Read Gidar Markus 11 Bible Online

Markus 11 - Gidar bible

Markus 11

¹Adan azaraŋ gu'o də Zerusalem, amaŋgava Baytifage də Baytaniya, agapaŋgək aka gərəm na hereme. Zezu aslənək gewleɗ nan sula.

²Apsit na: Mədoŋ awalaŋ gəla an na bokum ndaka. An kətoŋgoŋko, wakərətən bəlatək nat koruk minata, ɗəf dəpeŋ ɗaah akat ɓa. Məpəlta, məkita.

³An ɗəf assohokumko, vi mi kədawpəltən di? Mənah sən na: Wəray Ɗəfdaya taya zata. Wakəkitən go'u.

⁴Adoŋko arətənək koruk nak minat aba tive, ama gəla. Adan adawpəltəni.

⁵Ɗii meɓɓet en məs nadak assohotinke: Mi kədaɗɗaŋ di? Vi mi kədaw pəltən di?

⁶Azlanənək va Zezu anahsiti, yaŋ ɗii nek apetini.

⁷Akitənək koruk nak aza Zezu, abasənək lukut net akata, Zezu bo apeŋgək akata.

⁸Ɗii diiɗa abasənək lukutɗe net aka tive, ɗii meɓɓet abələnək gəslamba sə guli neti abasənək aka tive.

⁹Yaŋ ɗii məzudawaŋ aba Zezu dit məzəsbanən pak aɗiyaŋgək giŋgere. Usoko sən Maŋgəlva. Maŋgəlva dəɗɗa zəzay nan aka ɗəf məzəzan də iya na Ɗəfdaya.

¹⁰Maŋgəlva dəɗɗa zəzay nan aka məlĩ an dədazani, məlĩ na affəm Davit. Gakdak aza Maŋgəlva ana disiŋ.

¹¹Zezu aguluk a Zerusalem. Atoŋgoŋguk adəv gəla metiŋ naw zuliya*: Adan awle zigeɗ na maŋgavan pakə, moskoy agəɗək səkay, yaŋ ambat a Baytaniya, dit gewleɗ nan klaw kiyit sula neki.

¹²Vit pumpum nani adan adawgilyoŋ sə Baytaniya, maay armak Zezu.

¹³Zezu awlak sukoyo məndəfən mogoni ambatək ulani kuzuŋ uwa nan taya kani. Amma adan agap azani say van kaaka arahə, vi pay nawa nani ɓa.

¹⁴Zezu anahsənək sukoyo: Ɗəf azəmna ɗaah uwa nok ɓa, ha dudan. Gewleɗ nan apprəmənka.

¹⁵Adan agapaŋ a Zerusalem, Zezu atoŋguk adəv gəla metiŋ naw zuliya atəŋgək wərɓi məzuvəlaŋ zəga dit məzəlbahaŋ zəga sədəv gəla metiŋ na zuli pakə. Asleŋgetik tabəlɗe net məzə dədɗaŋ suleyɗe, asleŋgetik mezeŋgeɗ net məvəlaŋ biŋgeɗ na maha.

¹⁶Dəppan ko ɗəf taka dətoŋ gən də zəga adəv gəla metiŋ na zuli ɓa.

¹⁷Arbanək wənnan sit ɗiiyi apsit na: Va məverin adəv ɗerewel na: Maŋgəlva amna: Gəla naw ndəni gəla naw zuliya viyit ɗii pakə. Amma yaŋ kəpaŋganən va bətəŋ net məvoŋgoŋ tive.

¹⁸Ɗii məsənaŋ zəga na ma henziŋ dit məs dəlveŋge apprəmənək wənnani, vi vaski akayanəni vi kawzani. Yaŋ ageslne'eŋ səni, vi ɗii agətaŋgək aka wərba nani.

¹⁹Adan moskoy agəɗə, Zezu dit gewleɗ nan agulyoŋguk suwalaŋ gəla.

²⁰Vit pumpum nan də pumo, adan adawtoŋgoŋ awlanənək sukoyo nak məklakan daga səka slalwanyin pakə.

²¹Piyer aɗumonəko anahsənək Zezu: Mərbə zəga, awla sukoyo məs kəray gən naka, amtəka.

²²Zezu apsit na: Əntatərban sukum, an munokum tat də wətaf Maŋgəlva.

²³Wakəɓapan wənah sən gərəməŋka: Azar abət a pe'e. An kəɗɗaŋ kuzuŋ amokrokum ɓa, an kətafənka kənahaŋgək na wagəɗə, wagəɗ sukum.

²⁴Vini an munokum tatə sohoŋ zəga mətaf na wakərəhənni asna wagəɗ vaska.

²⁵An munokum tatə zuliyaŋ an munokum tatə də wən aka ɗəffa məviyan səni, vi Affukum na disiŋ də viyən sukum gən mambray nokum tamə.

²⁶[An kəviyanən mambray net ɗii məs adaɗɗaŋ sukumən ɓa, asna Affum na disiŋ bo aviyan sukum na mambray nokum ɓa'a.]

²⁷Amilyoŋguk a Zerusalem. Adan Zezu adabal adəv gəla metiŋ naw zuliya* məsənaŋ zəga na ma henziŋ dit məs dəlveŋge gəm ɗii gugiriɗ azoŋguk aza Zezu.

²⁸Assohonənka: Də sembe nami kəɗɗe zigeɗiŋ di? Nawa dupsuk sembe naɗɗan vas di?

²⁹Zezu azlan sitik na: Naw bo wanəssohokum zəga taka: An kəzlan suwənka, naw bo wanənah sukum təki nərəh sembe naɗɗe zigeɗiski.

³⁰Naway dəslən Zaŋ məgəɗ baptem di? Maŋgəlva sa, walla ɗiiyi? Məzlan suwa.

³¹Atəŋgaŋgək wəbay ma awalaŋ ziti də wənah na: An mənahək na: Maŋgəlva dəsləna, wassohomna: Ya vi mi kətafnən ɓa di?

³²Amma an mənahək na ɗiiyiŋ dəslənəni ageslne'eŋgək sit ɗiiyi, vi ɗii pak tahəŋ ulanən Zaŋ ndəni va məs kleŋ an də goŋga.

³³Vi vaski azlan sənənək na: Məsən ɓa. Zezu apsit na: An vaski na naw van tam nənah sukum na sembe məs nədaɗɗe zigeɗis dəndən ɓa.