Read Gidar Matiye 11 Bible Online

Matiye 11 - Gidar bible

Matiye 11

¹Adan Zezu agrak wərban wən sit gewleɗ nan klaw kiyit sula, asilik sətəki nani, ambatka, vi kawpel wənna Maŋgəlva awalaŋ gəla naka dələv pakə.

²Pay nani Zaŋ məgəɗ baptem tay a daŋgay, apprəmək halabara na wəza na Zezu Messiya*, aslənək gewleɗ nan meɓɓet aza Zezu,

³vi dəssohonən gəni: Əstə məs məpprəm na məzukoh gəm wade tay sa? Walla məga ɗəf maɓɓani?

⁴Zezu apsit na: Mədoŋ, mənahsən Zaŋ an məs kəpprəmaŋ də an məs kulaŋ:

⁵Deŋgerɗe tahəŋ ulaŋ, vədelɗe tahəŋ wədawaŋ, məs kokoleɗ ambəlaŋka, goryomɗe tahəŋ wəpprəmaŋ, ɗii mimtit asilyoŋko, məs sahaŋɗe tamə məpel siti Wən Neneke.

⁶Zəzay aza ko naway məs dəpan wətaf nan ɓa.

⁷Pay gewleɗ na Zaŋ adawmbataŋ, Zezu atəŋgək wəpel wənna Zaŋ sit ɗiiyi, amna: Mi kəduwaŋ ula awra di? Ngav an səmnya adaɓlaŋ sa? Awwo vaski ɓa.

⁸Ya mi kəduwaŋ ula kan di? Ɗəf məgul lukutɗe moget sa? Amma ɗii məguloŋ lukutɗe moget ana məlĩ da adasoŋ.

⁹Ya mi kəduwaŋ ula kan di? Məs kleŋ sa? Əntatə nah sukum: Gesiŋ, aŋki dəday ki məs kleŋ.

¹⁰Vi Zaŋgi an məs ɗerewel apel akani: Maŋgəlva amna: Yaŋ əntatə slən masləŋ naw aboko, vi dəzaɓan gən tive viko.

¹¹Gesiŋ nədawnah sukum: Suwaleŋgit kirtit ɗii pak tay məs dəday ki Zaŋ məgəɗ baptem də gakdak ɓa, amma ɗəffan dəgəsan zən adəv məlĩ na Maŋgəlva, ndəni dəday ki Zaŋ də gakdaka.

¹²Daga Zaŋ atəŋ wəpel wənna məlĩ na Maŋgəlva, məzu zeleŋ tahəŋ wiziw gənəni, məɗɗaŋ mambrayɗe tahəŋ wəmohunni.

¹³Ma henziŋ na Moyis dit məs kleŋɗe pakə, aɗɗaŋgək kleŋ aka məlĩ na Maŋgəlva ha gap wəzo na Zaŋ.

¹⁴An kətaf nənək məs nənahəŋka, Zaŋ ndəni Eliyas an məs ɗerewel arban wəziya nan daga far farə.

¹⁵Ɗəf an məs də sləman pak dəpprəma:

¹⁶Də mi nədaw sle ɗiiyen kakaŋ kiŋ di? Wanəsle dit kirin məsoŋ atəki awalaŋ gəla, tay ənzlaŋ vamvəl sən ziti, tay nahaŋ na:

¹⁷Məfon sukumək pozloro, kəsklaŋ ɓa, məy sukumək gəlya naw həmma, kəskaŋ morkoyo ɓa.

¹⁸Zaŋ ade awzəm zigeɗ nawzəm meɓɓet ɓa awsa mbazla ɓa, aɓɗaŋ na: Mitemni.

¹⁹Wətən Ɗəf* adeke tay zəma tay saa zəga, tahəŋ wənahaŋ na: Ɗəffaŋ na wəɗum nan pakə, say aka wəzəmmi, dəwəsaa zəga, tay bayna dit duwanɗe dit məɗɗaŋ mambraya. Amma wəsən an mogon na Maŋgəlva tay ərban zən adəv wəza nani.

²⁰Yaŋ Zezu atəŋ wəheyet walaŋ gəleɗe məs agəɗ sokeneɗ adak diiɗa amma də ngəmaŋ wətubiyaŋ ɓa. Amna:

²¹Wakpaŋ bonoy azokis Korazin. Wakpaŋ bonoy azokis Baytisayda. Va sokeneɗ məs nəgəɗ awalaŋ gəla nokuməŋ, va awalaŋ gəla Tirus də Sidon nəɗɗe na, waguloŋ lukut net sakɗe, wavohoŋ moŋglo a zəti dərban gən na atubiyaŋka.

²²Vi vaski nədarban sukum: Pay wəgrak dələv na, kita na Tirus də Sidon wasan ɗəɗaah ki kita nokum.

²³Is Kafarnahum, azok na Maŋgəlva waslok a disiŋ sa? Aw haya! Kaw toŋguki atəki net ɗii mimtiti. Va sokeneɗ nəgəɗ anok da gbeŋkiŋ, a Sodoma nəɗɗe na, walaŋ gəla nan wasan ha dəpaŋka.

²⁴Vaski nədawnah sukum: Pay wəgrak dəlva, kita na Sodoma wasan ɗəɗaah ki kita nok kpakə.

²⁵Pay nani Zezu amna: Aw Affən Daya na disiŋ də dəlva fuŋ, soko azoko vi karban sitik kirin muzliyeɗ an məs kəɗaman azet məsənaŋ zəga dit məzapprəmaŋ.

²⁶Vaski aw Affuwa, vaski an dəslə suk kana.

²⁷Affu apan suwək zigeɗ pak a vawa. Ɗəf tay dəsən Wətən ɓa say Affən, ɗəf tay dəsən Affən ɓa say Wətəni, gəm an Wətən aŋgəl wərban pakə.

²⁸Mide zawa munokum məyokum də wəsla zəga gədak diiyaŋka, wanəsgan zəga nan agisbe.

²⁹Məsban wənnawa, məyagan azawa, ɗəf mogow nani nəzəm gukum na saha ɓa, zeŋgille kum warəhaŋ wəfete.

³⁰Vi an məs nədawɗi sukum wənnan bo, tay tuwãh ɓa, an məs nədaw ɗisukum van bo asana akokum gədak ɓa.