Read Gidar Matiye 20 Bible Online

Matiye 20 - Gidar bible

Matiye 20

¹Də aŋki məsla məlĩ na Maŋgəlva: Affən guli net wəleŋɗe agilik də mompumo pum vi kaw kay ɗii na wəza na guli nani.

²Aslerik dənɗaŋ kawfaɗ sit an va adaɗɗaŋ ɗay ɗayə, pay taka pak suley suley, akek aka wəza na guli nani.

³Agil kəmpa də təbəs vaytakə, awlek ɗii meɓɓeti tahəŋ ziw ziw a gəla lumu, wəza net tay ɓa.

⁴Apsit na: Nokum bo məduwaŋ a gulyo anawda, anəfaɗ sukum an məs dəslə azokum.

⁵Adoŋko a gulyo ananda. Yaŋ affən guli agil tataŋ pay əmpa, agilik də təbəs hoku'e aɗɗak va an laŋka.

⁶Agilik də təbəs sle əmpa, arəhik ɗii meɓɓet tahəŋ ziw ziw a gəla lumu, wəza net tay ɓa əmpa. Assohotike vi mi kədasɓətaŋ mekeleŋ məza wəza ɓaŋ di?

⁷Azlan sənənək na: Vi ɗəf tay dəssohom aka wəza ɓa. Anahsitik na: Mide, mədoŋ məgəɗ wəza a gulyo nawda.

⁸Adan pay atəpə, affən guli anahsənək ɗəfdaya na wəza nani: Aye məɗɗaŋ wəza, afaɗ sit deleɗ neti, atəŋ aket ɗiiyen dəzoŋ dirɓe a gulyo, kəbay gən mok aket ɗiiyen dəzoŋ dabəŋ a gulyo.

⁹Ɗiiyen məs dədoŋ a guli də təbəs sle azoŋko, arəhaŋgək ko naway suley suley.

¹⁰Yaŋ ɗiiyen dədoŋ a guli dabəŋ azoŋko azet na warəhaŋ diiɗa, amma apsitik net bo suley suley.

¹¹Atafənək də wəɗɗa wərwər aka affən gulyo.

¹²Aɓɗaŋ na: Awla məs dəɗɗaŋ wəza adəv təbəs taka kaaka'ə, yaŋ kəfaɗ sit daka daka də mənamə, mənam akən məzəm saha dasɓəta ara pay kəkaha daɗɗa wəzaŋka.

¹³Amma affən guli azlanək sən ɗəf taka səmbeti, amna: Baynawa, nəgəɗsuk mataka taka ɓa. Məsler də'is aka suley pay taka ɓa sa?

¹⁴Agəm suley noko, doko, naw nəŋgəl kaw faɗ sən ɗəffan dəgəɗ wəza dirɓe dirɓe va nəfaɗ sukəŋka.

¹⁵Walla nəɓapna wəɗɗa wəza dit suleyɗe naw va nəŋgəl ɓa sa? Walla kotorok kəgəɗ vi nəgəɗ mogoni?

¹⁶Zezu abayək ma wəpel nan də wənəh na: Vaski bo ɗii na dirɓe wakpaŋgaŋ ɗii nabe, ɗii nabe wakpaŋgaŋ dirɓe.

¹⁷Adan Zezu ada dan a Zerusalem, andek gewleɗ nan klaw kiyit sula katirgiti. Adan adawmbataŋ, apelsitike, amna:

¹⁸Məpprəma, mənam tatəpeŋ a Zerusalem, adak na wapsənən Wətən Ɗəf* avet ɗii gugiriɗ net məs dəlveŋge, dit mərbaŋ zəga na ma henziŋ na Maŋgəlva. Watawaŋ kita namta kani.

¹⁹Wapsitin avet ɗiiyen dəsənən Maŋgəlva ɓa, waranəni wavərnəni wakpanən akawlaŋga məzliwrihe. Amma pay mo hoko'o wasil səki əmta.

²⁰Yaŋ met kirtin Zebede təzar aza Zezu dit kirtita. Tukduko bani vi kassoh zəga vani. Zezu assohotəka: Məkəŋgəl di?

²¹Təpsən na: An akətaf su na nəŋgəl kirtiwiŋ taka dəsan gən aka vok də zəŋ, taka aka vok zlaɓay adəv məlĩ noko.

²²Zezu azlan sətək na: Kəsənaŋ an kədassohoŋ ɓa. Wakəɓapən wəsa huloŋ na bonoy məs nədaw sa van sa? Aɓɗaŋ na: Waməɓapa.

²³Zezu azlan sitik na: Wakəɓapən wəsət huloŋ na bonoy nawa, amma wəsuwa aka vaw dəzəŋ walla aka vaw zlaɓay, əntə nədapsit ɓa, amma ɗiiyen məs Affu awel tay viti, ndəɗaŋ dədawrəhaŋ.

²⁴Adan gewleɗ klaw apprəmən vaska, gidivit adək aka ɗəf də məlməni.

²⁵Yaŋ Zezu aye pakə, apsit na: Məlĩ net ɗii watak kiyit də gagay nani, ɗii gugiriɗ bo tahəŋ wərbanən gakdak neti.

²⁶Amma wən adaɗɗa vas awaloŋkum ɓa. An ɗəf taka aŋgələk kawsan daya say dəsaŋ gən məgəɗ wəza nokum.

²⁷Ɗəf taka suwalaŋ kum aŋgələk kawsan daya, say dəsaŋ gən balam nokum.

²⁸Ko Wətən dəffa dəde vi ɗii dəɗɗaŋ sənəŋ gən wəza ɓa, amma vi dəgəɗ gən wəza sit ɗiiyi, apanək zeŋgillen vi kawkohgit ɗii diiɗa.

²⁹Adan agilyoŋ suwalaŋ gəla na Zeriko, ɗii diiɗa asbanənək Zezu.

³⁰Daŋgerɗe sula tahəŋ aba tive, apprəmənək Zezu tay toŋgo, atəŋgaŋgək wənzla vamvəlla, aɓɗaŋ na: Aw Ɗəfdaya wətən Davitti*, awəl saha kamə.

³¹Yaŋ ɗii ahayetini dəɓətaŋ gəni. Amma anzlaŋgək vamvəl dayki laŋka aɓɗaŋ na: Ɗəfdaya, wətən Davitti, awəl saha kamə.

³²Zezu aziwke, ayeke, assohotike: Mi kəŋglaŋ nəgəɗ sukum gən di?

³³Azlanənək na: Ɗəfdaya vi haram duwəl gəni.

³⁴Zezu awələk saha keti, arəŋ gənək hereti, go'ləŋgə heret daŋgerɗe sula akolko asbanənka.