Read Gidar Matiye 21 Bible Online

Matiye 21 - Gidar bible

Matiye 21

¹Adan azaraŋ go'o də Zerusalem, agapaŋgək awalaŋ gəla na Baytifage, amaŋgava gərəm na hereme, Zezu aslənək gewleɗ nan sula.

²Apsit na: Mədoŋ awalaŋ gəla an na bokum ndaka, kakaŋka ni wakərəhən koro dət wətən bəlatəkə tahəŋ mineti. Məpəle, məkisuwe.

³An ɗəf tay nah sukum ko mi pakə, mənahsən na: Wəray Ɗəfdaya taya zeti, wapan sukum.

⁴Agəɗ vas na vi wəpel na məs kleŋ dəsaŋ gən gesiŋ, amna:

⁵Mənahsən walaŋ gəla metiŋ na, Siyona. Awla məlĩ nok tayizan anokda awkaɓ ɓa, tay kaa'a aka koro, akat bəlatək nata.

⁶Gewleɗ nan ambataŋka aɗɗanənək va Zezu anahsiti.

⁷Akisənənək koro gəm bəlatək nata. Apakənək lukutɗe net aket korɗe Zezu apaŋka.

⁸Ɗii diiɗa apakənək lukutɗe aka tive,

⁹ɗiiyen dərɓaga Zezu dit ɗiiyen na bani tahəŋ wəpeleŋ də wənzla vamvəlla: Gakdak na wətən Davitti, Maŋgəlva dəɗɗa zəzay nan aka ɗəf məzəzan də iya na Ɗəfdaya, gakdak aza Ɗəfdaya na disiŋ.

¹⁰Adan Zezu adawtoŋ a Zerusalem, walaŋ gəla metiŋ pak aggrəŋgaŋka. Yaŋ adawnahaŋ na: Aŋ naway yaŋ di?

¹¹Ɗii azlan sitin na: Zezu məs kleŋ na Nazaret naka dələv na Galileyi.

¹²Yaŋ Zezu atoŋ adəv gəla metiŋ naw zuliya. Arɓihik məvəlaŋ zəga dit məlbahaŋ zəga nadəv gəla nan pakə, aslkərək akoti net mədəɗaŋ deleɗi may mazaŋgeɗ net məvəlaŋ mukuɗuŋgileɗ na maha.

¹³Apsit na: Va məverin adəv ɗerewel na, Maŋgəlva amna: Gəla naw ndəni gəla na zuliya, amma nokum kəkpaŋganənək va bətəŋ net məvoŋgoŋ tive.

¹⁴Deŋgerɗe dit vədalɗe pak azoŋko za Zezu adəv gəla metiŋ naw zuliya, ambəl gitike.

¹⁵Ɗii gugiriɗ net məs dəlveŋge dit məsənaŋ zəga na ma henziŋ na Maŋgəlva gidivit adək sawɓa, vi awlanən wəza an nagət akanəŋ agəɗəŋka. Kirin bo tahəŋ wənzlaŋ vamvəl adəv gəla metiŋ naw zuliya, tahəŋ wənahaŋ na: Gakdak aza wətən Davit*.

¹⁶Apsənən Zezu na: Kapprəmək an Kirniŋ adaw nahaŋgəŋ sa? Zezu azlan sitik na: Haha, əntatə prəmni. Kəŋɗanən an məverin ɗaah ɓa sa: Də met kirni dit en muwaɗaŋ bideŋ wənna gakdokok algilyani.

¹⁷Yaŋ apeti, agil suwalaŋ gəla metiŋ, ambatka a Baytaniya adak avoŋgu.

¹⁸Vit pumpum nan də mompumo yaŋ Zezu ada milyan awalaŋ gəla metiŋ may adaka.

¹⁹Awlak sukoyo aba tive, amzlaka mbrani, amma dərah uwa nan ɓa, say gaslamba nan kaaka'ə. Yaŋ Zezu anah sən sukoyo na: Kuwəna ɗaah ɓa. Go'ləŋgə sukoyo akəlka.

²⁰Yaŋ gewleɗ nan awlanən vaska, agətaŋgək sawɓa. Assohonənək Zezu: Dewɗe sukoyoŋ aŋkəl go'ləŋ di?

²¹Zezu azlansitike: Gesiŋ nəda nah sukum: An munokum tat də wətafa, məza kuzuŋ ɓa, wakəɓapaŋ wəɗɗaŋ say an va nəgəɗ sən sukoyo kakayi ɓa, amma an dayki aska. An va kənahaŋgək sən gərməŋ na azar saŋka, doko pe'e, wagəɗə.

²²An munokum tat də wətafa wakərəhaŋ an məs kəssohoŋ pakə.

²³Yaŋ Zezu atoŋ adəv gəla metiŋ naw zuliya*, atəŋgək wəpel wən na Maŋgəlva daka. Ɗii gugiriɗ net məs dəlveŋge dit Yahudiyenɗe azoŋko zani, assohonənka: Də sembe nami kəɗɗe zigeɗiŋ di? Naway dəpsuk sembe nan di?

²⁴Zezu azlan sitik na: Naw van wanəssohokum tamə. An kəzlan suwənka, naw bo wanənah sukum təki nərəh sembe naɗɗe zigeɗiski.

²⁵Naway dəslən Zaŋ məgəɗ baptem di? Maŋgəlva sa, walla ɗiiyi? Atəŋgaŋgək wəbay ma awalaŋ ziti də wənah na: An mənahək na: Maŋgəlva dəsləna, wassohomna: Ya vi mi kətafnən ɓa di?

²⁶Amma an mənahək na ɗiiyəŋ dəslənnəni, say mə geslne səm sit ɗiiyi, vi ɗii pak asənənək Zaŋ məs kleŋgi.

²⁷Vi vaski azlan sənənək na: Məsən ɓa. Zezu apsit na: An vaski na naw van tam nənah sukum na sembe məs nədeɗɗe zigeɗis dəndən ɓa.

²⁸Zezu amna: Mi kədaɗɗumoŋ akawənaŋ di? Ɗəf tay dit kirin sula. Yaŋ ambat aza wiyən an dabəŋ, apsən na: Doku gəɗ su wəza a guli net wəleŋɗe dəpaŋka wətuwa.

²⁹Yaŋ azlan sən na ndaw na ɓa. Amma dərɓagani aɗumko, ambatka gulyo.

³⁰Yaŋ affən ambat aza ma sula'ən, anahsənək an məs anahsən wiyən an dabəŋ naka. Nan azlan na: Əndawa əbba. Amma dəmbat ɓa.

³¹Awaleŋgit kirin sules na naway dəgəɗ əŋgla na affən di? Aɓɗaŋ na: An dabəŋ dəɗɗa. Yaŋ Zezu apsit na: Gesiŋ nədawnah sukum: Mətafaŋ zomorgol dit gil məpolkoyeɗ watoŋgoŋ məlĩ na Maŋgəlva dabəŋ kikum.

³²Zaŋ adeke arban sukumək tive an mogoni kətafnən ɓa. Amma mətafaŋ zomorgol dit gil məpolkoyeɗ atafnənka. Ko dərɓaga kulanən vaska kətubiyaŋ vi kətafənən gən ɓa.

³³Ya məpprəm wən məkpaŋgaŋka: Ɗəf maɓɓan tayi, agəɗək guli net wəleŋɗe abasək man də mambara, akuhuk katafay naw ɗot uwa net wəleŋɗe, arkak gəla naw ga guli nani. Appanək guli van avet məɗɗaŋ wəza, ambatək malaka.

³⁴Yaŋ pay naɓu uwa net wəleŋɗe agapə, aslinik gewleɗ nan azet məɗɗaŋ wəza vi dəpsənəŋ gən haran nani.

³⁵Məɗɗaŋ wəza armeninik masləŋɗe nani, avərənək an taka, an taka bo abayənka mahoko'it bo, askanənək dit kuneŋge.

³⁶Affən guli aslinik ɗii diiɗa daykiyit en laŋ neki, aɗɗaŋ sitinik va aɗɗaŋ sitin ɗiiyen dabəŋ neki.

³⁷Aslənək wətəni amna: Wagakdakanən wətuwəŋka.

³⁸Adan məɗɗaŋ wəza a gulyo awlanən wətəni, anahaŋgək awalaŋ ziti: Ndəni məzəm gəla aza guliŋka. Aɓɗaŋna məbay səmə guli nan dəsaŋ gən kanamə.

³⁹Armanənka agil gənənək ama poho na gulyo, abaynənka.

⁴⁰Zezu assohotike: Kaŋ yas na, an affən guli net wəleŋɗe adek na, ma dawgiɗ sit ɗii'is di?

⁴¹Azlan sənənək na: Wabeye məza ula saha aket ɓa, wappan guli nan avet ɗii meɓɓeti, en məs napsənən uwa net wəleŋɗe va aŋgələ.

⁴²Zezu apsit əmpana: Kəŋɗanən ɗaah an məs məverin ɓa sa? Kunəŋ məs mərkaŋ gəla asgaŋgəŋka, awla ndəni dəkpaŋ kuwən na sləma. Vaski an məs Ɗəfdaya agəɗə, as sokeneyi amaramə.

⁴³Zezu aməs kənah na: Vi vaski əntatə nah sukum: Maŋgəlva wagəm haran nokum sədəv məlĩ nani, wapsit ɗii meɓɓeti məs dədawaŋ uwa mogoni adəv məlĩ nani.

⁴⁴[Ko naway dəsbər aka kunəŋka wanzlan zəni. Ya an kunəŋ abətək aka ɗəffa, watakaɗɗan va burɗuku.]

⁴⁵Ɗii gugiriɗ net məs dəlveŋge dit Farisiyenɗe* apprəmən wən məkpaŋga an Zezu anahəŋka, asənənək pak aket apeli.

⁴⁶Yaŋ akayaŋ kuket narmani, amma geslne armek sit ɗiiyi, vi ɗii tahəŋ ulanən va məs kleŋ.