Read Gidar Matiye 19 Bible Online

Matiye 19 - Gidar bible

Matiye 19

¹Adan Zezu agrak wəpeləŋka, apanək dələv na Galile, ambatka aka dələv na Zude dəgar ki məlpa na Zordan.

²Ɗii diiɗa asbanənka, ambəlgitik məs gbəgbaɗe neti.

³Ɗii səmbet Farisiyenɗe* azoŋko zani vi karman də wənna mani. Assohonənka: Ma henziŋ apanək tive sən ɗət narɓəh guluk viyan dəgəɗ pak sa?

⁴Azlansitike: Kəŋɗanən an məverin ɓa sa? Daga wətəŋ nani Maŋgəlva aɗɗak ɗəf mizilin dət gulku.

⁵Yaŋ amna: Vi vaski ɗəf wapan affən dət man pakə, wasapaŋ dət goni, wakpaŋgaŋ gəɓa zit taka. Akpaŋgaŋ na ɗii sula əmpa ɓa, amma gəɓa zit taka.

⁶Vaski asoŋ na sula əmpa ɓa, amma wakpaŋgaŋ gəɓa zit taka. Vi vaski zəga məs Maŋgəlva asapani, ɗəf adawɗakan ɓa.

⁷Farisiyenɗe* assohonənka: An vaski na, vi mi Moyis aɗi wənnan na ɗəf dəpsət gən ɗerewel sət ɗak nan an arɓəhtək di?

⁸Zezu azlan sitik na: Moyis apsukum tive narɓəh gil nokum na vi mokrokum ɓəlli. Amma daga wətəŋ nani tay vasɓa.

⁹Əntatə nah sukum: An ɗəf arɓəhtək goni, an vi arəmət daɗɗa mana'ayi ɓa, an akayək guluk maɓɓata agəɗək mana'a.

¹⁰Gewleɗ nan aɓɗaŋ na: An wən na ɗəf dət guluk tay vas na, ɗəɗaah ɗəf adaw kay guluk ɓa.

¹¹Zezu azlan sit na: Ɗii pak dədasbanən wərbas ɓa, say ɗiiyen Maŋgəlva apsit sembe.

¹²Wən tay temtem dədah tak ɗii daw kay gulku: Ɗii meɓɓet tahəŋ zit tay ɓa daga sədəvit meti, ɗii meɓɓet tahəŋ mərgeti, ɗii meɓɓeti awkayaŋ gil ɓa vi məlĩ na Maŋgəlva. Ɗəffan naw ɓap wətaf wərba nani dətafa.

¹³Yaŋ ɗii aki sənən kirin memeɗeŋɗe sən Zezu, vi dəɗi gən van aketi, dəzuli gən aketi, amma gewleɗ nan atekinik ɗii daw kiti.

¹⁴Yaŋ Zezu apsit na: Məpet kirin memeɗeŋɗe dəzoŋ azawa, kətek nən ɓa, vi məlĩ na Maŋgəlva tay viyit kirinen veŋki.

¹⁵Agəɗ sitik zəzay də wəɗi van aketi, yaŋ asil səkəti nani ambatka.

¹⁶Yaŋ ɗəf maɓɓan ade aza Zezu, assohoni: Wəza mogon awani nədaɗɗa nərah gən zeŋgille an məza agrak na ɓa di?

¹⁷Zezu anah sənək na: Vi mi kəssohon zəga mogon di? Zəga mogon tay ɓa, say tətakay mogoni. An mokaka zeŋgille məza agrak na ɓa, say asbet mehenziŋɗeŋki.

¹⁸Assohonək Zezu, mehenziŋɗe awet di? Zezu azlan sənək na: Kədawbay gəbay ɓa, kələɗɗa mana'a ɓa, kədawhal ɓa, kədawa wən aka ɗəf ɓa,

¹⁹agakdakan affuk dət moko, aŋglu meggok va kəŋglu ki zuko.

²⁰Gawla nak amna: Me henziŋɗe es pak nəŋɗetike nərmak wənneti, awan dəpəl su naɗɗa kan di?

²¹Zezu apsən na: An kəŋgələk wəsok salala, dokə vəl arya nok pakə, apsit deleɗ nan sit muzurayɗe, vas na wakərah zəga nan məzaɓan a disiŋ. Asna kəde gən wəsbaw kana.

²²Adan gawla apprəm wəpel vaska, ambatka, makran asanka vi arya nan tay diiɗa sawɓa.

²³Zezu anah sit gewleɗ nan na: Gesiŋ nədawnah sukum, tuwãhi məs arya dətoŋ gən məlĩ na Maŋgəlva.

²⁴Əntatə nah sukum əmpa: Ɗəɗaah zlogomo watoŋ dəmba batal ki məs arya wətoŋ məlĩ na Maŋgəlva.

²⁵Adan gewleɗ nan apprəmənən vaska, agətaŋka, aɓɗaŋ na: Haya, an vaski na naway nawkoh di?

²⁶Zezu asəŋletike, amna: Azet ɗiiyi wərəh nan tuwãyi, amma aza Maŋgəlva wərəh nan tay tuwãh ɓa.

²⁷Yaŋ Piyer anahsən na: Yaŋ nam pak məpanək zəga nam pak mənam tatəsboko, kawsan səm mbar kandi?

²⁸Zezu apsit na: Gesiŋ nədawnah sukum. Pay Wətən Ɗəf* adawsan aka mazaŋga na gakdak nani aka dələv meleketeni, munokum məzəsbawən klaw kikum sulaŋ wakəsoŋ də ina aket mezeŋgeɗ na məlĩ klaw kiyit sula vi kawtaw kita aka ma əlfa net Israyelɗe klaw kiyit sula.

²⁹Ko mədəŋgaŋ dəpanən gəla neti milmiŋgiɗit mezeŋgilleketi, dit muguluŋgiti dit migilti dit kirtiti gəm gulyeŋɗe neti viwa, warəhən təl səkatə, warəhaŋ zeŋgille məza agrak na ɓa'e.

³⁰Amma ɗii diiɗa en nabe kakaŋka wakpaŋgaŋ dərɓe, ɗii diiɗa en na dərɓe kakaŋka, wakpaŋgaŋ ɗii nabe.