Read Ghomala New Testament APOKALIPSƏ 5 Bible Online

APOKALIPSƏ 5 - Ghomala New Testament bible

APOKALIPSƏ 5

¹Ŋ də piŋ jɔ ŋwa'nyə̀ pú tʉɔ mo yə́ é bɑ́ dəm leŋfo a, ŋwa'nyə̀ bɑ pu və̀ ywə nthʉm o ba m dəm o, nthám mstam sɔmbʉə nə́.

²Biŋ jɔ ta' aŋgəle nthʉɔtʉɔ e pɑwə gɔm tə́ thə́ gɑ: Wɑ̌ ku'nyə nə ghyɛ' ŋwa'nyə, ŋi' mstam nə́?

³Da' gɑ́ sɔmmo kɛbəŋ, dəmcǎ', ba m nthʉm ca' la tə́ ghə tʉɔ nə́ nə gyɛ' ŋwa'nyə̀ kɑ nə́ ma' mnyə nthʉ̀m o lə.

⁴Ŋ də zhwə̌nyə̀ nə yɔ gɑ́ sɔmmo la tə́ ku' nə ghyɛ' ŋwa'nyə̀ kɑ nə́ ma' mnyə nthʉm o lə.

⁵Da' gɑ́ mu' ta' mo nə mghətso lə ghɔm bəm gɑ: Kɑ́ lɔ̀! Yɔ́, nɔmtəma' nə gwya pɑ Yudea, twɔp David bɑ ě cyə shù: E gɔ sɔ' ghyɛ' ŋwa'nyə ba stam myə́ sɔmbʉə.

⁶A lə́ pɑ̌ po'o jɔ mú jʉ̀jʉ̀ pa' yə pu wa e a tuŋ leŋfo pu a mnɔm papfʉ̀ə, cəcɑ̌ mghətsó. A lə́ bɑ ě ghə nthu' sɔmbʉə ba mnyə sɔmbʉə myə a bɑ mzhwenyə Si bɑ pu təm nə́ guŋ dəmca' awɛ.

⁷E lə fʉ'tə nɑ e sɔ' ŋkwi ŋwa'nyə̀ nə pú tʉɔ mo yə e lə́ bɑ dəm leŋfo a.

⁸E lə pǐŋ tə́ ŋkwi ŋwa'nyə̀, mnɔm papfʉ̀ə pu a mghətsó shwɔppfʉə mgham bʉə kam mkwi'tə dzə é. Bǎ wɑlə́ nə pú lə́ bɑ ě wim lə́ŋ ba nthu' gɔl pú e, bɑ̀ mwɑ damnyəlamnyə ló nthʉm o, a pɑ̀ mcwyɛ'nyə̀ pɔ dɔlɔ̌.

⁹Wap lə bɑwə jwɔ́p zhwɔpshyə sə́ gɑ: O ku' nə́ kwi ŋwa'nyə ŋi' mstam nə́ nə́ pa' pu lě gwa o, o lɑ mcyə́ mǔ nə́ shu' pɔ bi Si, pɔ nə́ guŋ mgwya awɛ ba nə guŋ mghɔ̀m awɛ pu a nə guŋ mgùŋ awɛ.

¹⁰O lě dɑ wap gə nəfo mkamsi bi Si yɔk pɑ, wap ghɔ la' pɑ sa' dəmcǎ'.

¹¹A lə pɑ̌ po'o ŋ jɔ: Ju' gi m aŋgəle kwa' vəŋ e giŋnyə leŋfo, ba gi mnɔm pu a mghətso. Wap lə́ bɑ kwa' vəŋ e vəŋ e, dù e dù e

¹²wap lə bɑwə gɔm tə́ thə́ gɑ: Mú jʉ̀jʉ̀ yə pu lə wa e a ku'nyə nə kwi tʉɔ, fʉ' ba zhyə̌nwə. Gʉ̌', mku', ghu'tə, ba gho'tə.

¹³A pɑ́ po'o guŋ tsə́ tsyə Si nyaptə kɛbəŋ, dəmcǎ', nthʉm ca' ba m nthʉm shyə lɑpʉə, guŋ tsə́ awɛ tsyə ǎ nthʉm o a, ju' pa' wap wə gɔm gɑ: gho', mku', ghu'tə ba mtʉɔ nə guŋ mcwə dzʉ́ awɛ pɑ bi mo yə e dəm léŋfo a ba m bi mú jʉ̀jʉ̀.

¹⁴Mnɔm papfʉə lə bɑ gɔm gɑ: Amɛn! Mghətso ŋwo'nyə si gámtə.