Read Gidar Matiye 6 Bible Online

Matiye 6 - Gidar bible

Matiye 6

¹An munokum tatəɗɗaŋ wəza mogon vi Maŋgəlva, kədaɗɗanən vi ɗii dulukumən gən ɓa. An munokum tatəɗɗaŋ vas na, kərəhaŋ na riba səza Affukum na disiŋ ɓa.

²An əstatə baahsən məzuraya, kədaɗɗan vi ɗii dulukun gən ɓa va net məluvuluvuɗe adaɗɗaŋ adəv gəla nawpel wənnet Yahudiyenɗe, gəm aket tiveɗi. Adaɗɗaŋ vas na vi ɗii də gakdaketin gəni. Gesiŋ nədawnah sukum: Arəhənək riba net səkay.

³Amma noko an əstatə baahsən məzuraya, apsən məɗamma, ko baynok na makroko adawsənən ɓa.

⁴Aɗɗa mogon nok məɗamma, Affuk məzula an kədaɗɗa məɗamma wagəɗ suk riba.

⁵An munokum tatə zuliyaŋ kədaɗɗaŋ vanet muluvuluvuɗe ɓa, səka aŋglaŋ wizu adəv gəleɗe nawpel wənnet Yahudiyenɗe ɓa. Aka zləzlaŋbray tiveɗi, aŋglaŋ kəzuli adaka vi ɗii dulenən gəni. Gesiŋ nədawnah sukum: Arəhənək riba net agrakə.

⁶Amma an kəŋgələk wəzuliya, atoŋ eŋgil anok da, amba təkiya ampan madamba akaman Affuk an na təki nawlay ɓa, Affuk an məzula an kədaɗɗa məɗamma wapsuk riba nani.

⁷An munokum tatə zuliyaŋ kəda mə gənən wəpel va net ɗiiyen də tafaŋ ɓa adaɗɗaŋ ɓa. Azet na Maŋgəlva wataf wəzuli neti vi adaw peleŋ diiɗa.

⁸Kədaɗɗaŋ venet ɓa, vi Affukum asənək an kədaŋglaŋ daga kəɓəlaŋ wəzuli sən ɓa.

⁹An munokum tatə zuli na, vaŋki kədaw nəhaŋ: Aw Affəm na disiŋ, salala* kənani, aɗɗa ko naway pak də gakdakan gən iya noko.

¹⁰Arban səm məlĩ noko. Wəŋgla nok dəsan aka dəlva fuŋ va asan a disiŋ.

¹¹Apsəm way an na tərsəm wəray dəpaŋka.

¹²Aviyan səm mambray namə, va mədah viyan sit ɗiiyen məɗɗaŋ mambray azamə.

¹³Ataɗmə vi Satan ada mbəɗamə, kapan wətaf nam ɓa. Amma agil gəm səva Satan. Vi məlĩ van noki də sembe də gakdaka, ha faɗə. Amin.

¹⁴Am munokum tatə viyanən mbrayen an ɗii adaɗɗaŋ sukuməni, Affukum na disiŋ waviyan sukum mambray nokum tamə.

¹⁵Amma an kaviyan sitin mbray an adaɗɗaŋ sukumən ɓa, Affukum na disiŋ aviyan sukum na mambray nokum ɓa'a.

¹⁶An munokum tat əsee'eŋ meme kədar banən zukum sah venet muluvuluvuɗe adaɗɗaŋ ɓa, taŋ wərosonən ki hereti, vi ɗii dulenən gən na taŋ əsee'eŋ meme. Naw gesiŋ nədawnah sukum: Net arəhənək riba net grakə.

¹⁷Amma isi an əstat əsee' meme aɗah horoko, akot kiko,

¹⁸vi ɗii adasənən na əstatə see meme ɓa. Affuk an na təki məɗamən ndəni dəl sənən kaaka'ə Affuk an məwəl an kədaɗɗa məɗamma, wapsuk riba.

¹⁹Kəl dah zaɓanən arya nokum a duniya ɓa, atəki na məsuk-sləma də təki zazaya kawray gən ɓa, atəki net maheleŋɗe kaw soo' nən gəleɗe kaw halnən ɓa.

²⁰Amma məzaɓan arya nokum a disiŋ, adaka məsuk-sləma də təki zazay aɓap na kawray gən ɓa, mahelɗe bo aɓapnənna wəhalən ɓa'a.

²¹Vi atəki arya nok asani makrok bo adaki adawsani.

²²Haran ɗəf tay va pitirla na zəni. An horok tay mogoni, zuk wasan va naw kekeɓe'e.

²³Amma an horok tay mogon ɓa, zuk pak tay ara guzliyo. An təki babar na zuk kəŋka ara guzliyi, guzli nan wasan diiɗa.

²⁴Ɗəf tay naɗɗa wəza viyit ɗii gugiriɗ sula ɓa. Wazel ɗəffaŋka waŋglu ɗəf andaka, wagakdakan ɗəf aŋka, wazelen ɗəf andaka. Kəɓapaŋ na wəɗɗa wəza sən Maŋgəlva də wəgay sit wənnet deleɗ pak ɓa.

²⁵Vi vaski nədawnah sukum: Kədawyanən zukum də wənna zəga naw zəma də zəga naw saa walla wənna lukut ɓa. Zeŋgille tay də sləman dayki wəzəma, zən bo dayki lukut də sləmani, vaski ɓa sa?

²⁶Mula biŋgeɗi, aslgaŋ ɓa, aw bəlaŋ ɓa, zəga tay ada kalanən a maheɗ net ɓa, amma Affukum na disiŋ tay zəm giti. Kədayaŋ kiyit biŋgeɗ də sləma diiɗa ɓa sa?

²⁷Naway səmbokum də sembe naw kay maŋgesl wəsva nan ko suɗike di?

²⁸Vi mi kədawgayaŋ sənən wənna lukut di? Mule wəfiyeɗ nawra va ada fiyoŋgu. Aɗɗaŋ wəza ɓa, awhoŋ gabaga ɓa.

²⁹Amma naw əntatə nah sukum: Ko Salmoŋ də arya nan diiɗaŋ pak də gul ɗaah lukut mogon va net wəfiyok ɓa.

³⁰Maŋgəlva tay gulsən kevile awra dəpaŋka, pumpum offo wazla. An vaski na agul sukum na dayki as ɓa sa, munokum məs wətaf nokum tay diiɗa ɓa?

³¹Kəda nahaŋ na: Mi məl zəm di? Walla mi məl saa di? Walla mi məl gul di ɓa?

³²Ɗii məs dətafaŋ ɓa taŋ wəkayetin zigeɗis pakə. Amma Affukum na disiŋ asənək pak wəraykum taya zet zigeɗiski.

³³Məgaysən məlĩ na Maŋgəlva dabəŋ də əŋgla nani, asna wapsukum an dəmbər pakə. Kədawkayaŋ vi pumpum ɓa, vi pumpum wasən kini, tattuwãh an də dazan pay pak məkki sən pay nani.

³⁴Kəda ɗumoŋ vi pumpum ɓa: Vi pumpum waɗumsən kini. Payan digil pak tay gaysən tattuwãh nani.