Read Gidar Matiye 16 Bible Online

Matiye 16 - Gidar bible

Matiye 16

¹Farisiyenɗe dit Sadusiyenɗe azoŋko za Zezu kaw rakani. Assohonənək dəgəɗsiti gən sokene vi də sənən gən kpak na Maŋgəlva də sləna.

²Zezu azlan sitik na: An pay atəpka, disiŋ tay preŋ, munokum tatə nahaŋ na: Pumpum təki wasan tutuwə.

³Dəmpumo bo an disiŋ kirɓiɓ kirɓiɓi, slay buwən ettirke, munokum tatə nəhaŋ na: Buwən wazi dəpaŋka. Kəsənək uɗakan təki də ula disiŋ, amma mbari kaw ɓapən uɗakanən zigeɗ en dədaɗɗaŋ kakaŋ ɓa di.

⁴Ɗiiyen kakaŋkiŋki mbraytiŋ, muluvuluvuɗeŋ tahəŋ wəkayaŋ sokeneɗi amma arəhaŋ na ɓa, say sokene na məs kleŋ Zonas. Yaŋ apeti, ambatə.

⁵Paysən gewleɗ adagaraŋ ki pe'e, asgətaŋgək dawgəmən dupeŋɗe.

⁶Zezu anah sit na: Məzi zukum aza wuɗo net Farisiyenɗe dit Sadusiyenɗe.

⁷Gewleɗ atəŋgaŋgək əpel awalaŋ ziti aɓɗaŋ na: Adawpel vas na vi məgəm dupeŋɗe avam ɓayi.

⁸Zezu asənək va adawpeleŋ. Assohotike: Vi mi kədawpeleŋ wənna dupeŋɗe tahəŋ ɓa di? Nokum kpak wətaf nokum gəssi.

⁹Kəpprəmənən tagay ɓa sa? Dəde akokum wənnet dupeŋɗe sle məs nuɗeket sit ɗii uzinere sle də wəŋɗa net dembirgit aknah kekelɗeŋ ɓa sa?

¹⁰Dəde akokum wənnet dupeŋɗe buhul məs nuɗeket sit ɗii uzinere poɗo, də wəŋɗa net dembirgit aknah kekelɗe ɓa sa?

¹¹Vi mi kapprəmanən ɓadi wənnet dupeŋɗe nəpel sukum sa? Məzi zukum aza wuɗo net Farisiyenɗe dit Sadusiyenɗe.

¹²Adan gewleɗ apprəmənən na dəpel sit wənna wuɗo net dupeŋɗe ɓa, amma dəziyən gən zit aza wərba zəga net Farisiyenɗe dit Sadusiyenɗe.

¹³Yaŋ Zezu ambat a Kaysariya dələv na Filipi. Adaki assohet gewleɗ nani. Mi ɗii adawnahaŋ aka Wətən Ɗəf* di?

¹⁴Azlansənən na: Ɗii meɓɓeti tahəŋ wənahaŋ na əstə Zaŋ wəgəɗ baptem. Ɗii meɓɓet bo tahəŋ wənahaŋ na əstə Eliyas ɗii meɓɓet bo, tahəŋ wənahaŋ na Zeremiya walla məs kleŋ maɓɓani.

¹⁵Yaŋ Zezu assoheti: Ya nokum tam nawa nan kədawnahaŋ di?

¹⁶Simoŋ Piyer azlansənəka: Əstə Messiya Wətən Maŋgəlva* madarani

¹⁷Zezu apsəna: Zəzay azoko, Simoŋ wətən Zaŋ ɗəf ana gəɓa zə ɗəf dərban suk goŋgaŋ ɓa, amma Affu na disiŋ dərban suko.

¹⁸Əntatə nah suko: Əstə Piyer, va wənah na milɓe. Aka milɓe nani nədaw ɗii kretiyenɗe nawa. Əmta waday kiyən ɓa kpakə.

¹⁹Wanəpsuk lakile na kol ma gəla na məlĩ na Maŋgəlva. An məs kəsler akan a duniya, kawsleri akan a disiŋ nge'e, an məs kəsler akan a duniya ɓa kawsleri akan a disiŋ ɓa'a.

²⁰Yaŋ Zezu anah sit gewleɗ nan na, kədawnahaŋ na ndəni Messiya ɓa.

²¹Yaŋ daga pay nani Zezu atəŋ wəpel sit gewleɗ nan məza məɗamma ɓa, amna: Aslək ndaw gən a Zerusalem, ɗii na dələv dit milyeŋge məs dəlveŋge məsənaŋ zəga na ma henziŋ wazəm guwən saha daka, wabaywəni, amma pay ma hoko'o wanəsil səki əmta.

²²Piyer akdahanək katər gəni, apelsənka, amna: Kay nawa dənah di, Ɗəfdaya, Maŋgəlva wataka. Zev wən nas agəɗ na zok kpak ɓa.

²³Amma Zezu akpaŋganək harani, apsən Piyer na: Dok səzawa, əstə Satan əstatə kayan nəsbər gən adəv mambray vi wəɗum nok tay vana Maŋgəlva ɓa, amma venet ɗiiyi.

²⁴Yaŋ Zezu anah sit gewleɗ nan na: Ɗəffan dəŋgəl wəsbawa say dəppan wəɗumsən kini, dəslan gən məzliwrihe nani dəsbaw gəni.

²⁵Vi ko naway dəŋgəl wəkoh gən zeŋgilleni, wazani. Amma ɗəffan dəzan zeŋgillen viwa warəha.

²⁶An ɗəf arəhək zəga na duniya pak amma azanək zeŋgilleni, madaw tərsən di? Tay ɓa sam. Ko zəga tay ɗəf nan adapsən na man zeŋgillen ɓa.

²⁷Wətən Ɗəf* wade dəgakdak na Affəni, dit maslayɗe nani, wafaɗsən ko nawa pak va wəza nan adaɗɗa.

²⁸Gesiŋ nədawnah sukum, ɗii meɓɓet suwalaŋkum amtaŋ na ɓa, say an awlanənək wəzo na Wətən Ɗəffa də məlĩ nani.