Read Gidar Markus 10 Bible Online

Markus 10 - Gidar bible

Markus 10

¹Zezu asilik sətəki nani, ambatək aka dələv na Zude, adan agar ki məlpa na Zordan. Ɗii akkalaŋgək azan əmpa, arban sitik va adaɗɗa ɗayɗayə.

²Farisiyenɗe* meɓɓet azoŋguk aza Zezu, azaɗaŋgək mazaɗ abani: Assohonənka: Mbari di? Ma henziŋ apanək tive sən ɗəf narɓəh guluk viyan dəgəɗ pak sa?

³Zezu azlan sitik də wəssoho: Mi Moyis van aver sukum adəv ɗerewel na ma henziŋ van di?

⁴Aɓɗaŋ na: Moyis appanək tive sən ɗəf mizilin, dəver sətə gən ɗerewel nappata, dərɓətə gən guluk nani.

⁵Zezu apsit na: Moyis aver sukum na vi ki ɓəɓal nokumi.

⁶Amma daga wətəŋ nan na, Maŋgəlva aɗɗak zigeɗ pakə, adak ɗəf mizilin dət gulku.

⁷Vi vaski ɗəf mizilin wappan affəni dət mani, wasap dət guluk nani.

⁸Ndəɗaŋ sula git pak wakpaŋgaŋ gəɓa zit taka, vaski asoŋ na sula əmpa ɓa amma wakpaŋgaŋ gəɓa zi taka.

⁹Vi vaski zəga məs Maŋgəlva asapani, ɗəf adawɗakan ɓa.

¹⁰Adan atoŋgoŋ eŋgili, gewleɗ nan assohonənək wənnani.

¹¹Zezu anah sitike: Ko naway dəppat guluk nani, akay maɓɓata, mana'a agəɗ dənta.

¹²Vaski bo guluk akən təppan zilta təgəmək ɗəf maɓɓani mana'a təgəɗə.

¹³Ɗii meɓɓet akiyənik kirin memeɗeŋɗe aza Zezu vi dərəŋgiti gini. Gewleɗ nan ahayetinke.

¹⁴Adan Zezu awle, gədəvən adəka, apsit gewleɗ nan na: Məppet kirin memeɗeŋɗe dəzoŋ azawa. Kədawtekin ɓa, vi məlĩ na Maŋgəlva tay viyit kirin zemvit eŋki.

¹⁵Gesiŋ nədawnah sukum: Ko naway an dətaf məlĩ na Maŋgəlva va wiyən muzliya ɓa, atoŋ na adak ɓa.

¹⁶Yaŋ aslet kirin neki aɗiyək van aketi, aɗɗasitik zəzaya.

¹⁷Adan Zezu adawmbata aka tive na, ɗəf adek dənze, akdukuk abani assohonəka: Mərbə zəga mogoni, mi nədaɗɗa nəra gən zeŋgillew an nassa ha faɗ di?

¹⁸Zezu azlan sənəka, vi mi kənah na mogow nani di? Say ɗəf takayi mogoni, ndəni Maŋgəlva.

¹⁹Kisinik ma henziŋɗe ɓa sa: Kədawbay gəbay ɓa, kələɗɗa mana'a ɓa, kədawhal ɓa, kədawa wən aka ɗəf ɓa, kədaɗɗa vurum ɓa, agakdakan affuko dət moko.

²⁰Yaŋ amna: Mərbə zəga as pak nəsbanək daga səka suɗike nawa.

²¹Zezu awlak də wəŋgla, apsən na: Asna ambər sukuk zəga taka: Avəl zəga nok pakə apsit məs saheŋɗe, vasna wakərəh məzaɓan a disiŋ. Asna kəde gən wəsbaw kana.

²²Adan apprəm wənnəska, makran asanəka vi məs aryayi diiɗa sawɓa.

²³Zezu awlek gewleɗ nani, apsit na: Tuwãhyi məs arya dətoŋ gən məlĩ na Maŋgəlva.

²⁴Gewleɗ agətaŋgək aka wənnan sawɓa, amma Zezu apsit əmpa na: Kirtuwa tuwãhyi wətoŋ məlĩ na Maŋgəlva sawɓa.

²⁵Ɗəɗaah zlogomo watoŋ dəmba batal ki məs arya wətoŋ məlĩ na Maŋgəlva.

²⁶Gewleɗ nan agətaŋgək sawɓa, yaŋ assohonən ma ziti: An vaski na, naway nawɓap wəkohi di?

²⁷Zezu awleke, apsit na: Zəga an tuwãh azet ɗiiyi, tay tuwãh aza Maŋgəlva ɓa. Vi zəga pak tay tuwãh aza Maŋgəlva ɓa.

²⁸Yaŋ Piyer anahsən na: Yaŋ nam pak məpanək zəga nam pak mənam tatəsboko.

²⁹Zezu azlan sənək na: Gesiŋ nədawnah sukum: Ko naway dəpan gəla nani, ko milmiŋgiɗni, ko mani, ko affəni, ko kirtini, ko guli nani vi iya nawa gəm vi Wən Neneke.

³⁰Fəkat warah riba təɓələn səkatə adəv pay an nanziya an kakaŋka, gəleɗe, milmiŋgiɗin, maay mani, kirni, gulyo, dəwərma mama pakə. Pay wənziya an dədazani warəh zeŋgillen məza agrak na ɓa.

³¹Amma ɗii diiɗa an nabe wasoŋ dərɓe, ɗii diiɗa en na dirɓe kakaŋka, wakpaŋgaŋ ɗii nabe.

³²Yaŋ agəm tive an dədawteŋ a Zerusalem. Zezu tayabe gewleɗ nan ageslne'eŋgək diiɗa, ɗii yen disbetin dirɓeget bo geslne armeke. Yaŋ Zezu andek gewleɗ nan klaw kiyit sula, ndəɗaŋ katirgiti anah sitik an dədawrəhən.

³³Apsit na: Məpprəma, mənam tatəpeŋ a Zerusalem, adak na Wapsənən Wətən Ɗəf* avet ɗii gugiriɗ net məs dəlveŋge, dit məsənaŋ zəga na ma henziŋ na Maŋgəlva. Watawaŋ kita namta kani. Wapsitin avet ɗiiyən məs dəsənən Maŋgəlva ɓa.

³⁴Net bo wanəhaŋ wən azani, watufoŋ sənən mifɗe, warganəni, wabayəni. Amma dərɓaga wuvoŋ hoku wasil sətəki əmta.

³⁵Dərɓagani Zak də Zaŋ kirtin Zebede azaraŋgək aza Zezu, anah sənənək na: Mərbə zəga, zəga tay məŋgəl wəssoho kəɗɗa səm gəni.

³⁶Zezu assohotike: Mi kəŋglaŋ nəgəɗ sukum gən di?

³⁷Azlan sənənək na: Pay kədawsok adəv məlĩ nok məs də gakdak na, məŋgəl na kəɗiyəm gən taka aka va dəzən noko, taka aka va zlaɓay noko.

³⁸Amma Zezu apsit na: Kəsənaŋ zəga nassoh ɓa. Wakəɓapən hĩlu nawzəm saha an nədawzəməŋ sa, walla wakəɓapən baptem an na sahaŋ nədawtafəŋ sa?

³⁹Yaŋ azlanən na: Waməɓapa. Zezu apsit na: Vaski wakəzəmaŋ adəv hĩlu na saha nawa, wakətafən baptem na saha nawa.

⁴⁰Amma wənna wəsuwa aka vaw dəzəŋ də aka vaw zlaɓay wən nawi ɓa. Təki nan tay viyit ɗii məs Maŋgəlva aweli.

⁴¹Adan gewleɗ meɓɓet klaw apprəmən vaska, gidivit adek aka Zak də Zaŋ.

⁴²Vi vaski Zezu ayek pak azani, apsit na: Kəsənənka, milyeŋge na dələv tahəŋ wəzəmən məlĩ aket ɗiiyi, ɗii gugiriɗ bo tahəŋ wərbanən gakdak neti.

⁴³Amma awalaŋkum ageɗ na vasɓa. Ɗəffan dəŋgəl wəsan daya na, say dəsan gən məgəɗ wəza abet ɗiiyi.

⁴⁴Ɗəffan dəŋgəl kawsan daykikum na, say dəsan gən ballam nokum pakə.

⁴⁵Ko Wətən Ɗəffa* dəde vi ɗii dəɗɗaŋ sənən gən wəza ɓa, amma dəgəɗ gən wəza sit ɗiiyi, azanək zeŋgillen vi kaw met ɗii diiɗa.

⁴⁶Agapaŋka a Zeriko. Adan Zezu adawgilyan sədak dit gewleɗ nani gəm ɗii diiɗa, ɗəf tay daŋgar aba tive ɗewwe wəŋgla zəga avet ɗii məzu toŋgoŋ. Iya nan na Bartime wətən Timus.

⁴⁷Adan apprəm na Zezu məs Nazaret dədawtoŋgo, atəŋgək wəɗi geŋgere: Aw Zezu Wətən Davit* awəl saha kawa!

⁴⁸Ɗii diiɗa ahayanənka, apsənən na asok ɓatə, amma yaŋ adaw ɗi geŋgere dayki laŋka: Aw Wətən Davit awəl saha kawa.

⁴⁹Zezu aziwke amna: Məya suwa. Ayanənək daŋgar naka, apsənən na: Asok zuko tay yuko, asili.

⁵⁰Yas asgan lukut metiŋ nani, asili ade aza Zezu.

⁵¹Zezu assohonəka: Mi kəŋgəl nəgəɗ suku gən di? Daŋgar azlan sənək na: Mərbə zəga nəŋgəl haraw dəkol gəni.

⁵²Zezu apsən na: Doko wətaf nok ambəl gukuko, kakaŋka ni haran akolko, asbanək Zezu aka tive.