Read Gidar Matiye 17 Bible Online

Matiye 17 - Gidar bible

Matiye 17

¹Dərɓaga wuvoŋ slire, Zezu agəmək Piyer də Zak gəm Zaŋ an məlmən Zak, akek aka gərəm zezeke, ndəɗaŋ katirgiti.

²Gəɓa zən akpaŋgək ama hereti. Haran tay wiɗ va paya, lukut nan akpaŋgək babar kaɗɗak kaɗɗak, uwiɗ va təki babara.

³Yaŋ gewleɗ hoku nek awlanənək Moyis də Eliyas tahəŋ wəpel də Zezu.

⁴Piyer apsən Zezu na: Ɗəfdaya mogoni məsam gən aŋka. An kəŋgəlka, wanəgəɗ gizlirkeɗe hoku, taka suko, taka sən Moyis, taka sən Eliyas.

⁵Yaŋ dəɓəl wəbay ma wəpel nan ɓa, yaŋ slay buwən məzu wiɗ adeke, asiritike, ɓaɓəlma adek sədəv slay buwən naka, amna: Aŋki wətu an nəŋgələ, əntatə neken zu dəndən sawɓa. Məpprəm mani.

⁶Adan gewleɗ apprəməni, geslne armeke, akdukoŋgək ha mirbisit afuŋ ne'i.

⁷Zezu azarka zeti, arəŋgitke, amna: Məsili, kəgeslne'eŋ ɓa.

⁸Aslanənək hereti, dulaŋ ɗəf ko taka ɓa. Say Zezu katər gəni.

⁹Adan adapirkeŋ səka gərma, Zezu abayək meti: Kədawnah sənən ɗəf ɓa say gap an Wətən Ɗəf* asilik səkəti əmta.

¹⁰Yaŋ gewleɗ assohonəni. Vi mi məsənaŋ zəga na ma henziŋ adawnahaŋ na say Eliyas dədegən dabəŋ tagay di?

¹¹Azlan sitik na: Gesiŋ Eliyas wade dabəŋ, də zaɓet gin zigeɗ pakə.

¹²Naw əntatə nah sukum: Eliyas adek səkay, ɗii də sənən ɓa, aɗɗaŋ sənənək an aŋglaŋ, waɗɗaŋ sənən Wətən Ɗəf vaska'a.

¹³Gewleɗ apprəmanənək na wənna Zaŋ məgəɗ baptem adawpele.

¹⁴Adan agapaŋ aweleŋgit ɗiiyi, ɗəf adek aza Zezu, akduko abani,

¹⁵amna: Aw Ɗəfdaya awlu də wətuwəŋka. Tay də gbəgba' na gamba, tay zəm gən saha sawɓa.

¹⁶Nəki sitik gewleɗ noko, amma də ɓapən wəmbəl gənən ɓa.

¹⁷Zezu amna: Awlet kana munokum məs wətaf nokum tay diiɗa ɓa, məs mambrayɗe, pay gbəgbari nənzi də munokum kpak di? Məkki su wiyən vani.

¹⁸Zezu anahsənək witem də gurom ləŋgə, agil səka winəŋka! Agilke ambələk daska'a ləŋgə.

¹⁹Dərɓagani gewleɗ na Zezu azoŋko zan ketirgiti, assohonənka: Vi mi məɓap wəgil gən tuyaŋ ɓa di?

²⁰Zezu azlan sitik na: Vi wətaf nokum gəssi. Gesiŋ nədawnah sukum: Va munokum tat də wətaf suɗike va wəlaŋ sita, wakənahaŋ sənən gərməŋka azar saŋka, dok ada, nəsənka wazarə, zəga tay də daw day kikum ɓa.

²¹[Amma zev tuya nani awgilyan ɗarɗar ɓa say duzuliya gəm də wəse meme.]

²²Pay mbərən gewleɗ na Zezu akalaŋgək pak aka dələv na Galile. Apsit na: Wapsənən Wətən Ɗəf* avet ɗiiyi.

²³Wabay nəni, amma pay ma hokoni wasil səki əmta. Adan gewleɗ apprəmnən vaska aɗəkaŋgək sawɓa.

²⁴Yaŋ Zezu dit gewleɗ nan agapaŋ a Kafarnahum, mətafaŋ zomorgol na dəv gəla metiŋ naw zuliya azaraŋka za Piyer, assohonənka: Məsən zəga nokuməŋ afaɗ na zomorgol nadəv gəla metiŋ naw zuliya ɓa sa?

²⁵Piyer azlan sit na: Wafaɗa. Pay Piyer adawtoŋ adəv gəla, Zezu apel sənək dabəŋ amna: Mbari kəɗum di Simoŋ? Mədəŋgaŋ məfaɗaŋ zomorgol di walla deleɗ na mekeleŋ sit milyeŋge na duniyaŋ di? Ɗii na dələv nan sa, walla melekeɗi?

²⁶Piyer azlan sən na: Melekeɗi dədawfaɗaŋ. Zezu amna an vaski na ɗii na dələv afaɗaŋ na ɓa.

²⁷Amma vi mədawdan sit gidivit ɓa, doko pe'e, asgan teklem nok eret iŋkile, kilif an kədarma dabəŋ pak agəma, aha' mani wakəra deleɗ na təbəs amani, agime kəfaɗ gən zomorgol naw də an nok pakə.