Read Gidar Matiye 14 Bible Online

Matiye 14 - Gidar bible

Matiye 14

¹Yaŋ pay nani, Herodə məlĩ na Galile apprəm wənna Zezu.

²Anah sit ɗii nan na: Zaŋ məgəɗ baptem naki, dəsil səka wəmta, vi ni asan də sembe naɗɗa sokeneɗi.

³Herodə aɗiyək wənnani dərmanən gən Zaŋ. Aɓurukunko, asganənək a daŋgay Herodə aɗɗa vas na vi wənnat Herodiya guluk na Filip məlmən Herodə vani agəmtək ka guluk nani.

⁴Amma Zaŋ anahsənəka: Tay law kəgəmtə gən Herodiya ɓa.

⁵Herodə aŋgəl kawbay Zaŋ kəta, amma geslne adak viyit Yahudiyenɗe, vi tahəŋ ulanən Zaŋ va məs kleŋ.

⁶Yaŋ təla mə uwa Herodə agapə, wətət Herodiya tədeke təskələk abet ɗiiyen məyet dəpaska. Annekək zə Herodə diiɗa.

⁷Asuway sətəka ko mi kəssoh pak wanəpsuko.

⁸Waŋ təssohonək mat mata, yaŋ təssohon Herodə apsu ki Zaŋ məgəɗ baptem adəv hiluwe.

⁹As dənek zə məlĩ ɓa, amma vi wəsway asuway abet ɗii pakəŋka, aɗiyək wənnani dəpsətəŋ gən an təssohu.

¹⁰Aslənək ɗəffa, əda taw ki Zaŋ məgəɗ baptem sə daŋgay.

¹¹Akiyək kiyən van adəv hiluwe apsətək waŋ nakə, təkasətək mata.

¹²Gewleɗ na Zaŋ azoŋko, agəmənək gəbay nani, andək nənka. Yaŋ adoŋ, anahsənən Zezu an məs dəgəɗə.

¹³Adan Zezu apprəm halabara namta na Zaŋ, asilik səkəti nani, ambatək də bəlay, vi kawmbat awra katər gəni. Ɗii apprəmnənka, agulyoŋguk suwalaŋ gəla neti, asbanənək də tilti.

¹⁴Adan Zezu agil sədəv bəlay, awlek ɗii diiɗa, awələk saha aketi, ambəl gitik məs gbəgbaɗe suwaleŋti.

¹⁵Adan moskoy agəɗə, gewleɗ na Zezu azoŋko zani, apsənən na: Kakaŋka dəfɗi, aŋ bo awra mənani. Ɗəɗaah apsit tive sit ɗiiyeŋ dəmbataŋ kla ma gəla. Məmeɗeŋɗe, dərəhaŋ gən wəlbəh zəga nawzəma.

¹⁶Zezu amna: Dəslə dəmbataŋ gən ɓa, munokum kpakə, məpsit zəga nawzəma.

¹⁷Amma apsənən na: Zəga taya vam ɓa, say dupeŋɗe sle gəm kilif sula kaaka'ə.

¹⁸Zezu anah sit na: Məkki suwaŋka.

¹⁹Yaŋ aɗi wənnan sit ɗii dəsoŋ gən aka kevile. Nan agimik dupeŋɗe sle neki gəm kilif sula, aziyək haran a disiŋ, agəɗək soko sən Maŋgəlva. Arɗetike, apsitik gewleɗi dəpsitin gən ɗiiyi.

²⁰Ndəɗaŋ pak azəmaŋka, abaŋka. Gewleɗ akkaletinik, an dəplaŋ, aknəhək kekelɗe klaw kiyit sula.

²¹Wəŋɗa net ɗiiyen mezeŋgilleket di zimin dupeŋɗe waɗɗaŋ aza uzinere sle mənɗeti gil dit kirin ɓa.

²²Dərɓagan ləŋgə, Zezu adewliyək gewleɗ nan dətoŋgoŋ gən adəv bəlay, vi dəmbataŋ gən dabəŋ kiyən dəgarki mabusgum dədaka, pay apsit tive sit ɗiiyi.

²³Adan apsit tive, apaŋka aka mosorgo ndən katər gəni vi kawzuliya. Ha giɗe dəfɗa, taya dak katər gəni.

²⁴Bəlay faraɗay diiɗa də ma busgum, gewleɗ almaŋgək dit barkataŋ tahəŋ wəɓletini.

²⁵Daga təki dəɓəl wədaŋ tagay ɓa, Zezu ambatək azet gewleɗ nani, tay dawa ket iŋkile.

²⁶Adan gewleɗ awlanəni, geslne ermeke, aɓɗaŋ na: Tuyayi, anzlaŋgək vamvəlla vi geslne.

²⁷Zezu apel sitik go'ləŋge, amna: Məsok makrokum əntə, kədaw geslne'eŋ ɓa.

²⁸Piyer apelsənəka, amna: Aw Ɗəfdaya, an əstə na, anah su ndaw gən azok dəket iŋkile tamə.

²⁹Zezu apsən na: Ade. Piyer agilik sədəv bəlay, ateŋgək wədaw aket iŋkile vi kawgap aza Zezu.

³⁰Amma adan awla barkataŋ, geslne armaka, atəŋgək wətəppa, a ngəzlək vamvəlla: Aw Ɗəfdaya akoh guwa.

³¹Zezu atələk van go'ləŋgə, armaka, apsən na: Awlan kana, wətaf nok tay diiɗa ɓa, vi mi kuɗum na kuzuŋ di?

³²Adan aguloŋ sulegit pak adəv bəlay, barkataŋ aɓətaŋka.

³³Yaŋ gewleɗ meɓɓet nadəv bəlay agdukunuk takpret aba Zezu, aɓɗaŋ na: Gesiŋgi kpakə Wətən Maŋgəlva* kənani.

³⁴Səza agaraŋ ki pe'e, agapaŋka aka dələv na Genezaret.

³⁵Ɗii naka dələv nan asənənək Zezu, akanənək halabara nan ko aŋga pak aka dələv neti, akisininik məs gbəgbaɗe.

³⁶Akkamanənka dəpeti gən dərəŋ gənən gən ko maŋgava lukut nan dayday, en məs dərəŋ gənən pak ambəlaŋka.