Read Gidar Matiye 13 Bible Online

Matiye 13 - Gidar bible

Matiye 13

¹Yaŋ pay nani, Zezu agilik siŋgili, ambat kəsan ama busgum na pe'e' vi kawpel sit ɗiiyi.

²Ɗii diiɗa azoŋko zani. Vi ni atoŋ adəv bəlay, asanka daka, ɗii tam aziweŋke ma busgum na pe'e.

³Arban sitik zəgeɗ diiɗa də wən məkpaŋga. Amna: Məzənse ambatka gulyo, vi kaw ndol haya.

⁴Adan adaw ndolni, zemve maɓɓan abətək aka tive, biŋgeɗ azoŋko ayaɗ nənka.

⁵Zemve maɓɓan abətək aka soyomo, dələv taya kan ɓa. Go'ləŋgə agilke, vi dələv taya mban ɓa.

⁶Adan pay agili, azlaka, aɓətka, vi dərah təki nampa suwerin ɓa.

⁷Zemve maɓɓan abətka adəv hogoy, aɓayaŋgək dəndən pakə, azəm gənək saha.

⁸Amma zemve maɓɓan abətək kəmpa aka ba'arə, atərək wəraya aɗika. Maɓɓan aɗiyək səkatə maɓɓan kaklaw slire maɓɓan kaklaw hoku.

⁹Yaŋ Zezu anah sit əmpana: Ɗəf an məs də sləman pak dəpprəma.

¹⁰Dərɓaga aska, gewleɗ na Zezu azoŋko zani, assohonənka: Vi mi kədawpel sit ɗii də wən məkpaŋga di?

¹¹Azlan sitik na: Munokum kərəhaŋgək wəsən wən məɗama na məlĩ na Maŋgəlva, amma neti dərəhaŋ ɓa.

¹²Vi mərah zəga warah diiɗa, amma məs saha wazan an suɗike nani.

¹³Vi aski nədawpel sit də wən məkpaŋga. Vi tahəŋ wəziyən hereti awlaŋ ɓa. Tahəŋ wəpakən sləmeti, amma apprəmaŋ ɓa awsənən ɓa.

¹⁴Vaski an məs kleŋ Ezay anahə, gesiŋgi azeti amna: Wakəpprəmənən də sləmokum, amma kəsənən na ɓa. Wakəziyən horokum, amma kulaŋ na zəga ɓa.

¹⁵Yaŋ mekret ɗiiyeŋ akpaŋgək dərwa, asukunək slimeti, atipinik hereti vi adawlaŋ, ada apprəmaŋ ɓa, adawsənən ɓa, vi vaski atubiyaŋ na ɓa, naw bo nərah na wəmbəlgit ɓa.

¹⁶Amma munokum zəzay azokum vi horokum tay ula, sləmokum tayəpprəma.

¹⁷Əntatə nah sukum gesiŋ: Məs kleŋɗe dit ɗii na Maŋgəlva diiɗa, aŋglaŋ ulanən an kədawlaŋ amma dulanən ɓa. Aŋglaŋ wəpprəmənən an kədapprəmaŋ amma dəpprəmnən ɓa.

¹⁸Məpprəm an məs wən məkpaŋga nak anahə.

¹⁹Ɗii meɓɓet wapprəmnən halabara na məlĩ na Maŋgəlva amma asənən na ɓa. Net tahəŋ va zemve an də bət aka tive, vi ɗəf mbrayen wade wagəm an də bət a mekreti.

²⁰Ɗii meɓɓet tahəŋ va zemve an də bət aka soyomo. Net an apprəmənək wənna Maŋgəlva, wataf nən go'u də zit neki.

²¹Amma suwerit tay ɓa. Wasoŋ gap suɗike, amma an wən tattuwãh də wərma mama asilke zeti vi wənna Maŋgəlva, wapanən wətaf net go'ləŋgə.

²²Ɗii meɓɓet tahəŋ va zemve an də bət awalaŋ hogoy. Net an apprəmənək wənna Maŋgəlva əŋgla na zəga na duniya də wərak na arya wazəm gən saha na wən ana mekreti, wən van anzlər na ɓa.

²³Amma ɗii meɓɓet tahəŋ va zemve an də bət aka ba'arə. Net an apprəmənək wənna Maŋgəlva, wasənəni, watər wəriya maɓɓan waɗi səkatə, maɓɓan waɗi kaklaw slire, maɓɓan kaklaw hoku.

²⁴Yaŋ Zezu apel də wən məkpaŋga maɓɓani, amna: Məlĩ na Maŋgəlva tay va ɗəf dəslga hay agulyo nanda.

²⁵Dəffəɗ nani, ɗii pak aleŋgeŋke məzu zelin adeke, aslgek bergezleŋɗe ambatka.

²⁶Yaŋ hay agili, aɓayka, apokko, bergezleŋɗe bo arbanənək ziti.

²⁷Məɗɗaŋ wəza ana affən guli da azoŋko, anahaŋ sənən affən guli na: Ɗəfdaya: Hayi kəslgə a gulyo nok daŋ kaaka ɓa sa? Ya mədəki bergezleŋɗe aran əmpa di?

²⁸Apsit na: Məzu zelu dəslge. Məɗɗaŋ wəza assohonənka: An vaski na kəŋgələk məptiwi gin sa?

²⁹Azlansitike: Awwo, vi an munokum tatəptiwini akəptuwən hay dənɗaŋ.

³⁰Məpet sulegit pak dəsɓaŋ ha gap pay naw bəla. Pay nani wanənah sit məzu bəlaŋ na: Miinet bergezleŋɗe, məzle də offo. Amma haya məkalan su a maha.

³¹Zezu apel sitik də wən məkpaŋga maɓɓani, amna: Məlĩ na Maŋgəlva tay va zemve na sita naka dələv maɓɓani. Ɗəf agəm tək aslgətək adəv guli nani.

³²Tədayək kiyit zemveɗe pak də wəgəsa, amma an təgilke, watəday kiyit gaslembeɗ pak də wəɓaya, watəkpaŋ wəlaŋga, ha biŋgeɗ wazoŋ wazaɓɓaŋ gəla net akani.

³³Zezu apel sitik də wən məkpaŋga maɓɓan əmpa, amna: Məlĩ na Maŋgəlva agilik va wuɗo guluk təndək gəpa məslan tasaw hoku təslahanək dəndən, gəpa pak ahəska.

³⁴Yaŋ zigeɗ pak Zezu anah sit ɗii də wən məkpaŋga, dəpel sit ko mi ɓa, say də wən məkpaŋga,

³⁵vi an məs kleŋ Ezay anah dəsan gən gesiŋ. Amna: Nənah sitik də wən məkpaŋga, nərbet sitik zigeɗ an məɗemit far far laŋka, daga məɗɗani duniya ɓa.

³⁶Adan Zezu apet ɗiiyi, atoŋko eŋgili. Gewleɗ nan azoŋko zani apsənən na: Arban səm wənna bergezleŋɗe ara hayiŋki.

³⁷Anahsitike: Məs dəslga haya, ndəni Wətən Ɗəffa*.

³⁸Duniyayi gulyo, ɗii na məlĩ na Maŋgəlva ndəɗaŋgə haya, bergezleŋɗe ndəɗaŋgə məzəsbanən ɗəf mbrayen.

³⁹Məzu zel dəslge ndəni Satan, pay naw bəla, ndəni pay wəgrak dəlva, məzu bəlaŋ bo maslayɗeŋ.

⁴⁰Va adaynetin bergezleŋɗe kasgət aka offo vaski adaɗɗa pay wəgrak dəlva.

⁴¹Wətən Ɗəf waslən maslayɗe nani, wagilgitin məs mambrayɗe pak sədəv məlĩ na Maŋgəlva,

⁴²wasgetin akoffo. Wahəmmaŋ adaka, wampəranən slayti.

⁴³Amma pay nani məzu ɓe'eŋ sən Maŋgəlva wawiɗeŋ va paya, adəv məlĩ na Affiti. Ɗəf məs də sləman pak dəpprəma.

⁴⁴Məlĩ na Maŋgəlva agilik va arya məɗaman adəv gulyo. Ɗəf arəhəka, aɗamanək əmpa, zən annekək diiɗa, ambatka, avələk zəga nan pak vi kalbəh guli nani.

⁴⁵Məlĩ na Maŋgəlva agilik va məgəɗ terere məkay averzleɗ mogeti.

⁴⁶Adan arəh averzle mogon diiɗa, ambatkə vəl zəga nan pak vi kalbəhən.

⁴⁷Əmpa, məlĩ na Maŋgəlva agilik va zəva mərmaŋ kilfi asganənək a pe'e, warma zemvit zigeɗ temtem pakə.

⁴⁸An aknahka, wakdə nən ama busgum, an agilgitinik kilfi. Kilif mogeti waɗiyən adəv kekel neti, amma kilif an mogetiŋ ɓa, kaw ndolti aret iŋkile.

⁴⁹Vaski adaɗɗa pay wəgrak dəlva. Maslayɗe wazoŋ wagohotin moget dit mbrayti.

⁵⁰Kawndol ɗii mambrayɗe akoffo. Wahəmmaŋ adak də wəmpəran slayti.

⁵¹Zezu assohotik gewleɗ nani. Kəpprəmənək zigeɗis pak sa? Azlansənənka məpprəməka.

⁵²Yaŋ Zezu anah sit na: Vi vaski ko naway məsən zəga na ma henziŋ məzu ɓesən məlĩ na Maŋgəlva, agilik va affən gəla, məzu gilgit zigeɗ meleketeti gəm zigeɗ məsvet səki wəzaɓ zəga nani.

⁵³Adan Zezu agrak wəpel sit ɗii də wən məkpaŋga, asilik səkəti nani,

⁵⁴ambatka awalaŋ gəla atəki aɓayə. Atəŋgək wərban wən sit ɗii adəv gəla nawpel wənnet Yahudiyenɗe. Ɗii nadak pak agətaŋka, aɓɗaŋ na: Səŋga arəh wəsən an vaŋ di? Mbari adawɓap wəɗɗa sokeneɗ vaŋ di?

⁵⁵Ndəni wətən məntar wəlaŋga ɓa sa? Mari təman ɓa sa? Ya Zak də Zozef, Simoŋ gəm Zuda əŋgə milmiŋgiɗin ɓa sa?

⁵⁶Milmiŋgiɗin məguliŋgit təŋhəŋ də mənaməŋ ɓa sa? Səŋga arəh sembe vaŋ di?

⁵⁷As atakik dətafni. Yaŋ Zezu anah sit na: Wagakdakanən məs kleŋ ko aŋga pakə, amma awalaŋ gəla nani aweleŋgit ɗii nani kaw gakdakani ɓa.

⁵⁸Zezu agəɗək sokeneɗ adak suɗike kaaka'ə, vi dətafnən ɓa.