Read Gidar Matiye 7 Bible Online

Matiye 7 - Gidar bible

Matiye 7

¹Kədawtawaŋ kita aket ɗii meɓɓet ɓa, vi Maŋgəlva tam adawtaw kita akokum ɓa.

²Maŋgəlva wataw kita akokum va kətawən kita aket ɗii meɓɓetiŋki, waslukum də zəga an kəslenin ɗii dənnəŋka.

³Vimi kədawla kevile ara məlmuko, amma kulana wəlaŋga arok ɓa di?

⁴Vimi kədawnahsən məlmuk na appawa nəgəmsuk kevile suroko yaŋ nok van wəlaŋga taya roko'e di?

⁵Nok mataka taka kənani, agil gən wəlaŋga sə rok dabəŋ an əstatula lewlew kana, kəgəm gən kevile səra məlmuko.

⁶Kədapsitin zəga salala* sit kirɗe ɓa, vi ada mə'aŋ akokum kaw har kumən ɓa. Kədas getin averzleɗ nokum sit vedemɗe ɓa, vi ada ndapetin də tilit ɓa.

⁷Məssohu wakərəhaŋ. Məkayani wakərəhəni, mərga madamba kawkol sukumi.

⁸Vi ko naway dəssohu warahə. Ko naway də kayani warəha. Ko naway dərga madamba kawkolsəni.

⁹An wətuk assohokuk memteke, wakəpsən gərəm sa?

¹⁰Walla an assohokuk kəlfa wakəpsən doho sa?

¹¹Munokum mbraykum day day kəsənənək wəpsit zəga mogon sit kirtukum. Mbari kan Affukum na disiŋ apsit na zəga mogon sit məzəssohonən ɓa di?

¹²An məs kəŋglaŋ ɗii dəɗɗan sukumən gəni, nokum bo məɗɗa sit vaska. Aski kpak ma henziŋ na Moyis dit ɗerewelɗe net məs kleŋɗe pakə.

¹³Mətoŋ kla madamba feŋge. Vi madamba an slopproku də tive an tay tuwãh ɓa, kawmbat aki naw zay, ɗii diiɗa tahəŋ wəsbanəni.

¹⁴Amma madamba an feŋge, tive nan bo tuwãhə, nan kawmbat aki wəkoho, nan məzəsbanən tahəŋ diiɗa ɓa.

¹⁵Məzi zukum azet məs kleŋɗe məwaŋ wənna, tahəŋ wəzoŋ azokum va timeŋgiɗi, amma mekret na kirɗe munyaŋ.

¹⁶Wakisinin də wəza neti. Wəlaŋga na gedirge awəna makzlembirke ɓa. Giŋgere bo awəna sukoyo ɓa.

¹⁷Wəlaŋga mogoni wawə kirtin mogeti, wəlaŋga mbrayen kawa kirtin bo mbrayti.

¹⁸Wəlaŋga mogoni uwa nan bo mogoni wəlaŋga mbrayen uwa nan bo mbrayen.

¹⁹Wəlaŋga an awa kirtin moget ɓa, kaw bəlni, kasgani aka offo.

²⁰Vaski kəl dawsinin məs kleŋɗe məwaŋ wənna də wəza neti.

²¹Mənahaŋ na: Ɗəfdaya, Ɗəfdaya həŋ nawtoŋgoŋ məlĩ na Maŋgəlva ɓa, say məɗɗaŋ wəŋgla na Affu na disiŋ.

²²An pay nan agapka, ɗii diiɗa wanahaŋ na: Ɗəfdaya Ɗəfdaya məpelik wənna Maŋgəlva də iya noko, mərɓihik tuyeŋɗe də iya noko məgəɗək sokeneɗ diiɗa də iya noko.

²³Naw wanənah sit na: Nəsənkum ɗaah ɓa kpakə, munokum məɗɗaŋ mambraya mədoŋgu.

²⁴Ya ko naway dəpprəm wənəŋka, məs dəsbani, nan tay va ɗəf məs maɗula, dərka gəla nan aka milɓe.

²⁵Buna zika məlpeŋɗe azoŋko, barkataŋɗe bo azoŋguk də sembe aka gəla nani, amma də ɓəsl ɓa vi mərkan aka milɓeyi.

²⁶Amma ko naway dəpprəm wənəŋka məs dəsban ɓa nan tay va ɗəf məza maɗulan ɓa, dərka gəla nan aka hoyoŋko.

²⁷Buna zika məlpeŋɗe azoŋko barkataŋɗe bo azoŋguk də sembe aka gəla nani aɓəzlək wəbzla mbrayen.

²⁸Adan Zezu agrak wəpeliŋka, ɗii pak agətaŋka aka wərba nani,

²⁹vi dəpel sit va məsənaŋ zəga na henziŋ adawpeleŋ ɓa, amma apel sitik də sembe.