Read Gidar Matiye 25 Bible Online

Matiye 25 - Gidar bible

Matiye 25

¹Yaŋ məlĩ na Maŋgəlva agilik va gorɗeŋge klaw, agəmənək pitirleɗ neti, adoŋ wəga ɗəf naw gəma.

²Sle meɓɓeti dirweŋge, sle meɓɓet bo məs koketɗe.

³Dirweŋge agiminik pitirleɗ neti, dəziyaŋ mele adivit ɓa.

⁴Yaŋ net məs koketɗe agiminik bəbirɗe namel evet də pitirleɗ neti.

⁵Ɗəf nawgəm anzika, ndəɗaŋ pak tahəŋ dikziŋ dikziŋ, aleŋgeŋke.

⁶Tətaŋ dəfɗa wəɗəla agəɗka: Yaŋ ɗəf naw gimit agili vi kalmaŋ dənɗaŋ.

⁷Yaŋ gorɗeŋge klaw nek pak asilyoŋko, azeɓetinik pitirleɗ neti.

⁸Dirweŋge apsitin məs koketɗe na: Məpsəm mel nokuməŋ ɗa, vi pitirleɗ nam tahəŋ wəmtaŋgə.

⁹Məs koketɗe apsitin na: Kay tay natər səm wəray sap də munokum pak ɓa, mədoŋ məlbah avet məzuvələni.

¹⁰Adan adoŋ wəlbah mele, dəpaski ɗəf naw gimit ade. Yaŋ gorɗeŋge məs koketɗe atoŋgoŋgək dəni məmpani madamba.

¹¹Dərɓagan suɗike ni gorɗeŋge meɓɓet nek azoŋko, aɗiyaŋgək genger diiɗa: Ɗəfdaya Ɗəfdaya akol səm madamba.

¹²Amma məzu gimit azlansitike: Gesiŋ nədawnah sukum nəsənkum ɓa.

¹³Yaŋ Zezu amna: Məga, vi kəsəŋ nən pay nan ɓa walla wənziya na pay nan ɓa.

¹⁴Wagəɗ va ɗəf məmbat malaka, ayek məɗɗaŋ wəza nani, apsitik arya nani.

¹⁵Apsənək ɗəf taka, deleɗ na meleŋge səkat sle, ɗəf maɓɓan səkat sula, mohoku'it bo səkat taka, vi ko naway aza sembe nani. Yaŋ ambatə.

¹⁶An məs dərah deleɗ na meleŋge səkat sle, ambatka, agəɗək terere dənɗaŋ, awaŋka aket səkat sle.

¹⁷Vaski bo an dərah səkat sula agəɗək vanani arahək səkat sula aketi.

¹⁸An məs dərah səkat taka ambatka, atəfək təki afuŋgu andikik deleɗ na ɗəfdaya nani.

¹⁹Wənziya suɗike dərɓagani, daya net məɗɗaŋ wəza adeke, assohotik dəŋɗan sənən gən wəŋɗa net deleɗ nani.

²⁰An məs dərah deleɗ na meleŋge səkat sle nak adeke, amna: Daya nawa kəvayək deleɗ na meleŋge səkat sle. Yaŋ nərahək aket səkat sle maɓɓani.

²¹Daya nan apsən na: Lewi, məgəɗ wəza mogok kənani, kəgəɗək wəza mogon də zəga an tay də sləman diiɗa ɓa, wanəpsuk zəga diiɗa an məs də sləman diiɗa. Ade toŋgu, anneken zuk də ina.

²²An məs dərah deleɗ na meleŋge səkat sula nak adeke, amna: Daya nawa, kəvayək deleɗ na meleŋge səkat sula. Naha səkat sula riba an duwə aketi.

²³Ɗəfdaya nan apsən na: Lew kəɗɗa məgəɗ wəza mogok kənani, matakataka taya zok ɓa. Matakataka taya zok aka zəga suɗike ɓa, wanəɗiko aka zəga an diiɗa. Ade anneken zuk də ina.

²⁴An məs dərah deleɗ na təbəs səkat taka adeke, amna: Aw ɗəfdaya nəsənka əstə ɗəf tattuwãha wakəbəl ko səki an kəslgə ɓa, wakəkalan səki an kəndol zemve ɓa.

²⁵Vini geslne duwa nəmbatə, nəndək deleɗ nok amba dəlva fuŋ, zəga nok yaŋka atafa.

²⁶Daya nan azlan sənək na: Məgəɗ wəza mbrayuk kənani. Kəsənək wanəbəl səki an nəslgə ɓa, wanəkal zəga səki məs nəndol zemve ɓa.

²⁷Aslək kəzeɓet gən deleɗ naw abaŋ an nədek na, wanirih də riba.

²⁸Mətaf an suɗike net deleɗ na təbəs səvani, məpsən ɗəffan dit deleɗ na təbəs səkat sle.

²⁹Vi ɗəffan də zəga vani, kapsəni akan diiɗa. Amma ɗəffan məs avan suɗike, kaw gəmni səvani an məs arah suɗike.

³⁰Məgəɗ wəza ɗarəŋka, məgil gən apaka məsgan ara guzliyo. Dəhəm gən də wəmpəran slayən adaka.

³¹Pay Wətən Ɗəf* adazan də gakdak nan dit maslayɗe nani, wasan aka mazaŋga na məlĩ nani.

³²Ɗii namba dələv pak wakalaŋ abani, waw ɗeket ɗii va məzutaɗa adawɗeket timeŋgiɗ dit gilewi.

³³Wazi timeŋgiɗ aka van dəzəŋ, gilew bo aka van zlaɓay.

³⁴Məlĩ wanah sit ɗiiyen naka van dəzəŋ na: Mide munokum məs Affu agəɗ sukum zəzaya, mətoŋ adəv məlĩ an məzaɓan vikum daga wətəŋ na dəlva fuŋ.

³⁵Vi nəsawək də maya, kəzəm guwənka, meme aduwənka, kəvayaŋgək iŋkile, nədek malaka kətafwənka.

³⁶Pay nəsaw zu mekeleŋ, kəvayaŋgək lukutu nəsawək də gbəgba'a kəbahaŋ suwənka, nəsawək a daŋgay kəzoŋguk uluwəni.

³⁷Yaŋ ɗiiyen də goŋga ada sohonəni: Ɗəfdaya na dewɗe muluk də may məzəm guk di? Walla də meme kənani məpsuk iŋkile di?

³⁸Ɗewɗe mətafuk va malaka anamda di? Walla lukut tay azok ɓa məpsuk di?

³⁹Ɗewɗe muluk də gbəgba'a, walla a daŋgay, məmbat uluk di?

⁴⁰Məlĩ wazlan sit na: Gesiŋ nədawnah sukum, ko mi məs kəɗɗaŋ sən taka nambet milmiŋgiɗu en muzliyeɗi su kəɗɗanəni.

⁴¹Asna wanah sit ɗiiyen naka van zlaɓay na: Məzar səzaw faraɗa munokum məs Maŋgəlva araygukum, mədoŋ aka offo məs amta ɓa ha faɗə, məs məzaɓan vi Ibilisa dit maslayɗe nani.

⁴²Yaŋ nəsawək də maya, kəvayaŋ zəga nawzəm ɓa, meme aduwənka, kəvayaŋ iŋkile naw saa ɓa.

⁴³Nədek malaka kətaf wən ɓa, nəsawək zu mekeleŋ kəvayaŋ lukut ɓa, nəsawək də gbəgba'a may a daŋgay kəzoŋ uluwən ɓa.

⁴⁴Wazlanən na: Ɗəfdaya dewɗe muluk də maya: Walla də meme, walla malaka, walla zuk mekeleŋ, walla də gbəgba'a, walla a daŋgay məbah suk ɓa di?

⁴⁵Asna wazlan sit na: Gesiŋ va kəɗɗaŋ ɗaah sən taka nambet muzliyeɗiŋ ɓa, kəɗɗaŋ suwən ɓa'a.

⁴⁶Kawketi aki nawzəm saha an ha faɗə, amma ɗiiyen təstəssə wasoŋ də zeŋgille ha faɗə.