Read Gidar Matiye 2 Bible Online

Matiye 2 - Gidar bible

Matiye 2

¹Muwani Zezu a Betelihem awalaŋ gəla na dələv na Zude, daga Herodə asan aka məlĩya. Dərɓaga muwani, məsənaŋ wənnet gərzleɗ səmba pay nampum, azoŋko a Zerusalem.

²Assohoŋ na: Aŋgay win muwanəŋ di, an məs dədawsan məlĩ net Yahudiyenɗe di? Mulak ngərzla nan ambra pay nampum vini məde vi kaw gakdakani.

³Adan məlĩ Herodə apprəm vaska, makran azlahək diiɗa, daga ɗii na Zerusalem pakə atapetike.

⁴Herodə akkeletik ɗii gugiriɗ net məs dəlveŋge na Maŋgəlva, dit ɗii nan məsənaŋ ɗerewel na ma henziŋ na Maŋgəlva, atokonək met na, aŋgay adah wanən Messiya* di.

⁵Azlan sənənək na: A Betelihem dələv na Zude. Vaski məs kleŋ evere.

⁶Is Betelihem dələv na Zude kəgəs azet walaŋ gəleɗe mbrit na Zude ɓa: Vi sə Zoki məlĩ adawgilyeni məs naw taɗ ɗii naw Israyel.

⁷Yaŋ Herodə aye məsənaŋ zəga məɗamma yaŋ apprəm pay mula ngərzla təstəs səmeti.

⁸Aslinik a Betelihem, apsit na, mədoŋ məkayan gəla winəŋ lewlewi, an kərəhnənka, kəzoŋ gən wənahsuwa ndaw gən əgakdakan tamə.

⁹Adan apprəmən vas səma məlĩya, ambataŋka. Yaŋ ngərzla məs awlaŋ amba pay nampum naka adawka abeti, adek izu aka gəla an məs wiyən asan adaka.

¹⁰Adan awlanən ngərzla, an nekenənək zit diiɗa.

¹¹Atoŋgoŋko eŋgili, awlanənək wina dət man, Mari. Agdukoŋko fuŋ a gakdakanənka. Yaŋ apələn ma gabal net əmpa apsənənək zəga, meleŋge də gaŋgəlnya, gəm tursan nani.

¹²Yaŋ Maŋgəlva anah sit də wisine adaw milyeŋ kəla za Herodə ɓa, amndoŋko aka dələv net dəka tive mbərən.

¹³Dərɓaga məsənaŋ zəga ambataŋgə, maslay na Ɗəfdaya adek aza Zozef də wisine apsən na: Asili, aslan wina dət mani dok a Misra, asok adak ha gap nənah suk gəni. Vi Herodə wakayan wina, kawbayən.

¹⁴Zozef afɗahka aslanək wina dət mani dəfɗa ambataŋka Misra.

¹⁵Asanka daka ha gap Herodə zamə. Vas na vi kapprəman an Ɗəfdaya anah də ma məs kleŋ nani, nəyak wətu sə Misra.

¹⁶Adan Herodə awla məsənaŋ zəga ammakanənək dərwa, gədəvən adək diiɗa. Aɗɗak wənna, kawbay kirin mezeŋleket sə Betelihem pak gəm səket meŋge nan pakə, təŋ səka wəsva sula ha məs dəgapaŋ ɓa pakə, va an məs apprəm səmet məsənaŋ zəga va pay awlanən ngərzla nan egili.

¹⁷Yaŋ apprəmanənək an məs kleŋ Zeremiya apeli.

¹⁸Məpprəmni vamvəl a Rama, wəhəmma də gugoyo tay diiɗa, Rakel tatə həmma viyit kirtita, tənger kapprəm wəɓət gət ɓa vi amtaŋka.

¹⁹Dan Herodə amtə, maslay na Ɗəfdaya adek aza Zozef də wisine a Misra.

²⁰Apsən na: Asili, aslan wina dət mani a amil dənɗaŋ aka dələv na Israyel vi məzu kayanən wiyən kawbayən amtaŋka.

²¹Asilke aslanək wina dət mani amilyeŋgək aka dələv na Israyel.

²²Adan apprəmna Arkelawus dəsan məlĩ a gəla affəni, a Zude, geslne armak dawsan adaka, yaŋ wəsine ade azani amzla aka dələv na Galile.

²³Ambatka asanək awalan gəla məs adawyaŋ na Nazaret. Vi kapprəman an məs kleŋɗe anahaŋ na: Kawyani na mə Nazaret.