Read Ghomala New Testament APOKALIPSƏ 22 Bible Online

APOKALIPSƏ 22 - Ghomala New Testament bible

APOKALIPSƏ 22

¹E lə piŋ da'tə a mu' mɑ ta' shyə dzəŋtsə̌ŋ, a pɑwə dəŋnyə pa' mwé bəŋ a, bɑwə nthəm nə leŋfo Si pu mú jʉ̀jʉ̀.

²Ta' thə́ vɔk lə bɑ tùŋ tsʉ'u, bɑ shyə bɔ hap ji mta' pʉə nyəŋ e túŋ. Ta' thə vɔk bɔ lə jam nthɔm, mcʉm shwɔppʉə mgham, bɑ jam pɑ nə ŋwə́, pú piŋ bɑ dɑ mhwə́ myə ba mgùŋ.

³Do tə́ gɔ sɔ' piŋ pɑwə pɑ. Leŋfo Si pu mú jʉ̀jʉ̀ gɔ sɔ' pɑ nthʉm tisuŋ bɔ, mghɛ fa' pyə pɑ se e.

⁴Wap gɔ sɔ' yɔ sə é, a tso tsyə pɑ nə tsé tsap.

⁵Mtsʉ̌' tə gɔ sɔ' piŋ pɑwə pɑ, a sɔmmo lə piŋ shəŋ ŋkha' gwa mɔk, kə ŋkha' nam lə́. Nə pa' Cyəpɔ Si gɔ sɔ' pɑ sɛ ŋkha' e nə pu, wap pɑ sa'dzʉ mgu'nəgu'.

⁶E lə piŋ gɔm bəm gɑ: Mghɔm mɔ bɑ mghɔm tə kwyəpnyə biŋ bɑ nyənyɔ; Cyəpɔ, Si mzhwenyə mghɔm ghɔm Si bɑ ě təm aŋgəle e gɑ e la'tə ywə yə a wə gɔ wuŋ sɔ' a bi mghɛ fa' pyə́.

⁷Yɔ, gɑ̌ wə gúŋ sɔ'. Buŋtsě bɑ mo yə e tɔm mghɔ̀m pɑ ghɔ́m ghɔm Si myə ǎ nthʉm ŋwa'nyə yəŋ gɑ a.

⁸Myə̀ Yohane, gɑ̌ bɑ́ gɑ̌ yu' biŋ jɔ ywə bɔ̌. Ŋ də piŋ tə́ ju' biŋ jɔ, ŋkham mkwi'tə si dzə̌ aŋgəle yə e lə la'tə a ywə bɔ a nə ghamtə e.

⁹Da' gɑ e ghɔm bəm gɑ: pɔm tə ghə pa'! Gɑ̌ bɑ so fa' o, ba yə mfɑ pǔ pɑ ghɔ́m ghɔm Si ba pɔ pyə wap nthɔm mghɔm ŋwa'nyə yəŋ gɑ́ a. O gɔ ghamtə pɑ da' Si.

¹⁰E lə piŋ gɔm bəm gɑ: Kɑ tʉm mghɔm mghɔ́m ghɔm Si myə ǎ nthʉm ŋwa'nyə yəŋ a, nə pa' cwə wə bɑ ǎ ghɔptə.

¹¹Mo yə e tə́ gə nwə dəŋdəŋ a pɑ lɑ tsiŋnyə nwə e gɔ dzə, mviŋmviŋ mo lɑ mviŋ myə gɔ dzə̀; da' gɑ mo dəŋdəŋ lɑ nwə dəŋdəŋ gɔ dzə̀, mo dɔlɔ̌ cəŋtə dɔnyə.

¹²Yɔ, gɑ̌ wə gúŋ sɔ̌', piŋ nə sɔ' ghə mcwɔ'fa', pɑ́ hɑ bǎ myə wɑlɑ́ m nə mfa' myə.

¹³Gɑ̌ bɑ Alfa biŋ bɑ Omega, Dəŋdzə̀ biŋ bɑ Jʉɔjʉ̀m, nə to' biŋ bɑ nə mìŋ.

¹⁴Mpuŋtsé bɑ pɔ pyə wap sɔk msʉəsʉə dzə́ map po'o gɑ yap tsʉ' pɑ nə thə́ vɔk, a wap piŋ shyə mjyədyə̌ tə́ ŋkho tisuŋ a.

¹⁵Mbvʉ̌ təm pu a mghɛsʉə̀, pu a pɑ tə kuso, ba pɑ zhwə pɔ̀, pu a pɑ ghamtə kətwɔk, ba mo yə e fa' pɑ cwanwə a.

¹⁶Myə Yeso, gɑ̌ təm aŋgəle a gɑ e lɑ yəŋ gɑ kwǐnthɛ́ nə cu'tə pɔ Kristo nə sɔ' bi po. Gɑ̌ bɑ twɔp gwya David. Sɛ́ bhə dzʉ̌ dəŋnyələŋnyə.

¹⁷Zhwenyə pu jwigʉɔ ghɔm gɑ: Sɔ̌'! Mo yə ě yu' a ghɔm gɑ: Sɔ̌'. Mo yə ghak e khə a sɔ̌'. A mo yə e kuŋ a kwishyə vɔk něné.

¹⁸Gɑ̌ wə gɔm bǎ bi yɑ mo lə́ yə ě yu' ghɔm mghɔ́m ghɔm Si tsɔ nthʉ̀m ŋwa'nyə a gɑ: Mo yə ě kwi' ywə nə a, bɑ Si gɔ sɔ' kwi' ghəghʉɔ yə pu gɔm nthʉm ŋwa'nyə yəŋ a bi e.

¹⁹Mo yə e syaptə̀ ywə nə a, bɑ Si gɔ sɔ' syaptə̀ yə́ nə thə vɔk ba nə tisuŋ dɔlɔ̌ yə pu gɔm nthʉ̀m ŋwa'nyə yəŋ a.

²⁰Mo yə e gɔm mnwə bɔ a ghɔm gɑ: Əŋ gɑ̌ wə guŋ sɔ̌'. Amɛn sɔ' m Cyəpɔ Yeso!

²¹Gho' Cyəpɔ Yeso pɑ bi guŋ pɔ awɛ.