Read Ghomala New Testament APOKALIPSƏ 4 Bible Online

APOKALIPSƏ 4 - Ghomala New Testament bible

APOKALIPSƏ 4

¹Mnwə bɔ lə cyə́, jɔ́: Bɑ pu ghyɛ' mu' ta' jyədyə̌ kɛbə̀ŋ, dəŋdzə́ gi yə ŋ də yu' a ghɔmnwə bəm pa' pu nthuŋ nthɛ, gɔm gɑ: Kwɔ' tsɔ'ɔ, a biŋ da'tə o ywə yə a məjyə́ bɑwə gɔ sɔ' a.

²A lə pɑ̌ po'o, Zhwenyə wuŋ gəm a. Jɔ ta' leŋfo bɑ pu tʉ kɛbə̀ŋ mo pɑ́ dəm o bɑ ě cwə́.

³Mo yə e lə́ bɑ dəm o bɑ ě cwə́ a lə bɑwə́ hwə́ pa' gwɔ' Yaspɛr ba Sardius, ntsɑ nam pɑ́ bɑ ǎ tsam leŋfo bɔ, bɑwə dəŋnyə pa' Smaradius a.

⁴Shɑ mleŋfo shwɔppfʉə mgham bʉə lə bɑ ǎ tsam leŋfo bɔ, mghətso shwɔppfʉə mgham bʉə pɑ̀ bɑ wap cwətə dəm o. A lə bɑ wap kwa mfə́fə́ dzə́, mcó' fo gɔl pɑ́ thə́ pu.

⁵Mpəpa'bə̀ŋ ba mgi, ba mhɛ bəŋ lə́ bɑwə nthəm nə leŋfo bɔ. Mlam hwehwě sɔmbʉə lə bɑwə ŋkhə́ dzə̀ leŋfo bɔ, bɑ mzhwenyə Si sɔmbʉə.

⁶Mu' ywə pa' shyə lɑpʉə dɔlɔ̌, bɑwə pa' mwé bəŋ a lə́ bɑ dzə leŋfo bɔ. Shɑ̀ mnɔm papfʉə lə bɑ́ tuŋ ba m geŋnyə leŋfo bɔ. Mnyə́ lə bɑ a sam wap dzə̀ ba m jʉ̀m.

⁷Dəŋdzə̀ nɔm lə́ bɑwə hwə́ a nɔmtəma', yə mu' pɑwə́ hwə́ a mú hùŋ, yə mu' pɑ bɑ e ghə sə́ monəŋ, batə yapfʉə pɑwə hwə́ a mətʉɔya' é pɑwə nthǎ.

⁸Mnɔm bɔ papfʉə lə́ bɑ́ bɑ bǎ ya lə ghə mbap nthɔk bɑ a lo mnyə́ geŋnyə o ba m nthʉ̀m o. Wap lə jwɔp mtsʉ' ba m mɔktcʉ́ gɑ: Dɔlɔ̌, Dɔlɔ̌, Dɔlɔ̌, Cyəpɔ, Si Nthʉɔtʉɔ. Mo yə e lə́ bɑ, yə e bɑ, biŋ bɑwə sɔ' a!

⁹Bǎ cwə kɑ lə́ yə mnɔm lə́ bɑwə hɑ ghu'tə bi mo yə e bɑ dəm leŋfo, bi mo yə e bɑ mama á, cwə yə wap lə bɑwə hɑ mku' bi e, biŋ bɑwə hɑ mfa' gho'nyə bi a,

¹⁰mghətso shwɔppfʉə mgham bʉə pɑ́ ŋkham mkwi'tə map si, dzə̌ mo yə é lə bɑ dəm leŋfo a, bɑ gamtə́ mo yə́ e bɑ nthʉɔ mama a, ma' mco'fo map dzə̌ leŋfo bɑ gɔm gɑ:

¹¹A bɑ ǒ ku' m Cyəpɔ Si yɔk nə nə kwi ghu'tə, mku' ba tʉɔ, nə pa' wə nə lə́ gə guŋ tsə́ awɛ; o lə́ yap gɑ́ a pɑ́wə, pu ghə a pɑwə.