Read Gidar Matiye 5 Bible Online

Matiye 5 - Gidar bible

Matiye 5

¹Adan Zezu awle ɗii diiɗa, apaŋka aka mosorgo, asanka, gewleɗ nan azoŋko zani,

²nan bo atəŋgək wərban sit zəga vaŋka.

³Zəzay azet ɗiiyen dəsənən zit na məs sahaŋɗeŋ aba Maŋgəlva, net wasoŋ də Maŋgəlva adəv məlĩ nani.

⁴Zəzay azet ɗiiyen məzuhəmaŋ vi mambray na duniya net Maŋgəlva waɓit giti.

⁵Zəzay azet ɗiiyen məza aɗɗaŋ ɗarɗar ɓa, net Maŋgəlva wapsət dəlva va anahə.

⁶Zəzay azet ɗiiyen məzu kayaŋ kaɗɗa əŋgla na Maŋgəlva də mekret pakə, Maŋgəlva wabah sit daɗɗa an məs akayaŋ.

⁷Zəzay azet ɗiiyen mulaŋ saha aket ɗiiyi, net Maŋgəlva wawəl saha aketi.

⁸Zəzay azet ɗiiyen məs mekret bar, net wawlanən Maŋgəlva.

⁹Zəzay azet ɗiiyen məzu sleretin ɗiiyi, net wasoŋ kirtin Maŋgəlva.

¹⁰Zəzay azet ɗiiyen mərma meti vi adaɗɗaŋ an Maŋgəlva aŋgələ, net wasoŋ də Maŋgəlva adəv məlĩ nani.

¹¹Zəzay azokum, an ɗii arokumənka, armaŋgək mama azokum awaŋ sukumənək wənna vi kusoŋ gewleɗ nawa.

¹²Mənneken zukum, zukum dəsan neki vi riba diiɗa tay gukum a disiŋ vaski aɗɗaŋ sitin məs kleŋɗe en dabəŋ kikum.

¹³Va bəttu adawtər wəray aza zəga nawzəma, vaski kədawtəraŋ wəray aza duniya. Amma an bəttu azanək lellem nani, mbari lellem nan adawsan əmpa di? Bəttu nan atər na wəray ɓa, say wəfukkun ɗii də ndapanən gəni.

¹⁴Munokumtə təki məzu wiɗ na duniya, walaŋ gəla naka mosorgo aɗam na ɓa.

¹⁵Kasɗani offo adəv pitirla vi kaw ɗəp hilu akan ɓa, say kaw ɗiyən aka mətoŋgotoŋgo vi dəkasekgən gən ɗii neŋgil pakə.

¹⁶Say babar nokum də kasak gən vaska, abet ɗii pakə, vi ɗii dulanən gən wəza mogon nokum də gakdakanən gən Affukum ana disiŋ.

¹⁷Kəda ɗumoŋ na nədek vi kaw pəl ma henziŋ na Moyis walla wəpel net məs kleŋɗe ɓa. Naw nəde vi kaw pələn ɓa, amma vi kaknəhan nəde.

¹⁸Gesiŋ nəda nah sukum: Ko va disiŋ də dəlva fuŋ adanziyaŋ pakə, ko ma masinək muzliyəkə walla muzliyək na ma henziŋ kasgati agisbe ɓa, ha gap wəgrak net zigeɗ pakə.

¹⁹Vi ko naway dəzelet ma henziŋgək akən muzliyəkə, walla arban sit ɗii dəɗɗaŋ gən vaska, nan wasan muzliya adəv məlĩ na Maŋgəlva. Amma ko naway dərma wənani arbanək sit ɗii dərmanən gən wənan vaska, nan wasan ɗəf metiŋgin adəv məlĩ na Maŋgəlva.

²⁰Gesiŋ nədawnah sukum: Kətoŋgoŋ na məlĩ na Maŋgəlva ɓa, say an munokum tatərmanən an Maŋgəlva aŋgələ daykiyit məsənaŋ zəga na ma henziŋ dit Farisiyenɗe*.

²¹Kəpprəmənək va mənah sit dəhiŋgiɗkum: Kəda bay gəbay ɓa, ko naway də bay ɗəffa warah kita.

²²Amma naw əntatə nah sukum: Ko naway məs gədəvən adawda aka məlməni, kaw kani aba arkali. Ko naway dənahsən məlmən na: Zəga ɗəɗar kənani, kawkani aba kita net ɗii gugiriɗ na dəlva. Ko naway dənahsən məlmən na: Məzok kənani, agapək na gulun aka offo an metiŋgini.

²³Vi vaski an kədek də zəga napsən Maŋgəlva, say aɗumoni an wən tay awalaŋkum də məlmuko

²⁴apan zəga nok aba Maŋgəlva adaka, agəm zuk doko məsleren dəndən tagay, nok kəmil gən əpsən zəga nok sən Maŋgəlva.

²⁵An ɗəf awəli kuko, munokum tatə mbat aza arkali agəm zuko məsleren dəndəni adan munokum tat aka tive dəndən tagay ɗaŋka, vi adawkuk ava arkali ɓa, arkali tamə adawkuk avet sozeɗ kasgokən a daŋgay ɓa.

²⁶Gesiŋ nədawnah sukum: Kəgil na sədak ɓa say an kəfaɗək an nanəŋ a kokəŋ pakə.

²⁷Kəpprəmənək va anahə: Kəldaɗɗa mana'a ɓa.

²⁸Amma naw əntat nah sukum: Ko naway ɗəf məzilin dulət gulku də wəŋgla nata, agəɗək mana'a amakrani.

²⁹An horok dəzəŋ ambəɗokuk wəɗɗa mambraya, akdəha, asgan fara'a səzoko. Ɗəɗaah wəzzan gəɓa zuk taka ki zuk pak wəmbat aka offo metiŋgini.

³⁰An vok dəzəŋ dədaw kuk adəv mambraya, atawa asgan fara'a səzoko, ɗəɗaah wəzzan zuk taka ki zuk pak wəmbat aka offo metiŋgini.

³¹Anahək na: Ko naway duɗak dət ɗak nani, say dəpsət gən ɗerewel na saydawa na awɗakək dənta.

³²Amma naw əntatə nah sukum: Ko naway duɗak dət ɗak nani an vi arəhət daɗɗa mana'ayi ɓa, an vas na akpaŋ ngatək məgəɗ mana'a an təgəmək ɗəf mambərən. Ko naway dəgəm guluk akən tuɗak də zilta agəɗək mana'a.

³³Kəpprəmənək va anah sit dəhiŋgiɗmə: Kədaw suwayaŋ də təppelke ɓa, amma aɗɗa an məs kinan nawsuway aba Ɗəfdaya.

³⁴Amma naw əntatə nah sukum: Kədaw suwayaŋ kpak ɓa, ko də disiŋ vi təki nasuwa na Maŋgəlvayi.

³⁵Ko də dəlva fuŋ, vi təki naw ɗi təlni, ko də Zerusalem day day vi asan walaŋ gəla na məlĩ metiŋ.

³⁶Ko də kikum kədaw suwayaŋ ɓa, vi kəɓapnəna wəgil gən magalagala ɓa ko muhur titir ɓa.

³⁷Say mənah na: Ha'aw ha'aw, walla awwo awwo, vi wəpel day ki aska səza mambray ade.

³⁸Kəpprəmənək va anahə: Harani vi harani, slayni vi slayni.

³⁹Amma naw na əntatə nah sukum: Kədam ndaganən mambray ɓa.

⁴⁰An ɗəf avərkuko atapaslayuk dəzəŋ, akpaŋgansən zlaɓay, an ɗəf aŋgələk uwəliyuk vi kawtafət lukutuk muzliyək noko, apan də gəm lukut məkso'o noko.

⁴¹An ɗəf agəɗ sukuk dewle nawslansən zəga nan gap kilometər taka, aslansən gap kilometər sula.

⁴²An ɗəf aŋgələk zəga apsəni, an ɗəf assohək dəmən kəl ɓoŋ ɓa.

⁴³Kəpprəmənək va anahə: Aŋglu meggoko azel məzuzelko.

⁴⁴Amma naw əntatə nah sukum: Miŋglu məzuzel kumoni, məkaman Maŋgəlva viyit məzərmaŋ mama azokum.

⁴⁵Vi kəsoŋ gən kirtin Affukum na disiŋ. Tay gilgin paya ket ɗii mambrayɗe dit məɗɗaŋ mogon pakə, tay zi buwən viyit məɗɗaŋ wəza mogoni dit məɗɗaŋ mambray pakə.

⁴⁶An munokum tat əŋglunən məzu ngulukumən kaaka'ə, vi mi kədaw ganən riba səza Maŋgəlva di? Ko mətafaŋ garama day day tay ɗaŋ vaska.

⁴⁷Vi kəsɗetin milmiŋgiɗkum kaaka na, wən metiŋgin kəɗɗaŋ sa? Ko məs dəsənaŋ Maŋgəlva ɓa day day tay ɗaŋ vaska.

⁴⁸Məsoŋ məza də mambray ɓa, va Affukum na disiŋ nan tay də mambray ɓa.