Read Gidar Matiye 8 Bible Online

Matiye 8 - Gidar bible

Matiye 8

¹Adan Zezu aprik səka mosorgo naka, ɗii diiɗa asbanənka.

²Yaŋ ɗəf məs kokolo azar aza Zezu akdukuk takpran abani, apsən na: Məsən zəga an kəŋgəlka akəɓap əmbəl guwa.

³Zezu atələk vani, arəŋ gənka, apsən na: Nəŋgəlka, say ambələ. Go'ləŋ ni məs kokolo ambəlka.

⁴Yaŋ Zezu apsən na: Apprəm lewlewi: Kədawnah sən ɗəf ɓa, amma dok kərban zuk aza məs dələv* na Maŋgəlva, va Moyis aɗi wən nani, vi wərban sit ɗii pak na kəmbəlka.

⁵Adan Zezu atoŋ a Kafarnahum, yaŋ daya net sozeɗ mə Roma, azarka zani, akamanəka də baah sən gəni.

⁶Apsən na: Məsən zəga, gawla naw tay məvoŋ ni eŋgil də gbəgba'a, awɓap wəɓla ɓa, tay zəm saha diiɗa.

⁷Zezu apsənna: Wanəmbatə kawmbəl gəni.

⁸Soze nak amna: Məsən zəga naw nəgap kətoŋ gən annawda ɓa. Anah wən taka kaaka'ə gawla naw wambələ.

⁹Ambra tilit ɗii gugiriɗ naw nani, naw tamə daya net sozeɗ meɓɓet nani. An nənahsənək aŋka: Doko wambatə. An nənahsənək andaka: Ade wade. An nənahək na gawla nawa: Aɗɗa vana, waɗɗa.

¹⁰Adan Zezu apprəm wəpel nani atafəka, apsit məzəsbanən na: Gesiŋ nədawnah sukum: Nərah ɗaah məzu taf vaŋ aweleŋgit ɗii na Israyel ɓa.

¹¹Əntatə nah sukum: Ɗii diiɗa wazoŋ səmba pay nampum gəm səmba pay na moskoyo, wazəmaŋ də Abraham də Isak gəm Zakub adəv məlĩ na Maŋgəlva.

¹²Amma ɗiiyen məs Maŋgəlva awel kəta vi məlĩ nani, kərɓeheti apoho ara guzliyo, wahəmmaŋ, wampəranən sleyit adaka.

¹³Zezu apsən soze nak na: Amndok anokda, wagəɗ suk va kətafa. Gawla nan ambələk daska'a ləŋgə.

¹⁴Zezu ambatka ana Simoŋ Piyer da, arəh tək atən tat ɗuffo də kiiyət wəsata,

¹⁵Zezu arəŋgətək aza vata, gamba appatəka, təsilke tədəh sitik waya.

¹⁶Adan moskoy agəɗə, akiyaŋ sənənək ɗii diiɗa mitemti. Zezu arɓehetik tuyeŋɗe səket də wəpel nani, ambəl gitik məs gbəgbaɗe pakə.

¹⁷Aspak agəɗək vi an məs kleŋ Ezay anah dəsan gən gesiŋ amna: Aslanək əddak namə, aslanək gbəgba' namə.

¹⁸Adan Zezu awle ɗii diiɗa, akaraŋ kini, anah sitik gewleɗ nan dəmbataŋ gən dəgar ki pe'e.

¹⁹Məsən zəga na ma henziŋ azarka zani amna: Məsən zəga ko aŋga kəmbat di pak wanəsboko.

²⁰Zezu apsən na: Balwayɗe tahəŋ də vovɗe, biŋgeɗ tahəŋ dit gəleɗe. Amma Wətən Ɗəffa* tay də təki naw voŋ na feten zən ɓa.

²¹Ɗəf maɓɓan səret məzəs banəni amna: Məsən zəga apəl su tive ndaw wəndək əbba tagay.

²²Zezu apsən na: Asbawa apet ɗii məmtit də ndiknin məmtit neti.

²³Adan Zezu atoŋ adəv bəlay, gewleɗ nan ambataŋgək dəndən.

²⁴Go'ləŋgə barkataŋɗe azoŋguk gədak aket iŋkile ha vavolumɗe asərətənək bəlay. Amma Zezu tay leŋge.

²⁵Gewleɗ nan azoŋko zani, afɗahanənka, apsənəna: Ɗəfdaya akoho gəmə mənam tatəmta.

²⁶Zezu apsit na: Vi mi kədaw geslne'eŋ di? Munokum məs wətaf nokum suɗikeŋ di? Yaŋ asili, ahayẽt barkataŋɗe dit iŋkile, ndəɗaŋ pak ɓata'ə.

²⁷Ɗii pak agətaŋgək diiɗa, anahaŋ na: Aŋ ɗəf mi yaŋ di may barkataŋɗe dit iŋkile pak wəpprəmnən manəŋ di?

²⁸Adan Zezu agap dəgar ki pe'e aka dələv net Gadaryenɗe, ɗii sula də gbəgba' net tuyeŋɗe eketi agilyoŋgək sədəv magamasɗe, almaŋgək dəndən. Tuwãhi ɗəf dətoŋgən tive nani.

²⁹Aɗiyaŋgək giŋgere aɓɗaŋ na: Nok Wətən Maŋgəlva* kənani, məkədaw kayan azam di? Kədek vi kawzəm gəm saha daga payan məɗiyən dəgap ɓa sa?

³⁰Ngaɓa net vedemɗe tahəŋ atəki nan faraɗa suɗike, tahəŋ wətaɗaŋ adaka.

³¹Tuyeŋɗe nek akamanən Zezu: An mokoka ərɓaham na, appam mətoŋ gən aket vedemɗe ndeki.

³²Yaŋ Zezu apsit na: Məduwaŋ. Agilyoŋgək səket ɗii neki, atoŋgoŋko aket vedemɗe neki. Ngaɓa net vedemɗe awɗaka, asbəraŋgək daga sə ma busgum məɓayən aret iŋkile, azaŋka daka.

³³Məzuteɗeŋɗe net vedemɗe anzoŋko awalaŋ gəla, anahaŋ sitinik ɗiiyi an məs dəgəɗ pakə, gəm məs an dəgəɗ aket ɗii də tuyeŋɗe sula neki.

³⁴Ɗii nawalaŋ gəla pak agulyoŋko, vi kalma də Zezu. Adan awlanəni, akamanənək diiɗa dəmbat gən səka dələv neti.