Read Gidar Matiye 27 Bible Online

Matiye 27 - Gidar bible

Matiye 27

¹Adan təki adaŋgə ɗii gugiriɗ net məs dəlveŋge dit ɗii gugiriɗ net Yahudiyenɗe, aslereŋgək aka Zezu vi kawbayni.

²Aɓruknənka, akanənka, apsənənək ava Pilatu governer na Roma.

³Adan Zudas məs dəzəm ki Zezu awlak kita armak Zezu, arbanək an məs agəɗə, amndegetik deleɗ kaklaw hoku nek sit ɗii gugiriɗ net məs dəlveŋge, dit ɗii gugiriɗ na dəlva.

⁴Amna: Nəgəɗək mbrayen vi nəzəmək ki ɗəf məs tay də mambray ɓa, ha gap ndən zamə. Amma azlan sənənək na: Məsam di? As wən noki.

⁵Andolik deleɗ nek adəv gəla metiŋ naw zuliya*, agilke, ambatka, alawək zəni.

⁶Ɗii gugiriɗ net məs dəlveŋge agbeninik deleɗ neki, aɓɗaŋ na: Ma henziŋ nam atakək wəɗiyit adəv gəla metiŋ na zuliya, vi deleɗ net mbelləŋ.

⁷Yaŋ aslereŋ aka wənnani, kalbəh guli səva mərkə mozgoyɗe, vi kawndək melekeɗ adaka.

⁸Vi vaski məyan na guli net mbeli ha dəpaŋka.

⁹Yaŋ agrak an məs kleŋ Zeremi anahə: Amna: Agiminik deleɗ kaklaw hoku məs məsler aketi, deleɗ en ɗii na Israyel aslereŋ nalbəhni.

¹⁰Yaŋ albəhən guli na məzərkaŋka, va Ɗəfdaya anahə.

¹¹Zezu aziwik aba governer, governer assohonəka, amna: Əstə məlĩ net Yahudiyenɗe sa? Zezu azlan sənəka va kənahə.

¹²Yaŋ ɗii gugiriɗ net məs dəlveŋge awəlinənka dəzlan ko midi ɓa.

¹³Yaŋ Pilatu anahsən na: Kapprəmən wənəŋ ada peleŋ akok gbaŋkəŋ ɓa sa?

¹⁴Zezu dəzlan sən ko wən taka ɓa, ha Pilatu agətək akan sawɓa.

¹⁵Pay wəzləra na Paska*, governer apan ɗəf na daŋgay taka an aŋglaŋ vi wənnet tay vaska.

¹⁶Dəpas bo ɗəf maɓɓan taya daŋgay iya nan na Barabbas ɗəf mbrayeni.

¹⁷Yaŋ akkalaŋgə, Pilatu apsit na: Naway kəŋglaŋ nəpan sukum gən di? Zezu Barabbas sa? Walla Zezu məs adawyaŋ na Messiya*?

¹⁸Vi asənəka ana Zezu ada bayaŋ də kotoroku.

¹⁹Adan Pilatu asan aka mazaŋga na kita, yaŋ ɗak nan təslən səni, təpsən na: Kədawgəɗ sən ko mi sən ɗəfəs ɓa vi ɗəf təstəssi vas bo nəzəmək saha diiɗa na dəfəɗ də wəsine aka wənnani.

²⁰Amma ɗii gugiriɗ net məs dəlveŋge dit ɗii gugiriɗ na dələv pak arban sitinik ɗii pak dəssohoŋ gən dəplan sitin gən Barabbas dəbay gən Zezu.

²¹Govener azlanəka apsit na: Naway suweleŋgit ɗii sulaŋ naway kəŋglaŋ nəpan sukum gən di? Aɓɗaŋ na: Barabbas.

²²Pilatu apsit na: Ya mi nədaɗɗa də Zezu an məs adawyaŋ na Messiya* di? Ndəɗɗaŋ pak aɓɗaŋ na: Akpa'a akawəlaŋga məzliwrihe.

²³Amna: Vi midi, mambray mi agəɗ di? Amma aɗiyaŋgək geŋgere zani, aɓɗaŋ na: Akpa'a akawəlaŋga məzliwrihe.

²⁴Adan Pilatu awla dəɓap wəɗɗa zəga ɓa, say geŋgere dədaɗɗa dayki laŋka, agimik iŋkile, aɗɗak van abet ɗiiyi. Amna: Salala nan səzet mbel na ɗəffəŋka, nan wən nokumi.

²⁵Ɗii pak azlanənka, aɓɗaŋ na: Mbel nan dəsoŋ gən akam dit kirtəmə.

²⁶Yaŋ apan sit Barabbas, amma aɗiyək wənnani avərənək Zezu, apsitik Zezu aveti, dəkpa' nən gəni aka wəlaŋga məzliwrihe.

²⁷Yaŋ sozeɗ na Pilatu akanən Zezu adəv gəla na ngomna, sozeɗ pak akalaŋka kani.

²⁸Agbukunək lukut nani, azəɗ sənənək zəga peppreŋge.

²⁹Atroɗənək gedirge va mətər kiya, avaɗ sənənək akani, apsənənək zleŋge aza van dəzəŋ, akdukunək takpret abani, anəhaŋgək wənna zani. Usɗoko məlĩ net Yahudiyenɗe.

³⁰Atəf sənənək mefɗe zani, atafənək zleŋge sə vani vi kaw vərən dəndən aka kiyən.

³¹Adan agrakən wənəh wənna zani, agbukunək lukut naka, agul sənənək lukut nani, akanənək vi kada kpa'ən aka wəlaŋga məzliwrihe.

³²Adan agulyoŋ almaŋ sənənək ɗəf na Sirene, iya nan na Simoŋ, adewlinənka dəslan gən wəlaŋga məzliwrihe na Zezu.

³³Adan agapaŋ atəki məs adawyaŋ na Golgata, va wənah na təki na bəbər kiya.

³⁴Apsənənək mbazla məslahan də zəga tatrahã, vi dəsa gəni. Adan a nani, dənger wəsan ɓa.

³⁵Akpanənək aka məzliwrihe, awɗeketinik lukutɗe nani, askaŋgək saasa aka lukut nani.

³⁶Yaŋ asoŋ adak wəgani.

³⁷Averninik mambray an məbayən akani. Aka zəga alawənək adisiŋ kini. Ndəni Zezu məlĩ net Yahudiyenɗe.

³⁸Yaŋ akpe'in məvoŋgoŋ tive sula dəni, taka aka van dəzəŋ taka bo aka van zlaɓay.

³⁹Ɗii məzu toŋgoŋ dədak aɓlanənək kiti, aranənka:

⁴⁰Aɓɗaŋ na: Is napzlu gəla metiŋ naw zuliya*, karkan pay hoku akoh gən zuk kana. An Wətən Maŋgəlva* kənani aprik səka wəlaŋga məzliwriheŋka.

⁴¹Vaski bo ɗii gugiriɗ net məs dəlveŋge dit məsənaŋ zəga na ma henziŋ na Maŋgəlva, gəm ɗii gugiriɗ na dəlva, anahaŋgək wənna zani: Aɓɗaŋ na:

⁴²Akohgitik ɗii meɓɓeti, aɓapna wəkoh gən zən ɓa sa? An ndəni məlĩ net Israyelɗe na, say dəprik səka wəlaŋga məzliwriheŋka, asna mətaf gəni.

⁴³Makran pak aka Maŋgəlvayi, say Maŋgəlva dəkohgənə gən kakaŋka, mula gəni an aŋgluwək kana. Amna: Əntə Wətən Maŋgəlvaŋka.

⁴⁴Vi vaski bo məvoŋgoŋ tive məs məkpe'it dəndən aranəni.

⁴⁵Daga pay ziwi guzli titir agəɗək aka dələv pak ha gap ler hoku moskoyo.

⁴⁶Daga ler hoku, Zezu aɗiyək geŋger diya diya: Eli, Eli, lema sabaktani? Va wənah na: Aw Maŋgəlva nawa, aw Maŋgəlva nawa, vi mi kəpaw di?

⁴⁷Ɗii en də ziweŋ adaka, adan apprəməni, aɓɗaŋ na: Tay ya Eliyas.

⁴⁸Go'leŋgə ɗəf taka səmbet anzanəka, agəmək gislete, alɓanək də zəga nawsa an ɓaɓlaka, asləkək aza ngava, apsənək dəwaɗ gəni.

⁴⁹Amma ɗii meɓɓet aɓɗaŋ na: Apanɗa, mula gən an Eliyas waɓap wəkoho gəni.

⁵⁰Zezu aɗiyək geŋger diiɗa apanək zeŋgilleni.

⁵¹Yaŋ gabaga an məga' gədəv gəla metiŋ naw zuliyəŋ angarka daga sə disiŋ ha afuŋ, dələv aɓəlka, milɓeɗ pak apəɗakaŋka,

⁵²magamasɗe akoloŋko, ɗii na Maŋgəlva diiɗa asilyeŋgik səki əmta.

⁵³Agulyoŋguk sədəvət magamasɗe, dərɓaga Zezu asil səka əmta, atoŋgoŋko awalaŋ gəla an salala*, ɗii diiɗa awlenənke.

⁵⁴Daya net sozeɗi dit sozeɗ na Roma məgaŋ magamas na Zezu, adan awlanən wəɓla na dələv də an dəgəɗ pakə, ageslne'eŋgək diiɗa, aɓɗaŋ na: Gesiŋ aŋki Wətən Maŋgəlva*.

⁵⁵Gil tahəŋ adak diiɗa məzulaŋ səka faraɗa, məzəsbanən Zezu daga səka dələv na Galile, vi kagəɗsən wəza.

⁵⁶Suwaleŋgitə Mari sə Magdala gəm Mari ma Zak gəm Zozef, dət met kirtin Zebede.

⁵⁷Moskoy ɗii ameŋgle guromə, ɗəf məs arya suwalaŋ gəla na Arimatiya adeke, iya nan na Zozef. Nan bo gawla na Zezuwi.

⁵⁸Ambatka za Pilatu, assohonək gəbay na Zezu. Yaŋ Pilatu apsən tive nan sən Zozef.

⁵⁹Zozef aslanək gəbay na Zezu, atərək də boɗoko meleketeni.

⁶⁰Avoŋ gənək adəv magamas nan meleketeni, an məs aso' adəv milɓe. Akəɗəŋgələk gərəm metiŋgin ama gamasə, ambatka.

⁶¹Mari sə Magdala gəm Mari mambərət nakə, asoŋgək adaka heret sek aka magamas naka.

⁶²Vit pumpum nani, dərɓaga wəzaɓan zəga na pay naffete*, ɗii gugiriɗ net məs dəlveŋge, dit Farisiyenɗe*, akkalaŋgək aza Pilatu.

⁶³Anah sənənək məlĩ na məɗumonək wənna məwə wənəŋka, daga adasan makarani amna: Pay hoku dərɓaga wəmta naw wanəsil səzet ɗii məmtiti.

⁶⁴Vi vaski anah sit na dəganən magamas ha gap pay hoku, vi gewleɗ nan adazoŋ wəhalən dəfɗa, kaw nahsitin ɗii na: Asilik səzet ɗii mimtiti, vasna uwa wənnan an dirɓe waday kiyən an madabəŋ.

⁶⁵Pilatu amna: Sozeɗ yeŋki dəduwaŋ wəganən va kəŋglaŋ.

⁶⁶Ambataŋka, atipinik magamasə, aɗɗanənək tampoŋ na ngomna atəki mətipin naka. Aɗiyinik sozeɗ dəganən gəni.