ nthəm a, jɔ gɑ́ wap bɑ mcwanwə̀.

³A bɑ ǒ ghə kaktʉɔ̀: O yɔgo' nə tso tsɑ̌, la' o pwá.

⁴Tə́ gɑ̌ wə da' o gɑ ǒ wa' dəŋdzə gʉ' ŋkhuŋnyə o

⁵Kamtə tsʉ' yə́ o bvʉsi nə a, ŋkwyəpnyə biŋ fa' mfà' myə o lə ji fa' a. A tak tə pɑ̌ po'o, bɑ gɑ̌ gɔ sɔ' bu, bi a pɑ gɑ́ o ka kwyəpnyə, bɑ gɑ gɔ te yu kwɔ' lambù nə tsʉ' e.

⁶Tə́ ywə yə o gə a pɑ́ ywə pɑpúŋ a bɑ gɑ́: O bɔ mfa' pɑ Nikolaista pa' ba myə yɑ̌ gɑ̌ bɔ mfa' bɔ a.

⁷Mo yə́ ě ghə mtəŋ a yu' ywə yə zhwenyə gɔm bi mcu'tə pɔ Kristo a. Bi mo yə ě ló' tə́ shyə́ a, gɑ̌ gɔ hɑ́ yə́ nə thə́ vɔk yə a nthʉm paradisi Si a bi é, e pfɑ.

⁸Və bi aŋgəle cu'tə pɔ Kristo yə ǎ Smirna a gɑ: Dəŋdzə́ biŋ bɑ Jʉɔjʉ̀m, mo yə e lə pfʉ̌ da' gɑ́ biŋ jám nə vʉ̌ a ghɔm gɑ:

⁹Gɑ̌ zhyə́ go' o ba pəŋ o, da' gɑ́ o bɑ gɛ ywə́; jyə́ ba mnɛ́ pɔ pyə wap gɔm gɑ́ wap bɑ́ pɑ Yudea a. Wap tə bɑ pɑ Yudea pɑ, a bɑ Sinagogə Sata.

¹⁰Kɑ pwɔk go' yə o gɔ yɔ a. Nə pa' Sata gɔ ma' pɔ pǔ dyəcɛ̌ nə ləŋtə o, ləŋtə o po' nə mtyɛ'dzʉ ghǎm. Pɑ́ nyənyɔ tə́ ŋkhəm tyɛ' vʉ́ a biŋ sɔ' hɑ co'fo vɔk bu.

¹¹Mo yə ě ghə mtə́ŋ a yu' ywə yə zhwenyə gɔm bi mcu'tə pɔ Kristo a. Mo yə e lo' tə shyə́ a tə́ gɔ sɔ' piŋ yɔgo' batə vʉ̌ tsɑpʉə pɑ́.

¹²Və bi aŋgəle cu'tə pɔ Kristo yə ǎ Pergamo a gɑ: Mo yə a bɑ e wim nyə mcɔk bʉə a ghɔm gɑ:

¹³Gɑ̌ zhyə́ tsʉ' yə o shwə nə́ a, a bɑ́ tsʉ' yə leŋfo Sata bɑ́ nə a: Tə́ o jɑwə́ dɑ́ nɑ o pɑ́ nə tso tsɑ̌, bɑ o lě tə kəŋnyə piŋnthʉm a ba m nə́ mtyɛ'dzʉ́ myə pu lə zhwə́ Antipas, ŋkwinthɛ̌ a yə nyənyɔ wə po, tsʉ' yə Sata shwə nə a.

¹⁴Tə gɑ̌ wə baptə o nə ta' ywə: A pɑ́ gɑ shɑ pɔ bɑ wə o bɑwə́ nthɔm nwə Balaam yəŋ yə́ e lə tɔk Balak gɑ́ e tʉ'yo' nə pǒ pɑ Israɛl po'o nə nthənyə wap gɑ́ wap pfɑ bap yə a bɑ pu nə núŋpwɔ' bi mkətwɔk a po'o gɑ wap ghə ghap.

¹⁵Ba shɑ́ pɔ kwi' bɑ wə o bɑwə nthɔm nwə pɑ Nikolaista.

¹⁶Kwyəpnyə! A tak po'o bɑ gɑ̌ wə sɔ̌' m bu nə mu da', lɑ nyə mcɔk bʉ̌ə yə ǎ shwə m a nə lo' wap.

¹⁷Mo yə e ghə mtə́ŋ a, yu' ywə yə́ Zhwenyə gɔm bi mcu'tə pɔ Kristo a. Mo yə é lo' tə shyə́ a, bɑ gɑ̌ gɔ sɔ' hɑ́ mana dʉmnyətʉmnyə bi e; gɑ gɔ sɔ' hɑ́ ta' gwɔ' fə́fə́ bi e, bɑ pú və mu' tso sə́ nə́ tsyə sɔmmo ka zhyə tsá á tə ně da' mo yə́ e ŋkwi gwɔ' bɔ a.

¹⁸Və bi aŋgəle cu'tə pɔ Kristo yə ǎ Tiatira a gɑ: Mú Si, mo yə mnyə́ myə́ bɑ́ pa' gwa mɔk hwehwě a, mkwə myə́ pɑ́ pa' tʉ́ɔ tsyə pu nə nyap mkwɛ pǔ a, ghɔm gɑ:

¹⁹Gɑ̌ zhyə́ mfa' mǔ, jyə́ ŋkhuŋnyə o, jyə́ piŋnthʉm o, ywə yə o gə a, ba kaktʉɔ o; mfa' mǔ myə dzə̀ cyə́ myə́ jʉm.

²⁰Tə́ gɑ wə nthe bya nə o nə pa' o nthak Yezabɛl mjwǐ yəŋ yə́ e ŋkhe nɑ é gɑ gɔm ghɔm Si bɑ gə mghɛ fa' pɑ̌ hɔ mə́jyə, bɑ̀ ji'tə wáp nə ghə ghàp, biŋ bɑ mpfɑ́ bap yə pú nə nuŋpwɔ' bi mkətwɔk a pɑ bəŋ o.

²¹Ŋ də tak cwə bi e gɑ e nə ŋkwyə́pnyə, da' gɑ e tə wə shəŋ nə kwyəpnyə nə́ nwə ghap pɑ.

²²Yɔ! Gɑ̌ gɔ ma' e kodyə ghəghʉɔ dzə́zə́ pu a msǒ ghap pyə; tə́ né da' yə wap kwyəpnyə nə mfa' map a.

²³Gɑ̌ gɔ sɔ' lɑ vʉ cwɔ pó pyə́; a pɑ́ po'o guŋ mcu'tə pɔ Kristo zhyə́ gɑ́ gɑ̌ bɑ́ mo yə́ e jɔ ywə vʉ' mo ba m nthʉ̀m tʉm e a; a bǎ bi ya mo lə́ nə́ po a hɑ́ yə́ pɑ́ dəŋ mfa' myə.

²⁴Tə́ sɔ' m nə wɔ pyə po yɑ̌ Tiatira tə wuŋ biŋ zhinwə futə bɔ, bɑ po ka nəŋ shəŋ nə zhyə ywə yə pɔ bɔ ŋkhe gɑ tʉmnyə nwə Sata, ywə gɑ gɔm a bɑ gɑ: ŋ tə gɔ yap mu' pi də̌m po pɑ.

²⁵Da' gɑ ywə yə ǎ bi po a, po tɔm a pǔŋ, tə́ ŋkhəm cwə yə gɑ̌ sɔ' a.

²⁶Mo yə e lo' tə shyə́ a, mo yə ě tɔm mfa' mə̌ tə́ ŋkhəm nə́ nə́ miŋ a, gɑ̌ gɔ sɔ' hɑ tʉ̀ɔ bi e nə mgùŋ,

²⁷e piŋ bɑ dɑ shɔm tʉɔ̌ dɑ wap gɔ ŋkhim wap, pɑ́ sɔ wap pa' pu sɔ́ mkətu' cǎ',

²⁸dəŋdəŋ pa' Tá nə hɑ tʉɔ bəm a, piŋ hɑ sɛ́ bhə́ dzʉ̌ bi e.

²⁹Mo yə ě ghə mtə́ŋ a é yu' ywə yə zhwényə gɔm bi mcu'tə pɔ Kristo a.