Read Gidar Matiye 4 Bible Online

Matiye 4 - Gidar bible

Matiye 4

¹Dərɓaga nəska Əmpəs na Maŋgəlva akak Zezu awra vi Satan dərakan gəni.

²Zezu dəzəm zəga ɓa, pay kaklaw poɗo, may armaka.

³Satan azarka zani, apsən na: An Wət Maŋgəlva kənani anahsit girmeŋgeŋki dəkpaŋgaŋ gən zəga nawzəma.

⁴Zezu azlansənka: Ɗerewel amna: Ɗəf asana madaran vi way kaaka ɓa, amma də wəpel an dədawgilyen səma Maŋgəlva pakə.

⁵Satan akak awalaŋ gəla metiŋ salala, asugənək aka gəla metiŋ naw zuliya*.

⁶Apsən na: An Wətən Maŋgəlva* kənan na, azlah daga saŋka ha a fuŋ, vi ɗerewel anahək na: Maŋgəlva waɗi wən nan set maslayɗe nan viko, də kaslkun gəni də veti, vi tuluk adaŋgbay aza gərəm ɓa.

⁷Zezu azlan sən na: Ɗerewel amna: Kədawrakan Maŋgəlva Ɗəfdaya nok ɓa.

⁸Yaŋ Satan apaŋ gən aka mosorgo məɓayən diiɗa, arban sənək milyeŋge na duniya də gakdak net pakə.

⁹Apsən na: An kukdukuk takprok vi ka gakdakawa wanəpsuko.

¹⁰Amma apsən na: Dok səzawa, Satan, appawa. Vi ɗerewel amna: Agakdakan Maŋgəlva Ɗəfdaya noko, anan katər gən kəlgəɗ sən wəza.

¹¹Dəpaski Satan apan Zezu, yaŋ maslayɗe azoŋ azani aɗɗaŋ sənənək wəza.

¹²Yo adan Zezu apprəm na, məsgani Zaŋ a daŋgay, asilke, ambatka aka dələv na Galile.

¹³Asana a Nazaret ɓa, ambatək wəsan a Kafarnahum, awalaŋ gəla disiŋ ki pe'e, na Galile aka dələv an mərslani, Zabulon də Neftali.

¹⁴Də wəɗɗan vaski aknəhan wəpel na məs kleŋ Ezay anah na:

¹⁵Dələv na Zabulon də dələv na Neftali, daga səka tive nawmbat a pe'e dəgar ki məlpa na Zordan də Galile, aka dələv net ɗiiyen dəsənaŋ Maŋgəlva ɓa asuwaŋ,

¹⁶ɗii məsoŋ ara guzliyo wawlanən təki babar diiɗa. Ɗii məsoŋ aka dələv namta də tiɗim tiɗim nani, təki babar wakaseke.

¹⁷Dəpaski Zezu atəŋ wəpel wənna. Anahək na: Mətubiyə vi məlĩ na disiŋ go'oy.

¹⁸Adan Zezu adabal aba məlpa na Galile, awlek ɗii də məlma zit sula mərmaŋ kilfi. Simoŋ məs adawyaŋ na Piyer də Andre an məlməni tahəŋ wəsgetin zəveɗe net eret iŋkile.

¹⁹Zezu apsit na: Məsbawa, wanəkpaŋgokum məkayaŋ ɗiiyi.

²⁰Go'ləŋ apetinik zəveɗe neti, asbanənka.

²¹Ambatək abe faraɗa, awlek ɗii də məlma zit sula meɓɓeti, Zak wətən Zebede, gəm Zaŋ an məlməni tahəŋ adəv bəlay də Zebede affiti, tayə zeɓetin zəveɗe neti. Zezu ayeke.

²²Go'ləŋ apanənək bəlay də affiti asbanənək Zezu.

²³Zezu abbalək a Galile pak arbanək wən adəv gəla nawpel wənnet Yahudiyenɗe, apelik Wən Nenek na məlĩ na Maŋgəlva ambəl gitik ɗii məs gbəgbaɗe pak dit ɗii məmbər sit pakə.

²⁴Halabara nan atərayək aka dələv na Siriya pakə, akisənənək məzu zəmaŋ saha də gbəgba' temtem gəm məs gbəgbaɗe məɗeŋgreŋ. Zezu ambəl gitike.

²⁵Ngaɓa net ɗii diiɗa asbanənək daga sə Galile, gəm səka dələv məs adawyaŋ na walaŋ gəleɗe klaw sə Zerusalem, daga sə Zude, gəm daga sə dəgar ki məlpa na Zordan.