Read Ghomala New Testament APOKALIPSƏ 3 Bible Online

APOKALIPSƏ 3 - Ghomala New Testament bible

APOKALIPSƏ 3

¹Və bi aŋgəle cu'tə pɔ Kristo yə ǎ Sardɛs a gɑ: Mo yə e gə mzhwenyə Si sɔmbʉə, ba msɛ́ sɔmbʉə a ghɔm gɑ: Gɑ̌ zhyə mfa' mǔ, vɔk nə́ o tə́ bɑ o e da' pfʉ́!

²Pɔmtə́! Nyəŋ gʉ' nə yə muywə yə a wə gɔ pfʉ́ a gɑ a kɑ pfʉ̀; nə pa' gɑ̌ yɔ mfa' mǔ a lə pɑ́ dɔlɔ̌ nə́ mnyə́ Si pɑ́.

³Kamtə́ ywə yə o lə yǔ' biŋ ŋkwi a! Tɔm ywə bɔ, biŋ ŋkwyəpnyə! O pɑ̌ tə nə cwə bɑ byap, bɑ gɑ̌ gɔ cwə́ sɔ' pa' shuŋ á, o lə zhyə cwə yə gɑ́ gɔ sɔ' tə o jyə́ a.

⁴Da' gɑ́ ǒ ghə shɑ́ po mduŋ pɔ Sardɛs tə́ wap gúŋ bviŋ dzə tsap. Wap gɔ sɔ' cya á, pu a mfə́ dzə́, nə pa' wap ku' nə́.

⁵Ǎ po'o tə́ mo yə ě lo' tə shyə́ a gɔ sɔ' kwa mfə́ dzə́, a dɑ vɑnyə tso tsyə́ nə ŋwa'nyə vɔk pɑ̀, a piŋ sɔ' ghɔmnwə nə́ dzə̌ tá a ba m dzə̌ pɑ aŋgəle pyə́.

⁶Mo yə ě ghə mtəŋ a yu' ywə yə Zhwenyə gɔm bi mcu'tə pɔ Kristo.

⁷Və bi aŋgəle cu'tə pɔ Kristo yə ǎ Filadɛlfia á gɑ: Mo yə e bɑ́ dɔlɔ̌, mo nyənyɔ yə ki David bɑ́ bi a, mo yə e shwɔ' sɔmmo lə yo', bɑ jo' sɔmmo lə cwɔ' a ghɔm gɑ:

⁸Gɑ̌ zhyə́ mfa' mǔ, yɔ́, gɑ̌ yap ta' jyədyə̌ dzə o bɑ pú ghyɛ', bi a pɑ́ sɔmmo lə vi'. Gʉ' tə yɑ̌ bu sak pɑ̀, da' gɑ́ bɑ ǒ tɔm ghɔm tsɑ̌, o lə nə́ŋ ŋkhəŋnyə tso tsɑ̌.

⁹Yɔ́, gɑ̌ hɑ́ pɔ pyə wap bɑ́ Sinagogə Sata a bu, pɔ pyə wap gɔm gɑ wap bɑ́ pɑ Yudea tə́ bɑ shwa cwa a. Yɔ́ gɑ̌ gɔ sɔ' ghə wap sɔ' ŋkham mkwi'tə map dzə́ o, po'o tə́ wap nə jyə́ gɑ́ á bɑ gɑ̌ kùŋ o.

¹⁰Pa' o ŋkhaktʉɔ nə tɔm ghɔm tsɑ̌ a, ba myə yɑ̌, gɑ̌ gɔ sɔ' pɑ pɔmtə o nə cwə mləŋtə yə a bɑwə gɔ́ sɔ' nə guŋ dzʉ̌ awɛ, sɔ' ləŋtə pɑ dəmca' a.

¹¹Gɑ̌ məjyə̀ bɑwə sɔ̌'. Kyəp ywə yə ǎ bu a kwa' pɑpuŋ po' gɑ sɔmmo kɑ kwi có' fò ó.

¹²Mo yə ě lo' tə shyə́ a, gɑ̌ gɔ sɔ' lɑ e ghə gàk Dyə̀ Si a, e lə la' tə́ biŋ nthəm pɑ́; a biŋ bvə tso Si a nə e, ba tsǒ guŋ Si a, Yerusalɛm yə sə́ yə a fi' fɑ thə́ bəŋ Si a á, ba tso tsɑ̌ tsyə́ sə́.

¹³Mo yə ě ghə mtəŋ a yu' ywə yə Zhwenyə gɔm bi mcu'tə po Kristo.

¹⁴Və bi aŋgəle cu'tə pɔ Kristo yə ǎ Laodikia á gɑ: Amɛn, ŋkwinthɛ̌ yə nyənyɔ, yə dəŋdəŋ, ywə yə Si lə́ nə nyap dzə a ghɔm gɑ:

¹⁵Gɑ̌ zhyə mfa' mǔ: O ka mim, o lə nəŋ hwé. Pě' tə o lə mim kɑ hwé!

¹⁶Da' gɑ pa' o wə na' dəmnyə ləmnyə, o lə pɑwə mim o lə nəŋ bɑwə hwe a, gɑ̌ gɔ wyɛ'nyə o.

¹⁷Pa' o gɔm gɑ́ gɑ̌ zhi, gɑ̌ ghə tsə́, ŋ tə́ wə jak sɔmywə pɑ́, pa' o ka zhyə gɑ́ o bɑ́ gɛ ghəghʉɔ, mo yə bi a pɑ́ pu cɔmmtso myə a, bɑ̌ bəŋ, bɑ fʉ̌ tam o, dzə́ lə pɑ́ nə o a,

¹⁸gɑ̌ wə nthɔk o gɑ o yó tʉɔ gɔl yə pu lɑ mɔk sɔk a bəm, nə́ ji, ba dzə́ fə́fə́, ŋkwa po'o gɑ pu kɑ yɔ o tə́ dzə nə o, a sǒ kú o, ba hwə mnyə́, nə shi' mnyə mǔ, biŋ jɔ tsʉ'

¹⁹kwa' myə̀, guŋ pɔ pyə gɑ̌ ŋkhuŋ wap a gɑ̌ ŋkhe wap, nthɔk wap. Kaktʉɔ, kwyəpnyə́!

²⁰Yɔ gɑ̌ tiŋnyə jyədyə̌, bɑwə ŋkho'tə. A pɑ gɑ mo yu' gi a, gyɛ' jyədyə̌, bɑ gɑ̌ gɔ ko dyə e pyə e tsʉ́ ywətsʉ dɔlɔ̌, yʉ́ ba myə.

²¹Mo yə e lo' tə́ shyə a, gɑ̌ gɔ sɔ' ghə gɑ̌ pyə e cwə nə leŋfò a, dəŋdəŋ pa' ba myə̀ a bɑ gɑ̌ lo' tə shyə̌, gɔ pyə tá á cwə́ nə leŋfo e a.

²²Mo yə́ ě ghə mtə́ŋ a yu' ywə yə́ Zhwenyə gɔm bi mcu'tə pɔ Kristo a.