Read Ghomala New Testament APOKALIPSƏ 21 Bible Online

APOKALIPSƏ 21 - Ghomala New Testament bible

APOKALIPSƏ 21

¹A lə pɑ̌ po'o ŋ jɔ kɛbə̀ŋ pu cǎ' sə́, nə pa' dzə́ kɛbəŋ pu dzə́ cǎ' lə bɑ ǎ mì, ba shyə lɑpʉə lə piŋ jɑwə́.

²Ŋ də yɔ tisuŋ dɔlɔ̌, Yerusalɛm sə́ fi' fɑ kɛbə̀ŋ bə́ŋ Si, bɑ pu kwiŋ e pa' jwigʉɔ yə pu gɔ hɑ e bi dhə e a.

³Ŋ də piŋ ju' gì nthʉɔtʉɔ a fɑ bə̌ŋ leŋfo gɔm gɑ: Yɔ nthap Si pu a pɔmnəŋ yə̌ŋ. Pu a pu gɔ pɑ pəmtə́ cwə. Wap gɔ sɔ' pɑ pɔ pyə, é pɑ Si yə pu a pu gɔ pɑ pəmtə cwə a.

⁴E gɔ sɔ' ci' guŋ shyətsə́ awɛ nə́ mnyə́ map. Vʉ̌ tə gɔ sɔ' piŋ pɑwə pɑ́. Nə́ lɔ ba nə cwé kə gǒ' lə tə́ gɔ sɔ' piŋ pɑwə pɑ́, nə pa' bvo dzʉ̌ bɑ ǎ cyə.

⁵A lə pɑ̌ po'o mo yə e bɑ dəm leŋfo a ghɔm gɑ: Yɔ, gɑ̌ gɔ ghə gùŋ tsə́ awɛ pɑ m sə́. E lə pǐŋ gɔm gɑ: Və̌: Mghɔm mɔ gɑ bɑ́ kwa' ma biŋ bɑ nyənyɔ.

⁶E lə pǐŋ gɔm bəm gɑ: Nwə̌ pəmtə̀. Gɑ̌ bɑ́ Alfa biŋ bɑ́ Omega, nə́ to' ba nə́ miŋ. Bi mo yə ji shyə̌ wə jɛ́ e a, gɑ gɔ hɑ sa'sǐ shyə́ vɔk bi e néné.

⁷Mo yə ě cyə shù a gɔ sɔ' kwi tsə́ mcʉ' mɔ̌ a biŋ bɑ́ Si é, e pɑ́ mú à.

⁸Tə́ sɔ' nə mcwɔ̌'to, nə pɑ tə piŋ, pɑ ghə mɑ̀ cwəpùŋ, pɑ zhwə pɔmnəŋ, pɑ tə kuso, nə mghɛ sʉə, pɑ ghamtə mkətwɔk ba mcwanwə̀, yap tsʉ' bɑ m nthʉ̌m tamshyə́ mɔk pu sufra. A bɑ batə vʉ̌ yɑpʉə.

⁹A lə pɑ̌ po'o mu' aŋgəle nə m aŋgəle sɔmbʉə pyə wap lə́ bɑ wap wim mnthu' sɔmbʉə myə jʉ̀m ghəghʉɔ lə́ bɑ nthʉm o a sɔ' gɔm bəm gɑ: Sɔ̌', gɑ gɔ la'tə o mú gò, jwigʉɔ mú jʉ̀jʉ̀.

¹⁰E lə kwa a m nthʉm zhwenyə nə gɔ dəm mu' mɑ sʉəsʉə kúŋ, da'tə a tisuŋ dɔlɔ̌, Yerusalɛm yə a lə fi' fɑ m kɛbə̀ŋ bə́ŋ Si a.

¹¹A lə bɑwə də́ŋnyə pɑ kwa' ghu'tə Si. Sɛ̀ e lə bɑwə shwə pa' ləŋnyə gwɔ' tʉɔdəŋ a pa' gwɔ' msɔmmsɔ̀m pa' mwe bəŋ a.

¹²A lə bɑ pu pəm kwa' mɑ kəpu' sʉəsʉə sakpé nə dzam. Mjyədyə̌ lə bɑ nə́ shwɔppʉə mghǎm, m aŋgəle shwɔppʉə mghǎm lə bɑ nə mjyədyə̌ bɔ, ba mtsǒ bɑ pu və nə: Mtsǒ gwya Israɛl shwɔppʉə mgham.

¹³Mjyədyə̌ lə bɑ nə ghə̌ŋ binam mənthá, bɑ nə ghə̌ŋ shyə́ gùŋ məntha, bɑ nə ghə̌ŋ mto dzʉ mənthá, bɑ̀ ghə́ŋ nthəmnam mənthá.

¹⁴Msakpé tisuŋ bɔ lə bɑ a ghə mŋkhɛ shwɔppʉə mghǎm, bɑ pú və mtsó mghɛ nthəm mu jʉ̀jʉ̀ shwɔppʉə mgham.

¹⁵Mo yə e lə bɑwə gɔm nwə bəm a lə bɑ ě tɔm ywə nə fo' ywə, a pɑ kam ka' tʉɔ gɔl, nə nə fo' tisuŋ ba mjyədyə́ myə́ pu a msakpé myə́.

¹⁶Tisuŋ bɔ lə bɑ msak pfʉə dəŋdəŋ nthə e pu lɔm e pɑ́ pɑ dəŋdəŋ; E lə́ lɑ ka' fǒ', a təm mstadə shǎ' shwɔppʉə mghǎm. Lɔm e pu a kəm e lə bɑ pɑ dəŋdəŋ.

¹⁷E lə fǒ' msakpé, a təm mnthə́ fo' pú mo shwɔppfʉə mpopfʉə m ŋkhə́, fo' ywə mo yə aŋgəle nə fo' ywə a.

¹⁸Tsə nə ŋkwɑ msakpe bɔ lə bɑ Yaspɛr tisuŋ bɔ piŋ bɑ gɔl tə bya, bɑwə hwə́ msɔm mwé bə̀ŋ.

¹⁹Mŋkhɛ cyə́ msakpe tisuŋ bɔ lə bɑ pu lɑ mwɔ' tʉɔdəŋ nthinthi nə nyəŋ msəm nə́. Də̀ŋdzə ŋkhɛ cyə́ é lə bɑ Yaspɛr, batə yɑpʉə pɑ safir, batə yɑtá pɑ kalkedon, batə yápfʉə pɑ smaragdo

²⁰batə yɑtɔ pɑ sardius, batə nthɔk pɑ kardi, batə sɔmbʉə pɑ krisolito, batə hɔ̌m pɑ berito, batə vʉ̌' pɑ topaso, batə ghǎm pɑ krisopaso, batə shwɔp yɑmu' pɑ yakinto, batə shwɔppʉə mgham pɑ ametisto.

²¹Mjyədyə̌ shwɔppʉə mghǎm lə bɑ mtsə́dzə́ shwɔppʉə mghǎm. Bǎ ya jyədyə̌ lə lə́ bɑ pɑ ta' tsə́. Tsʉ' tisuŋ piŋ bɑ pa' gɔl tə bya pa' msɔm mwe bəŋ a.

²²Da' gɑ ŋ da tə yɔ Dyə Si nthʉm tisuŋ bɔ. Nə pa' Dyə Si bɑ Cyəpɔ, Si Nthʉɔtʉɔ, bɑ mú jʉ̀jʉ̀.

²³Tisuŋ bɔ tə́ shəŋ nàm kə mɑŋwə́ tə́ nə yɔ tsʉ' pɑ nə pa' ghu'tə Si ŋkhyɛ' e, gwa mɔk e pɑ mú jʉ̀jʉ̀.

²⁴Mgùŋ gɔ sɔ' pɑ ghiŋ pɑ nə ŋkha' e, a mfo dəmcǎ' pɑ dɑ ghu'tə sɔ' bi e.

²⁵Pu tə gɔ sɔ' vi' mjyədyə̌ myə́ nə sɔm tyɛ' pɑ́, nə pa' mtsʉ̌' tə gɔ sɔ' pɑ tsʉ̌'u pɑ́.

²⁶Pu gɔ sɔ' lɑ ghu'tə pu a mku' gùŋ nə sɔ' tsʉ̌'u.

²⁷Sɔmywə mviŋ tə́ gɔ sɔ' ko tsʉ'u pɑ kə sɔm gənwə cwəpuŋ kə shwanwə lə. Da' pɔ pyə a bɑ pu və wap nthʉm ŋwa'nyə mú jʉ̀jʉ̀ a nə gɔ sɔ' ko tsʉ'u.