Read Ghomala New Testament APOKALIPSƏ 6 Bible Online

APOKALIPSƏ 6 - Ghomala New Testament bible

APOKALIPSƏ 6

¹A lə pɑ̌ po'o: Ŋ jɔ́: Cwə yə́ Mú jʉ̀jʉ̀ lə ghyɛ' dəŋdzə́ stam nə mstam sɔmbʉə a, ju' dəŋdzə nɔm cwe pa' hɛbəŋ a tə thə́ gɑ: Sɔ̌'!

²Biŋ jɔ a pɑ́ nɔmlěŋ fə́fə́. Mo yə e lə́ bɑ ě kwɔ' dəm é a lə bɑ ě wim kia. Pú lə hɑ co'fo bi e, e ghɔ pa' shyə́shù a, nə́ cyə shù.

³Cwə yə e lə ghyɛ' batə stam yɑpʉə a, ju' batə nɔm yɑpʉə cwe gɑ: Sɔ̌'!

⁴A pɑ́ po'o mu' nɔmlěŋ təm, bɑwə bɛ pa' mɔk a. Pú ghɔm bi mo yə e lə́ bɑ ě kwɔ' dəm e a gɑ e té hwitə̀ dəmcǎ', pɔmnəŋ zhwətə nɑ tsap. Pu lə piŋ hɑ mɑ́ sʉəsʉə nyə bi e.

⁵Cwə yə e lə ghyɛ' batə stam yɑtá, ju' batə nɔm yɑtá cwe gɑ: Sɔ̌'! Biŋ jɔ a pɑ́ nɔmlěŋ sə́sə́. Mo yə e lə bɑ ě kwɔ' dəm e a lə́ bɑ ě wim kilo pu e.

⁶Biŋ ju' pa' gì mò a cəcɑ̌ mnɔm papfʉə a pɑwə gɔm gɑ: Ta' fo' msɛ̌ nə bɛ ŋkhap biŋ gə msɛtʉɔ mfo' ntha nə bɛ ŋkhap. Tə́ sɔ' m nə mwɑ̌ pu a mlu', o kɑ́ kwak.

⁷Cwə yə e lə ghyɛ' batə stam yapfʉə a, ju' batə nɔm yapfʉə cwé gɑ: Sɔ̌'!

⁸Biŋ jɔ: A pɑ́ ta' nɔmlěŋ e pɑwə fɔk bviŋviŋ. Mo yə e lə́ bɑ ě kwɔ' dəm e a pu ŋkhe é gɑ vʉ̌, nəfo vʉ pɑ́ jʉm e. Pu lə hɑ tʉɔ bi e nə ta' ghə̌ŋ dəmcǎ' dəŋdəŋ jyə pfʉə nə lɑ mnyədwɔp jwətə pɔ ba jiku'u, ba vʉ̌, ba mnɔm shɔkcɔ̌k dəmcǎ'.

⁹Cwə yə e lə ghyɛ' batə stam yɑtɔ a, jɔ mtʉ̌m pɔ pyə pu lə zhwətə́ wap nə ghɔm Si ba m nə́ mkwinthɛ map myə wap lə́ kwi a tó tsʉ' nə to tsə pwɔ' nə a.

¹⁰Wap lə́ bɑwə shwe tə thə́ gɑ: Tá dɔlɔ̌ biŋ bɑ́ nyənyɔ. O gɔ pyap tə kəm cwə kɑ tə́ ya' shɛ piŋ pa' bo mcyə mɔk nə pɑ dəmcǎ'?

¹¹A lə pɑ̌ po'o, pu hɑ fə́fə́ sʉəsʉə dzə́ bǎ bi ya mo lə́ nə pú, biŋ gɔm bi pu gɑ wap na' byap tə̌ dəŋ mso fa' pap pu a mfɑ pap pyə pu gɔ zhwətə wap yap pa' wap a pəmtə́

¹²Ŋ də piŋ jɔ cwə yə e lə ghyɛ' batə stam nthɔk a, cǎ' cʉ'nyə. Nàm so pa' sə́sə́ dzə a, ba guŋ məŋwə́ awɛ cʉ' pa' mcyə a.

¹³Msɛ́ kɛbəŋ lə́ cʉmtə dəmcǎ' pa' nthɔm ta' thə yə fəfa ki nyəŋ si a.

¹⁴Kɛbəŋ ghɔ pa' pu dzʉm ŋwa'nyə dzʉmtsʉ̌m a, guŋ mkǔŋgó pu a pǒ mgùŋ cəcɑ́ shyə cʉ'nyə.

¹⁵Mfo dəmcǎ' pu a pɔ gwyəgwyə, mtadyə shù, mghɛ ywə pu a pɔ nthʉɔtʉɔ, guŋ pɔ awɛ, mkwɔ pu pɑ tə pɑ́ mkwɔ pɑ dʉmnyə nə mtǔŋ pu a mgha' gwɔ' mkǔŋgó.

¹⁶Wap lə́ bɑwə gɔm bi mkǔŋgó pu a ghǔ gɑ: vʉ dəm pyə, dʉm wɔk gʉɔ sʉəsʉə nə mo yə e dəm leŋfo, ba m gʉɔ sʉəsʉə nə yɛluŋ Mu jʉ̀jʉ̀!

¹⁷Nə pa' tyɛ'dzʉ́ yɛlúŋ gwyə sɔ', tə́ wɑ̌ gɔ vɔk?