Read Ghomala New Testament APOKALIPSƏ 7 Bible Online

APOKALIPSƏ 7 - Ghomala New Testament bible

APOKALIPSƏ 7

¹A lə nə cyə̀, ŋ jɔ pɑ aŋgəle papfʉə, bɑ wap tiŋnyə nə mtɔk dzʉ mapfʉə. Wap lə bɑwə nthɔm mfəfa mapfʉə myə a bɑ dəmcǎ', po'o gɑ́ sɔm fəfa kɑ piŋ shʉ' dəmcǎ', ba dəm shyə lɑpʉə ba m nə́ sɔm tá' thə́.

²Ŋ də́ piŋ jɔ mu' ta' aŋgəle e pʉɔ fɑ m ghə̌ŋ nthəm nàm. E lə bɑ e wim stam Si nthʉɔtʉɔ. E lə́ lɑ gi nthʉɔtʉɔ shwé bi pɑ aŋgəle papfʉə pyə a lə bɑ pu hɑ gʉ' nə baknyə dəmcǎ', ba shyə lɑpʉə a gɑ:

³Ka po wuŋ baknyə dəmcǎ', kə shyə lɑpʉə, kə mthə́ lə́, tə̌ pyə tam stam nə msə́ mghɛ fa' Si yɔk.

⁴Ŋ də́ piŋ jú' dəŋ pɔ pyə pu lə tam stam nə́ msə́ map a: Pɔ sha' shwɔppfʉə mpopfʉə mŋkhə́ pyə a lə bɑ pu yap mtiŋ stam nə́ pu a, nə guŋ mtuŋdyə pɑ Israɛl awɛ.

⁵Nə tuŋdyə́ Yuda, pu yap mtiŋ stam nə pɔ sha' shwɔppʉə mghǎm. Nə tuŋdyə́ Rubeŋ pɔ sha' shwɔppʉə mgham. Nə tuŋdyə Gad pɔ sha' shwɔppʉə mgham.

⁶Nə tuŋdyə Asɛr: Pɔ sha' shwɔppʉə mgham nə tuŋdyə Nɛftali: Pɔ sha' shwɔppʉə mgham nə tuŋdyə Manase: Pɔ sha' shwɔppʉə mgham

⁷nə tuŋdyə Simeon: Pɔ sha' shwɔppʉə mgham nə tuŋdyə Levi: Pɔ sha' shwɔppʉə mgham nə tuŋdyə Isakar: Pɔ sha' shwɔppʉə mgham

⁸nə tuŋdyə Zabulon: Pɔ sha' shwɔppʉə mgham nə tuŋdyə Yosɛp: Pɔ sha' shwɔppʉə mgham nə tuŋdyə Penyamɛn: Pu yap mtiŋ stam nə pɔ sha' shwɔppʉə mgham.

⁹A lə nə cyə biŋ jɔ: Du pɔmnəŋ tə́ bi a pɑ́ sɔmmo lə sɛ́ wap jyə́, pɔ nə́ guŋ mguŋ awɛ, nə guŋ mtuŋdyə awɛ, nə nthinthi pɔ awɛ, nə guŋ mghɔm awɛ. Wap lə bɑ wap tiŋnyə dzə leŋfo ba m dzə mú jʉ̀jʉ̀, bɑ wap kwa sʉəsʉə mfə́fə́ dzə́ biŋ gwim yɛ bɛ pú pu.

¹⁰Wap lə bɑwə gɔm tə thə́ gɑ: Ywə vɔk bɑ̀ bi Si yɔk pɑ̀ yə e bɑ dəm leŋfo ba m bi mù jʉ̀jʉ̀.

¹¹Guŋ pɑ aŋgəle awɛ pyə wap lə bɑ giŋnyə leŋfo a ba mghətso pu a mnɔm papfʉə piŋ bvʉtə́ si dzə̌ leŋfo pfɔppfɔp, gamtə Si.

¹²Wap lə́ bɑwə́ gɔm gɑ: Amɛn! Gho'tə, ghu'tə, zhyə̌nwə, gho', mku', tʉ̀ɔ, gʉ̌' pɑ̀ bi Si yɔk nə gu' nə gu'! Amɛn!

¹³Mu' gətso nə mghətso lə́ lɑ ghɔm gɔm bəm gɑ: Pɔ pɔ̀ gɑ pyə wap bɑ̀ wap kwa msʉəsʉə mfə̌ dzə̀ a, wap bɑ̀ pɑ wɑ? Biŋ bɑ fɑ m hɑ́?

¹⁴Ŋ də pa' bi e gɑ: Cyəpɔ a, a bɑ ǒ zhyə! E ghɔm bəm gɑ: Wap fɑ m nə ghəghʉɔ gwyə. A bɑ̀ wap sɔk mdzə́ map, dɑ mcyə mu jʉ̀jʉ̀ gə a fɔ́k.

¹⁵A ywə yə́ a gə tə wap pɑ́ nthiŋnyə dzə̀ léŋfo Si bɑ sé e dyə e mtsʉ̌' ba m mɔkcʉ́. Mo yə ě dəm léŋfo a gɔ sɔ' nyəŋ wap nthap e.

¹⁶Jikǔ' tə́ gɔ sɔ' piŋ yɛ́ wap pɑ́, a jì shyə̀ lə piŋ jɛ́ wap, a nàm pu a mɔk e lə piŋ hwé wap,

¹⁷nə pa' mú jʉ̀jʉ̀ yə ě tùŋ leŋfo a gɔ sɔ' pɑ́ gɛ pyap wap, pɑ lɑ wap ghɔ m nə́ msa'si shyə̀ dzəŋtsə̌ŋ, a Si piŋ sɔ' shi' guŋ mshyə́tsə́ map awɛ.