Read Gidar Matiye 3 Bible Online

Matiye 3 - Gidar bible

Matiye 3

¹Də pay nani Zaŋ məgəɗ baptem agilke a muya na Zude, atəŋgək wəpele.

²Amna: Məkpaŋgan wədaw nokum vi məlĩ na Maŋgəlva go'oy.

³Zaŋ ndəni an məs kleŋ Ezay apel wənnani amna: Ɗəf tay wənzla vamvəl awra: Məzaɓan tive na Ɗəfdaya, məɗɗa sən tiveɗ dəsoŋgən sarara.

⁴Zaŋ tay gul lukut məɗan də denɗeke na zlogomo, tay winan dədakan də kətu, zəga nawzəm nan na heyɗeŋɗe gəm amama.

⁵Ɗii məs dəzoŋ sə Zerusalem səka dələv na Zude may səka dələv na maŋgava məlpa na Zordan pakə, azoŋko azani.

⁶Arbanənək mambray neti, Zaŋ aɗɗa sitik baptem a məlpa na Zordan.

⁷Adan Zaŋ awle Farisiyenɗe* dit Sadusiyenɗe ada zoŋ azani vi kawrəh baptemi, apsit na: Kirtit barwayɗe nawa dənah sukum na wakukohoŋ səma wəda gədəv na Maŋgəlva an dədazan di?

⁸Məgəɗ wəza an narban na kəkpaŋgaŋka, kəpplanənək wəza nokum məsvani:

⁹Kədaɗumoŋ amokrokum na: Dəhiŋgiɗin Abraham mənani ɓa. Naw əntatə nah sukum, Maŋgəlva tay də sembe na kpeŋget kuneŋge dəkpaŋgaŋ gən kirtin Abraham.

¹⁰Məzaɓani zlimbe kaw bəl wəlaŋga daga səza gbumgburən, wəlaŋga məs awa mogon ɓa pak kaw bəlni, kaw sapni aka offo.

¹¹Naw əntatə gəɗ sukum baptem dit iŋkile vi ndəni dəgəɗ sukum saydawa na kəkpaŋgaŋka. Amma ɗəffan nazan dərɓagawa waɗɗa sukum baptem də Əmpəs Salala gəm də offo, na kita. Nan adayək kiyu diiɗa. Nəgap ko nəgbuk gən hensek nan ɓa.

¹²Tay də tekpesle naw seŋger hay nan avani vi aŋgəl kaw seŋger haya, wagohon dit keselme. Wakkalan hay a maha a nanda, amma wazle keselme də offo an məza amta ɓa.

¹³Yaŋ Zezu asil səka dələv na Galile, ade a məlpa na Zordan aza Zaŋ, vi Zaŋ dəgəɗ sən gən baptem.

¹⁴Zaŋ dəŋgəm ɓa, apsən na: Naw nəŋgəl dərəŋ na, kəgəɗ suwə gən baptem yaŋ is əmpa pay azawa?

¹⁵Amma Zezu apsəna: Apan dəgəɗ vas kakaŋka vi vaski məɗɗa gən an Maŋgəlva assoh avam pakə. Yaŋ Zaŋ aŋgeri.

¹⁶Aɗɗa sənək baptem. Adan Zezu egil siret iŋkile disiŋ akolko, awlak Əmpəs na Maŋgəlva aprike va mokuɗuŋgulo asanək akani.

¹⁷Yaŋ wəla ade sə disiŋ amna: Aŋki wətu an nəŋgələ, əntatə neken zu dəndən sawɓa.